ފުލުހުންނާ ގުޅިގެން ސެކިއުރިޓީ އޮފިސަރުން ތަމްރީން ކުރަނީ
30 ސެކިއުރިޓީ އޮފިސަރުން ތަމްރީންކުރުމަށް ވަނީ ހަމަޖެހިފައި
އިކޮނޮމިކް މިނިސްޓްރީ އާއި ފުލުހުންނާ ދެމެދު އެއްބަސްވުމުގައި ސޮއި ކުރައްވަނީ
ސެކިއުރިޓީންގެ ގޮތުގައި ދިވެހިިން ތަމްރީންކޮށް، އެ ދާއިރާއިން ދިވެހިން އިތުރު ކުރުމަށް މިނިސްޓްރީ އޮފް އިކޮނޮމިކް ޑިވެލޮޕްމަންޓާއި ފުލުހުން ގުޅިގެން ތަމްރީން ޕްރޮގްރާމެއް ފެށުމުގެ އެއްބަސްވުމެއްގައި ސޮއިކޮށްފިއެވެ.
މި އެއްބަސްވުން ޤާއިމުކޮށްފައިވަނީ މިނިސްޓްރީ އޮފް އިކޮނޮމިކް ޑިވެލޮޕްމަންޓާއި މޯލްޑިވްސް ޕޮލިސް ސަރވިސްގެ ދަށުން ހިންގާ ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓާ ދެމެދުގައެވެ. މި އެއްބަސްވުމަކީ ސެކިއުރިޓީ އޮފިސަރސް އިނިޝިއަލް ޓްރެއިނިން ޕްރޮގްރާމެއް، އަންނަ މަހުގެ ތެރޭގައި ފެށުމަށް ވެވުނު އެއްބަސްވުމެކެވެ،
ސެކިއުރިޓީ އޮފިސަރސް އިނިޝިއަލް ޓްރެއިނިން ޕްރޮގްރަމަކީ ސެކިއުރިޓީގެ ދާއިރާއިން ކުރިއަށް ދާން ބޭނުންވާ މީހުންނަށް ފުރުސަތު ހުޅުވައިދީ، އެ ދާއިރާގައި ދިވެހިންގެ ބައިވެރިވުން އިތުރުކުރުމެވެ. އަދި މި ދާއިރާއަށް ބޭނުންވާ ދިވެހިން މުވައްޒަފުން ތަމްރީންކޮށް، ދިވެހިންނަށް ފުރުޞަތު ލިބުމުގައި ހުރި ދަތިތައް ނައްތާލުމަކީ ވެސް މި ޕްރޮގްރާމުގެ ބޭނުމެއް ކަަމަށް އިކޮނޮމިކް މިނިސްޓްރީން ބުންޏެވެ.
މި ޕްރޮގްރާމްގެ ފުރަތަމަ ފިޔަވަހީގައި 30 ސެކިއުރިޓީ އޮފިސަރުން ތަމްރީންކުރުމަށް ވަނީ ހަމަޖެހިފައެވެ. ދެ ހަފްތާގެ މި ޕްރޮގްރާމް ކުރިއަށްގެންދާނީ ދ. ވާނީގައެވެ. މިއީ 100 އިންސައްތަ ސަރުކާރުން ފަންޑުކޮށްގެން ކުރިއަށްގެންދާ ޕްރޮގްރާމެކެވެ.
އިކޮނޮމިކް މިނިސްޓްރީން ބުނީ ސެކިއުރިޓީ ދާއިރާއަކީ ޕްރޮފެޝަންއެއްގެ ގޮތުގައި ދިވެހިރާއްޖޭގައި ކުރިއަރުވަމުން އަންނަ އަދި ގިނަގުނަ ފުރުޞަތުތައް ހުރި ދާއިރާއެއްކަމަށެވެ. މި ދާއިރާއަށް ދިވެހި މަސައްކަތްތެރިން ތަމްރީންކޮށް ވަޒީފާގެ ބާޒާރަށް ނެރުމަކީ ސަރުކާރުގެ ވަރަށް ބޮޑު އަމާޒެއް ކަމަށް ވެސް އެ މިނިސްޓްރީން ބުންޏެވެ.
މިތަމްރީން ޕްރޮގްރާމްގައި ބައިވެރިވާން ބޭނުންވާ މީހުންނަށް، jobcenter.mv މެދުވެރިކޮށް ފޯމް ހުށައެޅޭނެއެވެ. އެޕްލިކޭޝަން ހުށައެޅުމުގެ ފުރުސަތު ހުޅުވާލައިފައިވަނީ އޮކްޓޯބަރު 13 ވަނަ ދުވަހުގެ ނިޔަލަށެވެ.
ރާއްޖޭގައި މިހާރު ސެކިއުރިޓީންގެ ގޮތުގައި ގިނައިން ހަރަކާތްތެރިވަނީ ބިދޭސީންނެވެ.
