ރާއްޖޭގައި އަހަރަކު 13-15 މީހުން ގެނބިގެން މަރުވޭ، ގިނައީ ބިދޭސީން: ފުލުހުން
ރާއްޖޭގައި ގެނބިގެން އެންމެ ގިނައިން މަރުވެފައިވާ މީހުންގެ ތެރޭގައި ހިމެނެނީ ފަތުރުވެރިން
ޗީފް އިންސްޕެކްޓަރ އޮފް ޕޮލިސް މޫސާ ރަޝީދު
ރާއްޖޭގައި އަހަރަކު 13 އާ 15 އާ ދެމެދުގެ އަދަދަކަށް ގެނބިގެން މީހުން މަރުވާ ކަމަށް މޯލްޑިވްސް ޕޮލިސް ސާވިސް އިން ބުނެފިއެވެ.
ރާއްޖެ ޓީވީގެ "ފަލަސުރުޙީ"ގައި ވާހަކަދައްވަމުން މޯލްޑިވްސް ޕޮލިސް ސާވިސްގެ ކްރައިމް ޕްރިވެންޝަން އެންޑް ޕަބްލިކް އެފެއަރޒް ގެ ޑެޕިއުޓީ ހެޑް، ޗީފް އިންސްޕެކްޓަރ އޮފް ޕޮލިސް މޫސާ ރަޝީދު ވިދާޅުވީ ރާއްޖޭގައި ގެނބިގެން މީހުން މަރުވާ އަދަދަކީ އާބާދީއާ އަޅާބަލާއިރު ބޮޑު އަދަދެއް ކަމަށެވެ. އަދި ރާއްޖޭގައި ގެނބިގެން މަރުވާ މީހުންގެ ތެރެއިން 95 އިންސައްތައަށްވުރެ ގިނަ މީހުންނަކީ ބިދޭސީންކަން ވެސް އޭނާ ފާހަގަ ކުރެއްވިއެވެ.
މޫސާ ރަޝީދު ވިދާޅުވީ ރާއްޖޭގައި ގެނބިގެން މަރުވާ މީހުންގެ ތެރޭގައި ގިނައީ ބިދޭސީންނާއި ކުޑަކުދިން ކަމަށެވެ. އެގޮތުން، ބިދޭސީންގެ ތެރެއިން ގިނަ މީހުން މަރުވެފައިވަނީ ސްނޯކްލިންއަށް ގޮސް އުޅެނިކޮށް ކަމަށާއި ޕޫލުތެރޭގައި ވެސް ބައެއް މީހުން މަރުވާ ކަމަށް އޭނާ ވިދާޅުވިއެވެ.
މިފަދަ ހާދިސާތައް ހިނގަން މެދުވެރިވަނީ ބައެއްފަހަރު ފަރުވާކުޑަވުމުންކަން ފާހަގަކުރައްވައި މޫސާ ރަޝީދު ވިދާޅުވީ ފަތުރުވެރިންނަށް ވެސް އަދި ވޯޓަރ ސްޕޯޓްސް ކުޅޭ ފަރާތްތަކަށް ވެސް ފުރިހަމަ މައުލޫމާތު ފޯރުކޮށްދިނުމަށް ހާއްސަ ސަމާލުކަމެއް ދޭން ޖެހޭ ކަމަށެވެ. އަދި ކުޑަކުދިންނަށް ސްކޫލް ދައުރުން ފެށިގެން ކަނޑުމަތީގެ ރައްކާތެރިކަމާ ގުޅޭ މައުލޫމާތު ފޮރުކޮށްދީ އެފަދަ ޕްރޮގްރާމްތައް ހިންގުން މުހިންމު ކަމުގައި އޭނާ ފާހަގަ ކުރެއްވިއެވެ.
ކުޑަކުދިން ގެނބިގެން މަރުވާ މައްސަލަތަކާ ގުޅޭގޮތުން މޫސާ ރަޝީދު ވިދާޅުވީ ބެލެނިވެރިން އެކަމަށް ވަރަށް ބޮޑު ސަމާލުކަމެއް ދޭން ޖެހޭ ކަމަށެވެ. އެގޮތުން، ފެން އަޅާފައި ހުންނަ ބާލިދީ ނުވަތަ ފާޚާނާ ތައްޓަށް ވެސް ކުދިން ވެއްޓި ގެނބިގެން މަރުވުމަކީ އެކަށީގެންވާ ކަމެއް ކަމަށް އޭނާ ވިދާޅުވިއެވެ.
މީގެ އިތުރުން ގެތަކުގައި ހަދާފައި ހުންނަ މަސް ފެންގަޑުތަކަށް ކުދިން ވެއްޓި މަރުވާ އަދަދު އިތުރުކަން ފާހަގަކޮށް އެކަމަށް ސަމާލުވުމަށް ވެސް ފުލުހުން އިލްތިމާސްކުރެއެވެ.
ރާއްޖޭގައި އާބާދީގެ ނިސްބަތުން ގެނބިގެން މަރުވާ މިހުންގެ އަދަދު ގިނަކަން ފުލުހުން ފާހަގަ ކޮށްފައިވާއިރު ދިވެހިން ގެނބިގެން މަރުވަނީ ކަނޑުމަތީގައި ހިނގާ ހާދިސާއެއްގެ ސަބަބުންކަން ފާހަގަ ކުރެވިފައިވާ ކަމަށް ފުލުހުން ބުނެއެވެ. އެގޮތުން، އުޅަނދެއް ކަނޑުވެ، ނުވަތަ ބަންޑުންވެގެން ހިނގާ ހާދިސާތަކުގައި ގިނަ އަދަދެއްގެ މީހުން ގެނބިގެން މަރުވެފައިވާ ކަމަށް ފުލުހުން ބުނެއެވެ.
