އެންމެ ފުރަތަމަ އަންނަނީ ނުދަންނަ ނަންބަރަކުން ފޯނު ކޯލް އެކެވެ. އެއީ ބޭންކް އޮފް މޯލްޑިވްސް ނުވަތަ މިފަދަ ކޮންމެވެސް އެހެން އިދާރާއެއް ކަމަށް ބުނެއެވެ. އެދެނީ އަމިއްލަ ޒާތީ ބައެއް މައުލޫމާތު އެމީހުންނާ ހިއްސާ ކުރުމަށާއި، ބޭންކް އެކައުންޓުގެ ބައެއް މައުލޫމާތު ހިއްސާ ކުރުމަށެވެ. ނުވަތަ އެމީހުން ފޮނުވާ ލިންކަކަށް ފިއްތާލުމަށެވެ. އެމީހުން އެދޭ ކުޑަ ކުޑަ ކަމެއް ކޮށްލުމުން އެކައުންޓުގައި ހުރި ފައިސާކޮށްޅަށް ވީނުވީއެއް ނޭނގި ގެއްލިގެން ދެއެވެ. އެ ފައިސާ އަނބުރާ ހޯދުމަކީ ދަތި ކަމަކަށް ވެއެވެ.
އެފަދަ މީހުން އާންމުކޮށް ފޭރެނީ ބޭންކް އޮފް މޯލްޑިވްސްގައި ހުންނަ އެކައުންޓުތަކުންނެވެ. އޮޅުވާލައިގެން އާންމުންގެ އަތުން ފައިސާ ހޯދުމަށް ދުވާލެއްގެ މައްޗަށް އެތައް ހާސް ކޯލެއް ކުރާއިރު، މިފަދަ ކޯލުތަކަށް ސަމާލުވުމަށް ބީއެމްއެލްއިން ވަނީ އިލްތިމާސްކޮށްފައެވެ. މިގޮތުން ކާޑާއި އިންޓަރނެޓް ބޭންކިންގެ މައުލޫމާތު، އީމެއިލް އައިޑީގެ އިތުރުން އެއްވެސް ޒާތީ މައުލޫމާތެއް ހިއްސާ ނުކުރުމަށް ބީއެމްއެލްއިން ދަނީ ތަކުރާރުކޮށް އެދެމުންނެވެ. އަދި މިފަދަ ކޯލުތަކާމެދު އާންމުންގެ ހޭލުންތެރިކަން އިތުރުކުރުމަށް ބީއެމްއެލްއިން ގެންދަނީ މި ކަންކަމަށް ސަމާލުވުމަށް އެދި މެސެޖުވެސް ކުރަމުންނެވެ.
މަކަރާއި ހީލަތުން، އޮޅުވާލައިގެންނާއި، އަދިވެސް މިނޫން ގޮތްގޮތަށް މީހުންގެ އަތުން ފައިސާ ހޯދުމަކީ ޒަމާންތަކަކަށް ދެމިގެންގޮސްފައިވާ އިޖުތިމާއީ ބޮޑު މައްސަލައެކެވެ. މިކަން ހައްލުނުވެ މިހެން ދަމުންގޮސް، ބަދަލުވަމުންދާ ޒަމާނާ އެއްގޮތަށް މިކަން ކުރާ ގޮތަށް ނުވަތަ އެކަން ކުރާ މީހުން ގެންގުޅޭ އުކުޅުތަކަށްވެސް ބަދަލުތައް އަންނަމުންދެއެވެ. ސޯޝަލް މީޑިއާ ޕްލެޓްފޯމްތައް މެދުވެރިކޮށް މިކަން ކުރަމުންދެއެވެ. ފޭކު ކޯލުތަކުން ގޮސް، އެހީއަށް އެދުމުގެ ނަމުގައިވެސް މީހުންގެ އަތުން ބޮޑެތި އަދަދުން ފޭރެނީއެވެ. ކޮންމެވެސް ސީރިއަސް ބައްޔެއްޖެހިގެން އެހީއަށް އެދި ސޯޝަލްމީޑިޔާއަށް ލާފަ ހުންނަ ޕޯސްޓް ތައް ފަހުން ބަލާއިރު އެއީ "ފޭކް" ޕޯސްޓް ތަކަކަށް ވެސް ވެފަ އެބަ ހުއްޓެވެ. ފަހުން ގުޅަން އުޅެގެން ދީފަ ހުންނަ ނަމްބަރަކަށް ނުވެސް ގުޅެއެވެ.
ބޭންކް އޮފް މޯލްޑިވްސްގެ ޕަބްލިކް ރިލޭޝަންސް މެނޭޖަރ މުހައްމަދު ސަޢީދު ވިދާޅުވީ މަކަރާއި ހީލަތުން މީހުންގެ އަތުން އެކި އަދަދުން ފައިސާ ހޯދާ މިފަދަ މައްސަލަތައް ކޮންމެ ދުވަހަކު ވެސް ފެންމަތިވާ ކަމަށެވެ. ކޮންމެ މައްސަލައަކަށް ބަލާލާއިރު ވެސް މި އޮންނަނީ ކޮންމެހެން ކުރަން ނުޖެހޭ ފައިސާގެ މުއާމަލާތެއް ކުރުމުގެ ސަބަބުން އުފެދޭ މައްސަލައެކެވެ. އާންމު ގޮތެއްގައި މަކަރާއި ހީލަތުން ފައިސާ ހޯދުމަށް ގުޅާ ފަރާތްތަކުން އޮޅުވާލުމަށްޓަކައި ތަފާތު އުކުޅުތައް ބޭނުންކުރަމުންދާ ކަމަށާއި އެގޮތުން ކުރީގެ ރައްޓެއްސެއް ކަމަށް ބުނެ އޮޅުވާލައެވެ. ސަޕްލައި ކުރާ ކުންފުނީގެ ނަމުގައި ވެސް ގުޅައެވެ. އަދި ބޭންކުގެ ނަމުގައިވެސް ގުޅާ ކަމަށް ސައީދު ވިދާޅުވިއެވެ. މިއިން ކޮންމެ ނަމެއްގައި ގުޅި ކަމުގައިވިޔަސް، އަދި އެކި ވާހަކަތައް ދައްކައި އިތުބާރު ހޯދުމަށްފަހު އާޚިރުގައި މި އަތުލަނީ ފައިސާއެވެ.
ކަސްޓަމަރުންގެ ޒާތީ މައުލޫމާތު ހޯދަން އެއްވެސް ތަނަކުން ނުގުޅާނެއެވެ. އެހެންނެއް ނޫނެވެ. ތިމާ ޚިދުމަތަށް އެދިއްޖެނަމަ ފަހަރުގައި އެތަނަކުން އެއީ ކޮން މީހެއްކަން ޔަގީން ކުރުމަށް މައުލޫމާތު ހިއްސާކުރަން އެދިދާނެއެވެ. އެހެންނަމަވެސް ކާޑުގެ މައުލޫމާތާއި، ސެކިއުރިޓީ ކޯޑު ހޯދާކަށް ނުގުޅާނެއެވެ. އަދި ތިމާ ޚިދުމަތަކަށް ނޭދޭހާ ހިނދަކުވެސް އެމީހުން އެ މައުލޫމާތުތައް ހޯދާކަށް ނުގުޅާނެއެވެ. އެފަދަ ކޯލަކާ ދިމާވެއްޖެނަމަ ވަގުތުން ފުލުހުންނަށް ރިޕޯޓުކުރުމަށް އެފަރާތުން ވަނީ އިލްތިމާސް ކޮށްފައެވެ. އަދި މިފަދަ މަކަރުވެރިން ޖަހާ މަލީގައި ނުޖެހުމަށް އެންމެންވެސް މިކަމަށް ސަމާލުކަން ދިނުން ވަރަށް މުހިންމެވެ.
