ކޮލެޖް، ޔުނިވަސިޓީއަކަށް ބަދަލުވާ މުއްދަތު ކުޑަކުރަން މެންބަރުން ތާއިދުކުރޭ
ކޮލެކް ޔުނިވަސިޓީއަކަށް ބަދަލުވާ މުއްދަތު 15 އަހަރަށް ވެގެންދިއުމަކީ މައްސަލައެއް ނޫން
އެމްއެންޔޫގެ ދަރިވަރުންތަކެއް
ރާއްޖޭގައި ކޮލެޖުގެ ގޮތުގައި މެދު ކެނޑުމެއްނެތި ހިންގާތާ 15 އަހަރު ވެފައިވާ ތަޢުލީމުދޭ މަރުކަޒުތަކަށް ޔުނިވާސިޓީގެ ދަރަޖަ ލިބޭ ގޮތަށް ދިވެހިރާއްޖޭގެ މަތީ ތައުލިމާއި ތަމްރީނުގެ ޤާނޫނަށް ހުށަހަޅާފައިވާ އިސްލާހަށް ގިނަ މެންބަރުން ތާއިދުކޮށްފިއެވެ.
ތުލުސްދޫ ދާއިރާގެ މެމްބަރު އިބްރާހިމް ނަސީމް ހުށަހެޅުއްވި މި ބިލުގައި ބުނެފައިވަނީ ކޮލެޖެއް ހިންގާތާ 20 އަހަރުވުމުން ޔުނިވަރސިޓީއަކަށް ބަދަލުވާން އޮންނަ މުއްދަތު 15 އަހަރަށް ކުޑަކުރުމަށެވެ. މި އިސްލާހުގައި އިތުރަށް ބުނެފައި ވަނީ ފަސް ދާއިރާއެއްގެ ތެރެއިން މަދުވެގެން ތިން ދާއިރާއިން ޤައުމީ ސަނަދުތަކުގެ އޮނިގަނޑުގެ ޑިގްރީ ލެވެލް އަދި މާސްޓާސް ލެވެލްގެ ޕްރޮގުރާމުތައް އެކޮލެޖަކުން ނުވަތަ ބޭރުގެ ޔުނިވާސިޓީއަކުން ހިންގަން ޖެހޭނެކަމަށެވެ.
އެ އިސްލާހުގައި ބުނާ ގޮތުން މި ޕްރޮގުރާމުތައް ހިންގާ ކޮލެޖުތަކުގައި ކިޔަވާ 500 ކުދިން ތިބެންޖެހެއެވެ. ނުވަތަ ބައިނަލް އަގުވާމީ ކޮލިޓީ އެޝުއަރެންސް ޖަމާއަތެއްގެ މެމްބަރެއްގެ ގޮތުގައި މަދުވެގެން ހޭދަކޮށްފައިވާ ކޮލެޖަކަށް އެ ކޮލެޖެއް ވާން ޖެހޭނެއެވެ. ރާއްޖެއިން ބޭރުގެ ޔުނިވާސިޓީތަކާއި، ޖަމާއަތްތަކާއި އެކު ބައިނަލްއަގުވާމީ ފެންވަރުގެ ދިރާސާތައް ހިންގުމުގެ ތަޖުރިބާ ލިބުމުގެ އިތުރުން އެކޮލެޖެއްގެ ޕްރޮގްރާމުތަކުގައި ކިޔަވައިދޭ ލެކްޗަރާއިންގެ މަދުވެގެން %10 މުވައްޒިފުންނަކީ ޕީއެޗްޑީ ނުވަތަ ހަޔަ ޕްރޮފެޝަނަލް ޑިޕްލޮމާ ހާސިލްކޮށްފައިވާ ބަޔަކަށް ވާންޖެހޭނެ ކަމަށް ވެސް އެ އިސްލާހުގައި ވަނީ ބުނެފައެވެ.
މި އިސްލާހަށް ބަހުސްކުރައްވަމުން ބާރަށު ދާއިރާގެ މެންބަރު އަހުމަދު އަބްދުﷲ ވިދާޅުވީ ތައުލީމި ސިޔާސަތަށް ގެނެވޭ ބަދަލާއި، މިފަދަ ގާނޫނުތަކުން ފަހިކޮށްދެވޭ މަގުތަކުން ދިވެހިރާއްޖެއަށް، ރާއްޖެއިން ބެރުގެ އެތައް ދަރިވަރުންނެއް އަންނަ ގޮތަށް ބަދަލުވެގެން ދިއުމަކީ ކުރެވިދާނެ ކަމެއް ކަމަށެވެ. ކޮލެޖެއް ގޮތުގައި ހިންގާ ތަނެއް ހިންގާތާ އަހަރުތަކެއް ވެގެންދިޔައީމާ، ނޫނީ 15 އަހަރު ދުވަހު ހިންގާ ބައިނަލްއަގުވާމީ މިންގަނޑުތަކަށް ހިންގާނަމަ ނޫނީ ބައެއް ރިސަރޗް ކުރާ ތަންތަނާއެކު ނޫނީ ދުނިޔޭގެ ފެންވަރުގައި އެ މަސައްކަތް ކޮލެޖްތަކަށް ހިންގާނަމަ ކޮލެޖް ޔުނިވަރސިޓީއަށް ބަދަލުކުރުމަކީ މުހިންމުކަމެއް ކަމަށެވެ.
މެންބަރު މުހައްމަދު އަބްދުﷲ ވަނީ ކޮލެކް ޔުނިވަރސިޓީއަކަށް ބަދަލުވާ މުއްދަތު 15 އަހަރަށް ވެގެންދިއުމަކީ މައްސަލައެއް ނޫން ކަމަށް ވިދާޅުވެފައެވެ.
މި އިސްލާހާއި ގުޅޭގޮތުން ހިންނަވަރު ދާއިރާގެ މެންބަރު ޖީހާން މަހުމޫދު ވިދާޅުވީ މި އިސްލާހުތަކާއި ގުޅޭގޮތުން ފުޅާ ދާއިރާއެއްގައި މަޝްވަރާކުރުމަކީ އެދޭކަމެއް ކަމަށެވެ. އަދި މިހާރު މިހުށަހަޅާފައިވާ އިސްލާހުގެ ތެރޭގައި އެންމެ މުހިންމު އިސްލާހަކީ، ދިވެހިރާއްޖޭގައި ހިންގާ ކޮލެޖެއް ޔުނިވަރސިޓީއަކަށް ބަދަލުވެގެންދާއިރު ނުވަތަ ޔުނިވަރސިޓީ ފެންވަރުގައި އެއްވެސް މަރުކަޒަކުން ތައުލީމް ދޭން، ހުއްދަ ދެވިގެންދާއިރު އެތަނަކީ 20 އަހަރުވަންދެން މެދުނުކެނޑި ރާއްޖޭގައި ތައުލީމް ފޯރުކޮށްދީފައިވާ މަރުކަޒެއްގެ ގޮތުގައި އޮތުމުގެ ބަދަލުގައި، 15 އަހަރުގެ މުއްދަތަކަށް ތައުލީމް ފޯރުކޮށްދީފައިވާ މުއްދަތު ކުޑަކުރުމަށް ހުށަހަޅާފައިވާ އިސްލާހު ކަމަށެވެ.
މެންބަރު ޖީހާން ވިދާޅުވީ މިކަންކަމަށް ރިއާޔަތްކޮށް މި އިސްލާހު ބަލައިގަންނަ ކަމުގައިވާނަމަ، 15 އަހަރުގެ މުއްދަތަށް ތަޖްރިބާގެ ލެވެލް ދަށްކުރާކަމުގައިވާނަމަ ޑޮކްޓަރޭޓް ލެވެލްއަށް ކިޔަވާފައި ތިބި މުވައްޒަފުންގެ އަދަދު 10 އިންސައްތައިން 15 އިންސައްތައަށް އިތުރުވާންޖެހޭނެ ކަމަށް ދެކެވަޑައިގަންނަވާ ކަމަށެވެ.
ބިލާއި ގުޅޭގޮތުން ވާހަކަ ދައްކަވަމުން ކެނދިކުޅުދޫ ދާއިރާގެ މެންބަރު އަހުމަދު އީސާ ވިދާޅުވީ ބިލު އެންމެ ފުރިހަމަ ނޫން ކަމަށާއި، އެހެންނަމަވެސް، މި ކޮންސެޕްޓަކީ ރައްޔިތުންގެ މަޖިލީހުން އަލުން ރިއާޔަތްކުރަންޖެހޭ ކޮންސެޕްޓެއްކަމަށް ބަލައި ހަޔަރއެޑިއުކޭޝަންގެ ގާނޫނުގެ ތެރެއަށް ގެންނަންޖެހޭ ކޮންސެޕްޓެއް ކަމަށް ރިއާޔަތްކުރާތީ ބިލު ބަލައިގަނެ ކަމާއި ގުޅުންހުރި ކޮމިޓީއަށް ފޮނުވަން ތާއިދުކުރައްވާ ކަމަށެވެ.
