ބާސެލޯނާއިން ގަވީގެ އެއްބަސްވުން އައުކުރަނީ

ސްޕެއިންގެ ބާސެލޯނާއަށް ކުޅެމުން އަންނަ އުމުރުން 18 އަހަރުގެ މިޑްފީލްޑަރު ގަވީގެ އެއްބަސްވުން އައު ކުރުމަށް އެ ޓީމުން ތައްޔާރުވެއްޖެ ކަމަށް މީޑިއާ ރިޕޯޓުތައް ބުނެފިއެވެ.

ސްޕެއިންގެ ބައެއް މީޑިއާތަކުގައި ރިޕޯޓުކޮށްފައިވާ ގޮތުން އެއްބަސްވުން އައުކުރުމާމެދު ބާސެލޯނާ އާއި ގަވީއާ ދެމެދު މިހާރު ވަނީީ އެއްބަސްވުމަކަށް އާދެވިފައެވެ. ދިގު މުއްތަކަށް ދެމިގެން ދިޔަ މަޝްވަރާތަކަށްފަހު ގަވީ ވަނީ ބާސެލޯނާއާއެކު އައު އެއްބަސްވުމެއްގައި ސޮއިކުރަން ޤަބޫލުވެފައި ކަމަށް ވެސް ރިޕޯޓުތައް ބުނެއެވެ. މީގެ އިތުރުން ރިޕޯޓުތައް ބުނާ ގޮތުގައި އެ އެއްބަސްވުމުގައި ދާދި އަވަހަށް ގަވީ ސޮއި ކުރާނެއެވެ.

އިތުރަށް ރިޕޯޓުތަކުގައި ބުނެފައިވާ ގޮތުން ގަވީ ހޯދުމަށް އެހެން ކުލަބުތަކުން މަސައްކަތް ކުރާ ކަމަށް ވާހަކަ ދެކެވެނަސް، އެކަމަށް ބާސެލޯނާގެ ޝައުޤުވެރިކަމެއް ނެތެވެ. އަދި ބާސެލޯނާއިން ބޭނުންވަނީ ގަވީ އެ ކުލަބުގައި މަޑުކުރުން ކަމަށް ވެސް ރިޕޯޓުތައް ބުނެއެވެ.

ޒުވާން ކުޅުންތެރިޔާ ބާސެލޯނާއަށް ގުޅުނީ 2021 ވަނަ އަހަރުއެވެ. އޭގެ ފަހުން އޭނާ ވަނީ މިހާތަނަށް އެ ޓީމަށް 53 މެޗު ކުޅެދީ، ދެ ލަނޑު ޖަހާފައެވެ. މީގެ އިތުރުން 2021 ވަނަ އަހަރުން ފެށިގެން ގަވީ އަންނަނީ ސްޕެއިންގެ ޤައުމީ ޓީމަސް ވެސް ކުޅެމުންނެވެ.