މުބާރާތުގެ އެންމެ މޮޅު އެތުލީޓުންނަށް ނާހިލްއާއި ޒާރާ

ބުރާސްފަތި ދުވަހު ނިމުނު "ގދ އަތޮޅު ކައުންސިލް އެތުލެޓިކްސް ޗެމްޕިއަންޝިޕް"ގެ އެންމެ މޮޅު އެތުލީޓުންނަށް އިބްރާހިމް ނާހިލް ނިޒާރުއާއި ޒާރާ އާދަމް ހޮވިއްޖެއެވެ.

މުބާރާތުގައި ނާހިލް ވަނީ އެންމެ މޮޅު ފިރިހެން އެތުލީޓުގެ މަގާމު ހޯދާފައެވެ. އެންމެ މޮޅު އަންހެން އެތުލީތަކަށް ހޮވުނީ ޒާރާއެވެ. މި ދެއެތުލީޓުންނަކީވެސް ގދ އަތޮޅު ތައުލީމީ މަރުކަޒުގެ ދަރިވަރުންނެވެ. މުބާރާތުގެ އެއްވަނަ ސްކޫލަކަށް ހޮވުނީ ގދ އަތޮޅު ތައުލީމީ މަރުކަޒެވެ.

މި މުބާރާތުގައި ނާހިލްއާއި ޒާރާ ވަނީ ބައިވެރިވި ހުރިހާ އިންޑިވިޖުއަލް އިވެންޓެއްގެ އެއްވަނަ ހޯދާފައެވެ.

ލިބުނު ކާމިޔާބީއާ ގުޅޭގޮތުން ވާހަކަދައްކަމުން ނާހިލް ބުނީ، މިއީ އޭނާ ކުރި ބުރަ މަސައްކަތުގެ ނަތީޖާކަމަށެވެ. އަދި ކުރިއަށް އޮތް މުބާރާތްތަކުގައިވެސް ގިނަ ކާމިޔާބީތަކެއް ހޯދަން ބޭނުންވާކަން ނާހިލް ފާހަގަކުރިއެވެ.

ރާއްޖެޓީވީއަށް ދިން އިންޓަރވިއުއެއްގައި ޒާރާ ބުނީ މިއީ އަދި އޭނާގެ ފެށުމެއް ކަމަށެވެ. އަދި ކުރިއަށް އޮތްތަނުގައި އެތުލެޓިކްސް ފީލްޑުގައި ގިނަ ކާމިޔާބީތަކެއް ހޯދަން ބޭނުންވާކަމަށް ޒާރާ ބުންޏެވެ. މި ކާމިޔާބީ ހޯދުމުގައި ޒާރާއަށް އެންމެ ބޮޑަށް އެހީތެރިވީ އޭނާގެ ކޯޗުންނެވެ.

މި މުބާރާތުގައި 24 ސްކޫލަކުން 800ށްވުރެ ގިނަ އެތުލީޓުން ވާދަކުރިއެވެ. މުބާރާތް ބާއްވާފައިވަނީ ގދ. ތިނަދޫގައެވެ.