ހުވަދުއަތޮޅު ތިނަދޫގައި މިހާރު ކުރިއަށް ގެންދާ "ގދ އަތޮޅު ކައުންސިލް އެތުލެޓިކްސް ޗެމްޕިއަންޝިޕް"ގައި 24 ޓީމަކުން ވާދަކުރެއެވެ. މީގެތެރޭގައި މުޅި ރާއްޖޭގެ އެކި ސަރަހައްދުތަކުން މުބާރާތުގައި ބައިވެރިވެފައިވާ ޓީމުތައް ހިމެނެއެވެ. 300ށްވުރެ ގިނަ އެތުލީޓުންނާއެކު ކުރިއަށްގެންދާ މި މުބާރާތް ނިމޭނީ ބުރާސްފަތި ދުވަހުއެވެ.

މުބާރާތުގެ މިހާތަނަށް ގިނަ އިވެންޓުތަކެއް ނިމިފައިވާއިރު, އެންމެ ގިނަ މެޑަލް މިހާތަނަށް ހޯދާފައިވަނީ މުބާރާތް ބާއްވާ ތިނަދޫއިންނެވެ. ތިނަދޫގެ ސްކޫލްތަކުން މިހާތަނަށް 36 މެޑަލް ހޯދާފައިވެއެވެ.

އޭގެތެރެއިން ތިނަދޫގައި ހުންނަ ގދ އަތޮޅު ތައުލީމީ މަރުކަޒުން މިހާތަނަށް މި މުބާރާތުގައި 21 މެޑަލް ވަނީ ހޯދާފައެވެ. އޭގެތެރޭގައި ހިމެނެނީ 9 ރަން މެޑަލްއާއި 6 ރިހި މެޑަލްގެ އިތުރުން 6 ލޯ މެޑަލްއެވެ.

އަތޮޅު ތައުލީމީ މަރުކަޒުގެ އަމާޒަކީ، މުބާރާތުގައި އެސްކޫލުން ވާދަކުރާ ދެ އުމުރުފުރާގެ ހަތަރު ތަށިވެސް ކާމިޔާބު ކުރުމެވެ. އަދި މުޅި މުބާރާތުގެ ރަންވަނަ ހޯދުމަށް މުޅި ޓީމު އޮތީ އެކުގައި އަޒުމު ކަނޑައަޅައިގެންނެވެ.

ގދ އަތޮޅު ތައުލީމީ މަރުކަޒުގެ އިތުރުން, ތިނަދޫ ސްކޫލްއިން ވަނީ 8 މެޑަލް ހޯދާފައެވެ. އަދި ތިިނަދޫގެ އަބޫބަކުރު ސްކޫލުން 7 މެޑަލް މިހާތަނަށް ހޯދާފައިވެއެވެ.

އެންމެ ގިނަ މެޑަލް މިހާތަނަށް ހޯދާފައިވާ ނާހިލް ނިޒާރަކީ އަތޮޅު ތައުލީމީ މަރުކަޒުގެ ދަރިވަރެކެވެ. ނާހިލް ވަނީ މިހާތަނަށް މުބާރާތުގައި 4 މެޑަލް ހާސިލްކޮށްފައެވެ. އެތުލެޓިކްސްގައި ނާހިލް ވިދާލީ މިއަހަރު އޮތް އިންޓަރ ސްކޫލް އެތުލެޓިކްސް ޗެމްޕިއަންޝިޕްގައެވެ. ނާހިލް ވަނީ އޭނާ ބައިވެރިވި ހުރިހާ އިވެންޓެއްގެ ރެކޯޑު އެމުބާރާތުގައި މުގުރާލާފައެވެ.

ތިނަދޫ ފިޔަވާ މުބާރާތުގައި އެންމެ ގިނަ މެޑަލް ކާމިޔާބުކޮށްފައިވަނީ ފުވައްމުލަކުގެ ސްކޫލުތަކުންނެވެ. އެއީ 4 ރަން މެޑަލް އާއި 6 ރިހި މެޑަލްގެ އިތުރުން 13 ލޯ މެޑަލްއެވެ. ތިންވަނައަށް އެންމެ ގިނަ މެޑަލް ހޯދި މުހައްމަދު ޖަމާލުއްދީން ސްކޫލުން ވަނީ 6 ރަން މެޑަލް އާއި 6 ރިހި މެޑަލްގެ އިތުރުން 3 ލޯ މެޑަލް ހާސިލްކޮށްފައެވެ.

ޓީމު އިވެންޓުތަކަށް ބަލާއިރު، އެންމެ ގިނަ ކާމިޔާބީތައް ހޯދާފައިވަނީ ގދ އަތޮޅު ތައުލީމީ މަރުކަޒުންނެވެ. ގދ އަތޮޅު ތައުލީމީ މަރުކަޒުން ވަނީ 4x200 މީޓަރު ދުވުމުގައި 17 އަހަރުން ދަށުގެ ފިރިހެން ޑިވިޝަނުން އެއްވަނަ، އަދި އަންހެން ޑިވިޝަނުން ދެވަނަ ހޯދާފައެވެ. މީގެ އިތުރުން މެޑްލޭ ރިލޭ 15 އަހަރުން ދަށުގެ އުމުރުފުރާގެ ފިރިހެން ޑިވިޝަނުން އެއްވަނަ އަދި އަންހެން ޑިވިޝަނުން ދެވަނަ ހޯދާފައިވެއެވެ.