މުބާރާތުގެ އިންތިޒާމުތަކަށް، ޓީމުތަކުގެ ބޮޑު ތައުރީފެއް
ޓީމުތަކަށް މަރުހަބާކިއުމުގެ އިންތިޒާމުތައް ހަމަޖައްސާފައިވާލެއް ފުރިހަމަކަންވެސް ޓީމުތަކުން ފާހަގަކުރި
ގދ އަތޮޅު ކައުންސިލް ޗެމްޕިއަންޝިޕް ކުރިއަށްގެންދާ ތިނަދޫ ސްޓޭޑިއަމް
މިހާރު ކުރިއަށްދާ ގދ އަތޮޅު ކައުންސިލް އެތުލެޓިކްސް ޗެމްޕިއަންޝިޕްގެ އިންތިޒާމުތަކަށް ޓީމުތަކުން ވަރަށް ބޮޑަށް ތައުރީފުކޮށްފިއެވެ.
މުބާރާތާ ދިމާކޮށް ގާތްގަނޑަކަށް ދެހާހެއްހާ މީހުން ވަނީ ތިނަދޫއަށް ދަތުރުކޮށްފައެވެ. މި ހުރިހާ ފަރާތްތަކަށް އެކޮމަޑޭޝަން ހަމަޖެއްސުމުގައިވެސް ރައުހަތު ސްޕޯޓްސް ކްލަބުން އިންތިޒާމުތައް ހަމަޖައްސާފައިވަނީ ވަރަށް ފުރިހަމައަށްކަމަށް ޓީމުތަކުން މައުލޫމާތުދެއެވެ.
މީގެ އިތުުރުން މުބާރާތުގައި ބައިވެރިވާ ޓީމުތަކަށް މަރުހަބާކިއުމުގެ އިންތިޒާމުތައް ހަމަޖައްސާފައިވާލެއް ފުރިހަމަކަންވެސް ޓީމުތަކުން ފާހަގަކުރިއެވެ. އަދި ހުރިހާ ކަމެއްގައިވެސް ޓީމުތަކާ ވަރަށް ގާތުން ރައުހަތު ސްޕޯޓްސް ކްލަބުން މަސައްކަތް ކުރާކަމަށް ޓީމުތަކުން ރާއްޖެޓީވީއަށް މައުލޫމާތުދެއެވެ.
ޓީމުތަކުން މައުލޫމާތުދޭގޮތުގައި މި މުބާރާތުގެ ސަބަބުން ޓީމުތަކުގެ އެތުލީޓުންނަށް ވަރަށް ބޮޑު ކުރިއެރުމެއް އަންނާނެއެވެ. އަދި މިފަދަ މުބާރާތްތައް ގިނައިން ބޭއްވުމަކީ އެތުލީޓުންނަށް ލިބޭ ކުރިއެރުމެއްގެގޮތުގައި ސްކޫލުތަކުން ފާހަގަކުރެއެވެ.
މިހާރު ކުރިއަށްދާ މި މުބާރާތުގައި 24 ސްކޫލަކުން ވާދަކުރެއެވެ. މުބާރާތް އިންތިޒާމުކުރުމަށް ގދ އަތޮޅު ކައުންސިލުން ހަވާލުކޮށްފައިވަނީ ރައުހަތު ސްޕޯޓްސް ކްލަބާއެވެ. މުބާރާތުގެ މީޑިއާ ޕާޓްނަރަކީ ރާއްޖެޓީވީއެވެ.
