ކައުންސިލްތަކުގެ ޕަރފޯމަންސް އިންޑެކްސްއަށް ދޭ ބުރަދަން އިތުރުވުމަކީ ލިބުނު ކުރިއެރުމެއް: ނިޔާޒް
ކައުންސިލްތަކުގެ ހިންގުން ހަރުދަނާ ކުރުމަށް ވިޔަވަތީގައި ގިނަ މަޝްވަރާތަކެއް ކުރި
ހުޅުމާލެ ދާއިރާގެ މެމްބަރު އަލީ ނިޔާޒް
ކައުންސިލްތަކުގެ ޕަރފޯމަންސް އިންޑެކްސްއަށް ދޭ ބުރަދަން އިތުރުވުމަކީ ލިބުނު ކުރިއެރުމެއް ކަމަށް ރައްޔިތުންގެ މަޖިލީހުގެ ލާމަރުކަޒީ ކޮމިޓީގެ މުގައްރިރު ޢަލީ ނިޔާޒު ވިދާޅުވިއެވެ.
ރާއްޖެޓީވީ އަށް ދެއްވި ބަސްތީގަތުމެއްގައި، ކައުންސިލްތަކުގެ ޕާފޯމެންސް އިންޑެކްސްއަށް ދޭ ބުރަދަން އިތުރު ކުރާ އިރު ލޯކަލް ގަވަމެންޓް އޮތޯރިޓީ، އެލްޖީއޭ އިން ދަރަޖަކުރާ ދަރަޖަކުރުންތަކެއް ހުންނާނެ ކަމަށް ނިޔާޒް ވިދާޅުވިއެވެ. މީގެ އިތުރުން ފިސްކަލް ފޯމިއުލާ، ނުވަތަ ފައިސާ ބޭނުން ކުރުމުގައި އަމަލުކުރާ ގޮތަށް ވެސް ބަލާނެ ކަމަށާއި އެއީ ރަނގަޅަށް މަސައްކަތް ކުރާ ފަރާތްތަކަށް ރަނގަޅު ބަޖެޓެއް ލިބިގެން ދާނެ ކަމަށް ނިޔާޒް ވިދާޅުވިއެވެ. އެހެންނަމަވެސް ޕަރފޯމަންސް އިންޑެކްސް އިތުރުކޮށް ބަޖެޓް އެކުލަވާލުމުން ނޫނީ އެކަމުގެ ސަބަބުން ބަޖެޓަށް އަންނަ ބުރަދަން ނޭނގޭނެ ކަން ނިޔާޒް ފާހަގަކުރެއްވިއެވެ. އެ ބަދަލާ އެކު ބަޖެޓުގެ ދަތިކަމާ މެދު ކައުންސިލްތަކުން ކުރާ ޝަކުވާއަށް ހައްލު ލިބޭނެ ކަމަށް އުންމީދުކުރައްވާ ކަމަށް ވެސް ނިޔާޒް ވިދާޅުވިއެވެ.
ޕަރފޯމަންސް އިންޑެކްސްއަކީ ކައުންސިލްތަކުގެ މަސައްކަތް ދެނެގަންނަ މިންގަނޑެވެ. ކައުންސިލްތަކަށް ބަޖެޓު ހަމަޖެއްސުމުގައި އެ ކައުންސިލްތަކުގެ މަސައްކަތް ހިނގާ މިންވަރަށް ބަލާނެއެވެ. ބަޖެޓް ދިނުމުގައި ޕަރފޯމަންސް އިންޑެކްސްއަށް ދޭ ބުރަދަން އިތުރުކުރަން ހުށަހެޅީ ނިމިދިޔަ ވިޔަވަތި މަހާސިންތާގައެވެ. އެ މަހާސިންތާގައި ކައުންސިލްތަކާއި ގުޅުން ހުރި ގިނަ މަޝްވަރާތަކެއް ވަނީ ކޮށްފައެވެ. އޭގެ ތެރޭގައި ކައުންސިލްތަކަށް ދޭ ބްލޮކް ގްރާންޓާއި، ކައުންސިލްތަކުގެ ހިންގުމާއި ގުޅުން ހުރި ކަންކަން އަދި ލޭންޑް ޔޫޒް ޕްލޭން ފަދަ ކަންކަން ހިމެނެއެވެ.
