ސްޓޭޓް އިލެކްޓްރިކް ކޮމްޕެނީ (ސްޓެލްކޯ)އިން, އަރިއަތޮޅުގެ 14 ރަށެއްގެ މަގުބައްތި މަރާމާތުކޮށް ބެލެހެއްޓުމުގެ މަސައްކަތާ ހަވާލުވެއްޖެއެވެ.
މި މަސައްކަތާ ހަވާލުވުމަށް ސްޓެލްކޯއާ ކައުންސިލްތަކާމެދު ވަނީ ހޯމަ ދުވަހު ފަހުމުނާމާތަކުގައި ސޮއިކޮށްފައެވެ. ސްޓެލްކޯގައި ބޭއްވި މި ރަސްމިއްޔާތުގައި އެ ކުންފުނީގެ އިސްވެރިންނާއި ރަށްތަކުގެ އިންޖީނުގެތަކުގެ މެނޭޖަރުންނާއި ރައްޔިތުންގެ މަޖިލީހުގެ މަތިވެރި ދާއިރާގެ މެމްބަރު ހަސަން ޒަރީރު އާއި އއ އަދި އދ އަތޮޅު ކައުންސިލްތަކުގެ ރައީސުންނާއި ރަށްރަށުގެ ކައުންސިލްގެ ރައީސުންގެ އިތުރުން ލޯކަލް ގަވަރމަންޓް އޮތޯރިޓީ (އެލްޖީއޭގެ) ސީއީއޯ އަފްޝަން ލަތީފު ބައިވެރިވެވަޑައިގަތެވެ.
މަގުބައްތި މަރާމާތުކޮށް ބެލެހެއްޓުމަށް ސްޓެލްކޯއިން އެއްބަސްވުމުގައި ސޮއިކޮށްފައިވަނީ އއ އަތޮޅުގެ 5 ރަށާއި އދ އަތޮޅުގެ 9 ރަށް ހިމެނޭހެން، 14 ރަށެއްގެ ކައުންސިލްތަކާއެކުގައެވެ. މިއީ ސްޓެލްކޯއިން އެ އަތޮޅުގައި ޚިދުމަތްދެމުން އަންނަ ރަށްތަކެވެ.
ސްޓެލްކޯއާއެކު އެއްބަސްވުމުގައި ސޮއިކުރި ރަށްތައް
- އއ. މަތިވެރި
- އއ. ބޮޑުފޮޅުދޫ
- އއ. ފެރިދޫ
- އއ. މާޅޮސް
- އއ. ހިމަންދޫ
- އދ. ހަންޏާމީދޫ
- އދ. އޮމަދޫ
- އދ. ކުނބުރުދޫ
- އދ. މަހިބަދޫ
- އދ. މަންދޫ
- އދ. ދަނގެތި
- އދ. ދިގުރަށް
- އދ. ދިއްދޫ
- އދ. ފެންފުށި
މި އެއްބަސްވުންތަކާ ގުޅޭގޮތުން ސްޓެލްކޯގެ މެނޭޖިންގ ޑިރެކްޓަރު އަހުމަދު ޝަރީފު ވިދާޅުވީ، މިއީ ކައުންސިލްތަކާއި ސާރާތައް ލާމަރުކަޒީ ނިޒާމުގެ ދަށުން ހިންގުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ކުރައްވަމުން ގެންދަވާ މަސައްކަތްޕުޅުގެ ތެރެއިން ފެށި މަސައްކަތެއް ކަމަށެވެ. އަދި ބޭނުންވަނީ ސްޓެލްކޯއަކީ ރައްޔިތުންނަށް ޚިދުމަތްދޭ ނަމޫނާ ކުންފުންޏަކަށް ހެދުން ކަމަށެވެ. އެހެންކަމުން ކުރިއަށް އޮތް ތަނުގައިވެސް އެކުންފުނީގެ ފުދުންތެރިކަން ހުންނަވަރަކުން އިޖުތިމާއީ ކަންކަމުގައި ރަށްރަށަށް އެހީތެރިކަން ފޯރުކޮށްދެއްވާނެކަމުގެ ޔަގީންކަން ޝަރީފު ދެއްވިއެވެ.
އޭނާ ވިދާޅުވީ ސްޓެލްކޯއިން ރާއްޖޭގެ 31 ރަށުގައި ޚިދުމަތް ދެމުން އަންނައިރު އެ ހުރިހާ ރަށްރަށުގެ މަގުބައްތި މަރާމާތުކޮށް ބެލެހެއްޓުމާވެސް ކުރިއަށްއޮތްތަނުގައި ހަވާލުވާނެކަމަށެވެ. އެގޮތުން، ވ އަތޮޅާއި ކ އަތޮޅުގެ ރަށްތަކުގެ ކައުންސިލްތަކާއެކު އަންނަ އޮކްޓޯބަރު މަހު އެއްބަސްވުންތަކުގައި ސޮއިކުރެވޭނެ ކަމަށް ވިދާޅުވިއެވެ.
މަގުބައްތި މަރާމާތުކޮށް ބެލެހެއްޓުމުގެ ތަޖުރިބާއާ ކެޕޭސިޓީ، އަދި ސްޓާފުން ނެތުން އެކަށީގެންވޭ. އަޅުގަނޑުމެން އަތުގަ އެ ހުނަރާ ސްޓާފުން އަދި ވަސީލަތްތައް އެބަހުރި. ހަމައެކަނި އަޅުގަނޑުމެން ކައުންސިލަށް ދަންނަވާނީ މަރާމާތުކުރުމަށް. އެއްވެސް ބަދަލެއް ގެންނަން ޖެހިއްޖެ ހާލަތެއްގަ، އެއްވެސް ޚަރަދެއް ކުރަން ޖެހިއްޖެ ހާލަތެއްގަ، އޭގެ އެޕްރޫވަލްއަށް. މީގެ ފަހުން މަގުބައްތިތައް ހުންނާނީ ދިއްލިފަ. ދަބަރު ޖަހާފަ ހުރި މަގުބައްތިއެއް، ހޮޅިދަނޑިއެއް ނުފެންނާނެ.ސްޓެލްކޯގެ މެނޭޖިންގ ޑިރެކްޓަރ އަހުމަދު ޝަރީފު
ސްޓެލްކޯއިން ވަނީ މީގެ ކުރިން ވެސް އއ އަތޮޅުގެ ތިން ރަށެއްގެ ކައުންސިލްތަކާއެކު މިފަދަ އެއްބަސްވުންތަކެއްގައި ސޮއިކޮށްފައެވެ. އެއީ ތޮއްޑޫއާއި ރަސްދޫއާއި އުކުޅަހެވެ. އެ ރަށްރަށުގެ ކައުންސިލްތަކާއެކު ވެވުނު އެއްބަސްވުންތަކުގައި ކަންތައްތަކެއް ހުރިކަން ފާހަގަކުރެވި އެކަންކަން ހައްލުކޮށްފައި ވާނެކަމަށް ޝަރީފު ވިދާޅުވިއެވެ.
ސްޓެލްކޯއިން ސޮއިކުރި އެއްބަސްވުންތަކާ ގުޅޭގޮތުން މާޅޮހު ކައުންސިލްގެ ރައީސް އިސްމާއީލް ނަސީރު ވިދާޅުވީ، ޝަރީފު ސްޓެލްކޯގެ މެނޭޖިންގ ޑިރެކްޓަރުކަމާ ހަވާލުވެވަޑައިގަތްފަހުން ކައުންސިލްތަކާއެކު އޮންނަ ގުޅުން ވަރަށް ބޮޑަށް ބަދަހިވެފައިވާކަމަށެވެ. އަދި މަގުބައްތިތައް ބެލެހެއްޓުން އެ ކުންފުންޏާ ހަވާލުކުރުމަކީ ދެވަނަ "ފިޔަވަތި" ކޮންފަރެންސްގައި ސްޓެލްކޯއާއެކު ވެވުނު މަޝްވަރާތަކުގައި ހިމެނޭ ކަމެއް ކަމަށާއި، އެ ބައްދަލުވުމުގައި މަޝްވަރާ ކުރެވުނު އެހެން ކަންކަންވެސް ވެގެންދާނެކަމަށް އުއްމީދު ކުރައްވާ ކަމަށްވެސް އޭނާ ވިދާޅުވިއެވެ.
މީގެ އިތުރުން ކައުންސިލްތަކަށް ދަތިވެފައިވާ ކަންކަމުގައި ސްޓެލްކޯގެ އެއްބާރުލުމާއި އެހީތެރިކަން ލިބޭނެކަމުގެ ޔަގީންކަން މިހާރު ލިބިފައިވާ ކަމަށްވެސް ނަސީރު ވިދާޅުވިއެވެ.
ސްޓެލްކޯގެ ފަރާތުުން ކަށަވަރުކުރާނެކަން ޔަަގީންވޭ ރަށްރަށުގަ މިގޮތަށް ހުންނަ ބައްތިތައް ރޭގަނޑު ދެން އަބަދުވެސް ހުންނާނީ ދިއްލިފަކަން. މި ކަމަކީ ކައުންސިލްތަކަށް ވަރަށްބޮޑު ގޮންޖެހުމަކަށް ވެފަ އޮތް ކަމެއް.މާޅޮހު ކައުންސިލްގެ ރައީސް އިސްމާއީލް ނަސީރު
ސްޓެލްކޯއިން އެ ކުންފުނިން ޚިދުމަތް ދެމުން އަންނަ ރަށްރަށުގެ މަގުބައްތި މަރާމާތުކޮށް ބެލެހެއްޓުމުގެ މަސައްކަތާ ހަވާލުވަމުން ދަނީ އެ ކުންފުނީގެ އިޖުތިމާއީ ޒިންމާގެ ދަށުންނެވެ.
