ކުނޑި އަހުމަދު ސަލީމްގެ ނަމަކީ ދިވެހި ވޮލީބޯޅައިގެ އެންމެ ފަރިތަ އެއް ނަމަވެ. އެންމެ ޚިދުމަތްތެރި އެއް ނަމެވެ. އަދި ކޮންމެ މެނޭޖްމަންޓެއް އޮތަސް އެބަޔަކާއެކު ތަފާތެއް ނެތި މަސައްކަތްކުރާ މަދު ޚިދުމަތްތެރިންގެ ތެރެއިން އެކަކެވެ. ދިވެހި ވޮލީބޯޅައިގެ އެންމެ ތަޖުރިބާ ބޮޑު އެއް ރެފްރީއެވެ. އޭނާގެ ވޮލީބޯޅަ ރެފްރީކަމުގެ ކެރިއަރުގައި ގުނަމުން އެދަނީ 26 ވަނަ އަހަރެވެ.

1996 ވަނަ އަހަރު ކަށިގަނޑު ހިފައިގެން ވޮލީބޯޅަ ކޯޓަށް ނުކުތީ އެކަމަށް އޮތް ޝައުޤުވެރިކަމެއްގެ ސަބަބުން ނެޝަނަލް ވޮލީބޯޅަ ރެފްރީ ކޯސް ހަދައިގެންނެވެ. އެދުވަހުން ފެށިގެން މިއަދާ ހަމައަށްވެސް އޭނާގެ އޮތީ ޝައުޤެވެ. ވޮލީބޯޅައަށް އޮތް ލޯތްބެވެ. އެކަމުގައި ޤައުމީ ލެވެލްއެއް, އަތޮޅު ފެންވަރެއް އަދި ރަށު ފެންވަރެއް ތަފާތު ކުރުމެއް ނެތެވެ. ބައިނަލްއަޤްވާމީ މުބާރާތަކަސް ގޮވާލެވޭ ހިނދު ރާއްޖެ ތަމްސީލްކުރަން އެޤައުމެއްގައެވެ. ނުވަތަ އެމުބާރާތެއްގައެވެ. ރަށަކުން ގޮވާލައިފިނަމަ އެރަށެއްގައެވެ. މިއީ ކުނޑި އަހުމަދު ސަލީމްގެ ބަދަލުވެ އޮތް ޝައުޤެވެ. އޭނާގެ ޚިދުމަތަށް ގޮވާލެވޭ ލިބޭ އާމްދަނީއަކަށްވުރެ ބޮޑަށް އިސްވަނީ ޚިދުމަތުގެ ޝައުޤުވެރިކަމެވެ.  

ކަށިގަނޑާއެކު ބައިނަލްއަޤްވާމީ މެޗުތަކަށް އިންސާފްކުރުމުގެ ފުރުޞަތު ކުނޑި ސަލީމަށް ލިބުނީ 2010 ވަނަ އަހަރުއެވެ. އެފުރުޞަތު ހޯދަން ވޮލީބޯޅަ އިންޓަރނޭޝަނަލް ރެފްރީ ކޯސް ހެދީ 2007 ވަނަ އަހަރުއެވެ. އަދި އެއަހަރު މެޗު ހަމަކުރަން ލަންކާގައި އޮތް މުބާރާތަކަށް ގޮސް ބައިނަލްއަޤްވާމީ ދަތުރު ފެށިއެވެ.

މިދިޔަ 12 އަހަރުގެ ތެރޭގައި އިންޓަރނޭޝަނަލް ގިނަ މެޗުތަކަށް ކުނޑި އަހުމަދު ސަލީން ވަނީ އިންސާފްކޮށްފައެވެ. އޭގެތެރޭގައި ސާފް ގޭމްސް, އޭޝިޔަން ގޭމްސް, އިންޑިޔަން އޯޝަން އައިލެންޑް ގޭމްސް އަދި ބަނގްލަދޭޝްއާއި ނޭޕާލްގައި އޮތް މުބާރާތްތައް ހިމެނެއެވެ. އޭގެތެރެއިންވެސް ވަކިން ޚާއްޞަކޮށް ފާހަގަކޮށްލެވޭ ދެ މެޗެއް އޭނާގެ އެބައޮތެވެ.

އޭވީސީ ޗެލެންޖްކަޕް ފައިނަލްގައި ކުނޑި ސަލީމް އިންސާފްކުރީ އޮގަސްޓް މަހުއެވެ. އެއީ އެންމެ ފަހުން އޭނާ އިންސާފްކުރި ބައިނަލްއަޤްވާމީ މެޗެވެ. އެމެޗަށްފަހު އޭނާ ހުރީ އާއިލީ ބްރޭކެއްގައެވެ. އެކަމަކު އެބްރާކް ނިމޭއިރަށްވެސް ކޮންމެވެސް ރަށަކަށް ފުރަން ޖެހިދާނެކަމަށް ހުރީ ތައްޔާރަށެވެ. އަތޮޅުތަކުގައި އޮންނަ މުބާރާތްތަކަށްވެސް ދަނީ އޮތް ޝައުޤުވެރިކަމުގެ ބޮޑުކަމުންނެވެ. ރާއްޖޭގައި މޮޅު ވޮލީބޯޅަ ރެފްރީން ތިބިކަން ސަލީމް ފާހަގަކުރެއެވެ. އެކަމަކު އެ ރެފްރީންނަށް މަދީ ފުރުޞަތެވެ. ބައިނަލްއަޤްވާމީ މެޗުތަކަށް އިންސާފްކުރަން ލިބޭ ފުރުޞަތެވެ.

ރާއްޖޭގައި އޭވީސީ ހަތް ރެފްރީންނާއި, އިންޓަރނޭޝަނަލް ހަތަރު ރެފްރީންނާއި, ބީޗް ވޮލީބޯޅަ އިންޓަރނޭޝަނަލް ދެ ރެފްރީން މިހާރުވެސް އެބަތިއްބެވެ.

ކުނޑި ސަލީމްގެ ވޮލީބޯޅަ ރެފްރީކަމުގެ ކެރިއަރުގައި އެންމެ ބޮޑު އެހީތެރިކަމެއް ލިބުނީ އެސޯސިއޭޝަންގެ ކުރީގެ ރައީސް މުހައްމަދު ރިޔާޒުގެ ދައުރުގައެވެ. މިއަދު އޭނާ ހުރި ހިސާބަށް އައުމުގައި ރިޔާޒުއާއި އޭރުގެ މެނޭޖްމަންޓުން ލިބުނު އެހީ އޭނާ ފާހަގަކުރެއެވެ. އާއިލާގެ ސަޕޯޓާއި, ދަރިންގެ ހިތްވަރު ނުލިބޭނަމަ މިއަދު ހުރި ހިސާބަށް ނާދެވުނީސްކަމަށް ކުނޑި އަހުމަދު ސަލީމް ބުންޏެވެ. އަދިވެސް އޭނާ ހުރީ ހުއްޓާލާގޮތަކަށް ނޫނެވެ. ޚިދުމަތުގައި ކުރިއަށް ދިއުމުގެ ވިސްނުމާއި, ޒުވާން ރެފްރީންނަށް އެހީވުން ނޫން ވިސްނުމެއް އޭނާގެ ނެތެވެ.