ވިޔަ މޮޑިއުލް ބޭނުން ނުކުރުމުން ކައުންސިލްތަކުގެ ޚަރަދުތައް ދެނެގަންނަން ދަތި: އަފްޝަން
ހިސާބުތައް ރަނގަޅަށް ނުބެލެހެއްޓުމުގެ ސަބަބުން ފިނޭންސް މިނިސްޓްރީ އާއި ކައުންސިލްތަކަށް ވެސް ދަތިވޭ
އެލްޖީއޭގެ ޗީފް އެގްޒެކެޓިވް އޮފިސަރު ފާޠިމަތު އަފްޝަން ލަތީފް
ވިޔަ މޮޑިއުލް ބޭނުން ނުކުރުމުން ކައުންސިލްތަކުގެ ޚަރަދުތައް ދެނެގަންނަން ދަތި ކަމަށް ލޯކަލް ގަވަމަންޓް އޮތޯރިޓީ، އެލްޖީއޭގެ ޗީފް އެގްޒެކެޓިވް އޮފިސަރު ފާޠިމަތު އަފްޝަން ލަތީފް ވިދާޅުވެއްޖެއެވެ.
މި މަހުގެ 11 އިން 12 އަށް ކުރިއަށް ދިޔަ ވިޔަވަތި މަހާސިންތާގައި ވެސް ކައުންސިލްތަކުގެ ހިސާބުތައް ބެލެހެއްޓުމުގައި އަމަލުކުރަމުންދަނީ އެންމެ ރަނގަޅަށް ނޫންކަން ކަމާއި ބެހޭ ފަރާތްތަކުން ވަނީ ފާހަގަކޮށްފައެވެ. އެގޮތުން ފިނޭންސް މިނިސްޓްރީން ވަނީ ކައުންސިލްތަކުގެ ހިސާބުތައް ރަނގަޅަށް ނުބެލެހެއްޓުމުގެ ސަބަބުން ފިނޭންސް މިނިސްޓްރީ އާއި ކައުންސިލްތަކަށް ވެސް ދަތިވާކަން ފާހަގަކޮށްފައެވެ. މިކަމާއި ގުޅޭގޮތުން "ރާއްޖެއެމްވީ" އަށް ދެއްވި ބަސްތީގަތުމެއްގައި އަފްޝަން ވިދާޅުވީ ގިނަ ކައުންސިލްތަކުން ވަރަށް ރަނގަޅަށް ހިސާބު ބަލަހައްޓާ ކަމަށެވެ. ނަމަވެސް ބައެއް ކައުންސިލްތަކުން ވިޔަ މޮޑިއުލް ރަނގަޅަށް ބޭނުން ނުކުރާތީ ކައުންސިލްތަކުގެ ޚަރަދު ދެނެގަންނަން ދަތިވާކަމަށް އޭނާ ވިދާޅުވިއެވެ. އެކަމުގެ ސަބަބުން ކައުންސިލްތަކަށް ދިމާވާ މާލީ ދަތިކަން ހައްލުކޮށްދިނުމަށް ފިނޭންސް މިނިސްޓްރީ އަށް ވެސް ދަތިވާކަމަށް އެނާ ވިދާޅުވިއެވެ.
ވިޔަ މޮޑިއުލްއަކީ ކައުންސިލްތަކުން ޚަރަދު ކުރާ ގޮތް ތަފްސީލްކޮށް ބެލުމަށް އެކުލަވާލާފައިވާ ވިއުގަ ނުވަތަ ނިޒާމެކެވެ.
ދާދި ފަހުން ކައުންސިލްތަކާއި އެކު ފަނޯއްލަ މަހާސިންވެސް ވަނީ ބާއްވާފައެވެ. މި ފަހަރު އެންމެ ބޮޑު ކަންބޮޑުވުމަކަށް ވީ ކަމަކީ ބަޖެޓްގެ ދަތިކަމުގެ މައްސަލަ ކަމަށް އެލްޖީއޭ އިން ވަނީ ބުނެފައެވެ. ކައުންސިލްތަކުން ފާހަގަކުރި އިތުރު ކަންބޮޑުވުންތަކުގެ ތެރޭގައި ލޭންޑްޔޫސް ޕްލޭން އާއި ގުޅުން ހުރި ކަންކަން ހިމެނޭ ކަމަށާއި، އެ ކަންބޮޑުވުންތައް ހައްލު ކުރަން ކަމާއި ބެހޭ ފަރާތްތަކާއިއެކު މަޝްވަރާކުރާނެ ކަމަށް ވެސް ކައުންސިލްތަކުން ވަނީ ބުނެފައެވެ.
ފަނޯއްލަ ދަރުބާރަކީ ސަރުކާރުގެ 5 އަހަރުގެ ސްޓްރެޓީޖިކް އެކްޝަން ޕްލޭން (ސެޕް) ގެ ސިޔާސަތުތަކާއި ލާމަރުކަޒީ ޤާނޫނަށް ގެނެވުނު 8 ވަނަ އިސްލާހު ތަންފީޛުކުރުމަށް ހުރި ގޮންޖެހުންތައް ދެނެގަނެ، ޖުމްލަ ގޮތެއްގައި ލާމަރުކަޒީ ނިޒާމު ހިންގުމަށް ހުރި ދަތިތައް ފާހަގަކޮށް އެކަންކަމާ ގުޅޭގޮތުން މަޝްވަރާކޮށް، އެކަންކަން ހައްލުކުރުމަށް ކަމާގުޅޭ ފަރާތްތަކަށް ހުށަހެޅުމުގެ މަގްސަދުގައި ކުރިއަށް ގެންދާ ޕްރޮގްރާމެކެވެ.
އަދި ވިއަވަތި ރާއްޖެ އަކީ އަލަށް އިންތިޚާބުކުރި ކައުންސިލްތަކާއި، އ.ތ.މ ކޮމިޓީތަކާއެކު ރައީސުލްޖުމްހޫރިއްޔާ ބާއްވަވަމުން ގެންދަވާ ސިލްސިލާ މަޝްވަރާ ބައްދަލުވުންތަކެކެވެ. މިގޮތުން މި ފަހަރުގެ ކޮންފަރެންސްގައި ބައިވެރިވެފައި ވަނީ ރާއްޖޭގެ ދެކުނުގެ އަތޮޅުތައް ކަމަށްވާ ދ، ތ، ލ، ގއ، ގދ، ފުވައްމުލައް ސިޓީ އަދި އައްޑޫ ސިޓީގެ މޭޔަރުނާއި އަތޮޅު އަދި ރަށު ކައުންސިލްތަކުގެ ރައީސުންނާއި އަންހެނުން ތަރައްޤީއަށް މަސައްކަތްކުރާ ކޮމެޓީތަކުގެ މެމްބަރުންނެވެ.
