އާރްޓީއެލް ޕްރޮޖެކްޓަކީ ރައްޔިތުންނަށް ހިންގޭ އެންމެ ފައިދާ ހުރި ޕްރޮޖެކްޓް ކަމަށް ގިނަ ކައުންސިލްތަކުން އިއްތިފާގުވޭ: އާޒިމް
މިއީ ހަމައެކަނި މާލެސިޓީއަށް ތަރައްޤީ ގެންނަ ސަރުކާރެއް ނޫންކަން މި މަޝްރޫއަށް ބަލާލުމުން ޔަޤީންވާނެ
އެމްޓީސީސީގެ ސީއީއޯ އާދަމް އާޒިމް
އިންޓަރގްރޭޑެޓް ޕަބްލިކް ފެރީ ނެޓްވޯރކް މަޝްރޫއުގެ ދަށުން ހިންގާ ރާއްޖެ ޓްރާންސްޕޯޓް ލިންކް (އާރްޓީއެލް) ހައި ސްޕީޑް ފެރީ ނިޒާމަކީ ރައްޔިތުންނަށް ހިންގޭ އެންމެ ފައިދާ ހުރި ޕްރޮޖެކްޓްކަމަށް ގިނަ ކައުންސިލްތަކުން އިއްތިފާގުވާ ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.
ރާއްޖެ ޓްރާންސްޕޯޓް ލިންކް (އާރްޓީއެލް) ހައި ސްޕީޑް ފެރީ ނިޒާމު، ފޭސް 2 އަދި 3ގެ ޚިދުމަތަށް ބޭނުންވާ ފެރީތައް ބަނުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ (އެމްޓީސީސީ)ން އަލްޝާލީ މެރިން މޯލްޑިވްސް ޕްރައިވެޓް ލިމިޓެޑާ ހަވާލުކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން އާޒިމް ވިދާޅުވީ ވަރަށް ގިނަ ކައުންސިލްގެ ރައީސުންނާއި ބައްދަލުކުރެވިއްޖެ ކަމަށާއި އާޓްރީއެލްގެ ޕްރޮޖެކްޓަކީ މިހާތަނަށް ރާއްޖޭގައި ހިންގޭ ރައްޔިތުންނަށް އެންމެ ފައިދާ ހުރި ޕްރޮޖެކްޓްކަމަށް، ވަކި ކުލަޔަކަށް ބެލުމަށްނެތި ހުރިހާ ކައުންސިލްތަކުން ވެސް އިއްތިފާގުވާ ކަމަށެވެ.
މި ޕްރޮޖެކްޓް މުއްދަތުގެ ކުރިން ނިންމުމަށްޓަކައި މަސައްކަތް ކުރައްވާނެ ކަމަށް ވެސް އާޒިމް ވިދާޅުވިއެވެ. އާޒިމް އިތުރަށް ވިދާޅުވީ މިއީ ހަމައެކަނި މާލެސިޓީއަށް ތަރައްޤީ ގެންނަ ސަރުކާރެއް ނޫންކަން މި މަޝްރޫއަށް ބަލާލުމުން ޔަޤީންވާނެ ކަމަށެވެ.
އާޒިމް މިހެން ވިދާޅުވެފައިވާއިރު މި މަޝްރޫއުގެ ފޭސް ދޭއް އަދި ތިނެއްގެ ދަށުން 65 ލޯންޗް ބަނުމަށް ހަވާލުކޮށްފައިވާއިރު ފޭސް ދޭއްގެ ޕްރޮޖެކްޓްގެ އަގަކީ 537 މިލިއަން ރުފިޔާއެވެ.
މި މަޝްރޫއުގެ ދަށުން މިހާރު ފޭސް 1ގެ ޒޯންތައް ކަމުގައިވާ ހއ، ހދ، އަދި ށ އަތޮޅަށް މިހާރު ވަނީ އާރްޓީއެލްގެ ޚިދުމަތް ދޭންފަށާފައެވެ. އަދި މަޝްރޫއުގެ ފޭސް 2 އަދި 3ގެ ދަށުން ބާކީ 17 އަތޮޅަށް ޚިދުމަތް ދޭންފެށުމުން، ކަނޑުދަތުރުފަތުރުގެ ވިއުގައަކުން މުޅި ރާއްޖެ ގުޅާލެވޭނެއެވެ.
އިންޓަގްރޭޓެޑް ނޭޝަނަލް ޕަބްލިކް ފެރީ ނެޓްވޯރކްއަކީ މުޅި ރާއްޖެއަށް އަމާޒުކޮށް ފަސިންޖަރުންނާއި މުދާ އުފުލާ ފެރީ ހިމެނޭ ގޮތުން، ނޭޝަނަލް ސްޕެޝަލް ޕްލޭން (2020-2040)ގައި ހިމެނޭ ތިން ޒޯނާއި 6 ރީޖަން ގުޅުވައިދިނުމަށް ފަރުމާކޮށްފައިވާ ވިއުގައެކެވެ. މި ގޮތުން ފެރީ ނެޓްވޯރކުން 6 ރީޖަންގައި އެކުލެވޭ ހުރިހާ ރަށްތަކެއް ގުޅާލެވޭއިރު، އެއް ރީޖަން އަނެއް ރީޖަނާވެސް ގުޅިގެންދާނެއެވެ. މި ގޮތަށް ފަސިންޖަރުން އުފުލާ ފެރީ ގުޅުވާލެވޭނީ ތަފާތު ތިން ގޮތަކަށެވެ. އެއީ "ކޮމިއުޓް ލިންކް"، "ނަން-ކޮމިއުޓް ލިންކް"، އަދި "ހައިވޭ ލިންކް" މެދުވެރިކޮށެވެ.
ކޮމިއުޓް ލިންކްއަކީ އެ ރީޖަނެއްގައި ހިމެނޭ ރަށްތައް ގުޅުވައިދޭ، އާންމުކޮށް ކުރަންޖެހޭ މަސައްކަތް ނުވަތަ ޒަރޫރީ ބޭނުންތަކަށް ކުރާ ކުރު ދަތުރުތަކަށް ޚާއްސަކުރެވިފައިވާ ލިންކެވެ. ނަން-ކޮމިއުޓް ލިންކްއަކީ ދެ ރަށެއްގެ ދެމެދުގައި ކުރާ، ދިގު ދަތުރުތަކަށް ޚާއްސަކޮށްފައިވާ ލިންކެވެ. އަދި ހައިވޭ ލިންކަކީ އެއް ރީޖަން އަނެއް ރީޖަނާ ގުޅުވައިދޭ މައި ދަތުރުފަތުރުގެ ހަބެވެ. އިންޓެގްރޭޓެޑް ނޭޝަނަލް ޕަބްލިކް ފެރީ ނެޓްވޯރކްގައި ހިމެނޭ ދެވަނަ ޚިދުމަތަކީ ކާގޯ ނުވަތަ މުދާ އުފުލާ ފެރީގެ ޚިދުމަތެވެ. މި ޚިދުމަތަކީ، އެ ރީޖަންއެއްގައި ހިމެނޭ ހުރިހާ ރަށްތަކާއި އެންމެ ކައިރީގައި އޮންނަ ކޮމަރޝަލް ހަބް ގުޅުވައިދޭނެ ޚިދުމަތެކެވެ.
