ފެރީއަކުން މޫދަށް ވެއްޓުނު ޒުވާނަކު މަރުވެއްޖެ

ގއ. އަތޮޅުގައި ފެރީއަކުން މޫދަށް ވެއްޓުނު ޒުވާނަކު މަރުވެއްޖެއެވެ.

މި ހާދިސާގައި މަރުވެފައިވަނީ ގއ. ކަނޑުހުޅުދޫ، ހީނާމާގެ އުމުރުން 24 އަހަރުގެ އިރުފާން އަލީއެވެ. އޭނާ ވެއްޓުނީ ގއ. ގެމަނަފުށިން އެ އަތޮޅުގެ ކަނޑުހުޅުދޫއަށް ދަތުރު ކުރި ފެރީއަކުން އާދީއްތަ ދުވަހުގެ ހަވީރު 5:30 އެއާހައިރުއެވެ.

ފުލުހުން ބުނެފައިވާ ގޮތުގައި މި ހާދިސާގެ ރިޕޯޓް އެ އިދާރާއަށް އާދީއްތަ ދުވަހުގެ ހަވީރު 5:45 ހާއިރު ލިބިފައިވެއެވެ. އެގޮތުން، ގއ. އަތޮޅު ފެރީގައި ހުރި މީހަކު މޫދަށް ވެއްޓިފައިވާ ކަމަށް މައުލޫމާތު ލިބުނު ކަމަށާއި އޭނާ މޫދުން ނަގައިގެން ގެމަނަފުށީ ހެލްތު ސެންޓަރަށް ގެންދިޔައިރިވެސް މަރުވެފައިވާ ކަމަށް ޑޮކްޓަރުންނާ ހަވާލާދީ ފުލުހުން ބުނެއެވެ.

މައުލޫމާތު ލިބިފައިވާ ގޮތުގައި މަރުވެފައިވާ ޒުވާނާއަކީ އެ ފެރީގައި މަސައްކަތް ކުރާ ޒުވާނެކެވެ. އޭނާ ވެއްޓިފައިވަނީ ފެރީ ނެރުން ނުކުންނަން އުޅުނު ވަގުތުއެވެ.