ސެކްޝުއަލް އެންހޭންސްމެންޓަށް ބޭނުންކުރާ މާމުއިއެއް މަނާކޮށްފި
8 ބާވަތެއްގެ މާމުއި ވިއްކުމާއި ބޭނުންކުރުން ވަނީ މަނާކޮށްފައި
ބޭނުންކުރުން މަނާކޮށްފައިވާ 8 ބާވަތުގެ މާމުއި
ސެކްޝުއަލް އެންހޭންސްމެންޓް އަދި އިރެކްޓައިލް ޑިސްފަންކްޝަނަށް ބޭނުންކުރާ މާމުއި ވިއްކުމާއި ބޭނުންކުރުން މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން މަނާކޮށްފިއެވެ.
އެމްއެފްޑީއޭއިން ބުނީ ސެކްޝުއަލް އެންހޭންސްމެންޓް އަދި އިރެކްޓައިލް ޑިސްފަންކްޝަނަށް ބޭނުންކުރާ ބޭހެއް ކަމަށްވާ "ޓެޑަލަފިލް" އަދި "ސިލްޑްނަފިލް" ހިމެނޭ މާމުއި ރާއްޖެ އެތެރެކޮށް ވިއްކަމުންދާކަން އެއޮތޯރިޓީއަށް ފާހަގަވެފައިވާކަމަށެވެ. މި އުފެއްދުންތަކަކީ ފުރޯޑުކޮށްގެން އުފައްދާފައިވާ އުފެއްދުންތަކެއް ކަމުގައި ޔުނައިޓެޑް ސްޓޭޓްސް ފުޑް އެންޑް ޑްރަގް އޮތޯރިޓީ (ޔޫއެސް އެފްޑީއޭ) އިން އެލާޓް ކޮއްފައިވާކަމަށް އެމްއެފްޑީއޭއިން ބުނެއެވެ.
އެމްއެފްޑީއޭއިން ވަނީ އެ ދެ ބާވަތް ހިމެނޭ 8 ބާވަތެއްގެ މާމުއިއެއްގެ މައުލޫމާތު އާންމުކޮށްފައެވެ.
އެހެންކަމުން ރައްކާތެރިކަމުގެ ފިޔަވަޅެއްގެ ގޮތުން މި އުފެއްދުންތައް ބޭނުންކުރުމާއި ވިއްކުން އެ އޮތޯރިޓީން ވަނީ މަނާކޮށްފައެވެ.
