އިތުރު 14 ރަށަކަށް ބޭނުންވާ ކުޑަކުދިންގެ ޕާކު ސާމާނު ހަވާލުކޮށްފި
18 ސެޕްޓެމްބަރު 2022 | އާދީއްތަ 10:13ރަށްތަކުގައި ޕާކު ޤާއިމުކުރުމުގެ މަގްސަދަކީ ކުޑަކުދިންނަށް ހިތްފަސޭހެ މާހައުލެއް ޤާއިމުކޮށްދިނުން
ޕާކުގެ ސާމާނުތައް ހަވާލުކުރުމަށް ބޭއްވި އިވެންޓުގެ ތެރެއިން
އިތުރު 14 ރަށަކަށް ބޭނުންވާ ކުޑަކުދިންގެ ޕާކު ސާމާނު ރަށްތަކާ ހަވާލުކޮށްފިއެވެ.
މި ސާމާނު ރަށްތަކާ ހަވާލުކޮށްފައިވަނީ އާދިއްތަ ދުވަހުގެ މެންދުރު ގަލޮޅު ރަސްމީ ދަނޑުގައި ބޭއްވި އިވެންޓެއްގައެވެ. މި އިވެންޓުގައި ރަށްތަކާ ސާމާނު ހަވާލުކޮށްދެއްވީ ޔޫތު މިނިސްޓަރު އަޙުމަދު މަޚްލޫފްއެވެ. ރަށްތަކުގެ ފަރާތުން ސާމާނުތަކާ ހަވާލުވީ ދާއިރާތަކުގެ މިޖިލިސް މެމްބަރުންނާއި، ރަށު ކައުންސިލްތަކުގެ މެމްބަރުންނެވެ.
ޕާކު ސާމާނުތައް ހަވާލުކުރި ރަށްތަކަކީ، ށ.ކަނޑިތީމު، މާއުނގޫދޫ، ނަރުދޫ، ނ.މަގޫދޫ، ބ.ކަމަދޫ، ދަރަވަންދޫ، އއ.ބޮޑޫފުޅަދޫ، ދ.ރިނބުދޫ، މީދޫ، ތ.ތިމަރަފުށި، ގާދިއްފުށި، ގުރައިދޫ، ހދ.ނޭކުރަންދޫ އަދި ލ.މުންޑޫއެވެ.
މި އިވެންޓަށްފަހު ރާއްޖެ އެމްވީއާ ވާހަކަ ދައްކަވަމުން މިނިސްޓަރު މަޚްލޫފް ވިދާޅުވީ ރަށްތަކުގައި ޕާކު ޤާއިމުކުރުމުގެ މަގްސަދަކީ ކުޑަކުދިންނަށް ހިތްފަސޭހެ މާހައުލެއް ޤާއިމުކޮށްދިނުން ކަމަށެވެ. މަޚްލޫފް ވިދާޅުވީ މި ސަަރުކާރުގެ ސިޔާސަތަކީ މާލޭގައި ރީތި، ހިތްފަސޭހެ ޕާކު ހުންނަ ފަދައިން އަތޮޅު ތެރޭގެ ރަށްތަކުގައި ވެސް އެފަދަ ޕާކުތައް ޤާއިމުކުރުން ކަމަށެވެ.
މީގެ އިތުރުން މިނިސްޓަރު ވިދާޅުވީ މިހާތަނަށް ގާތްގަނޑަކަށް 130 ރަށަށް ޕާކުގެ ސާމާނު ފޮނުވުނު ނަމަވެސް، މަސައްކަތް ނިންމާލެވިފައިވަނީ ގާތްގަނޑަކަށް 30 ރަށުގައި ކަމަށެވެ. މިނިސްޓަރު ވިދާޅުވީ އެއީ ކަންބޮޑުވާ ކަމެއް ކަމަށާއި، އެދުމަކީ ބޮޑު ޚަރަދުނުކޮށް، ވީހާވެސް އަވަހަކަށް ޕާކުތައް ޤާއިމުކޮށްދިނުން ކަމަށެވެ. މަޚްލޫފް ވަނީ ކުރިއަށް އޮތް ތަނުގައި ވެސް އިތުރު ރަށްތަކަށް ބޭނުންވާ ޕާކުގެ އިތުރުން އައުޓް ޑޯ ޖިމްގެ ސާމާނު ފޮނުވަމުންދާނެ ކަމަށް ވިދާޅުވެފައެވެ.
