ފުލުހުންނަށް ހަމަލާދިން މައްސަލައިގައި އިތުރު މީހަކު ހައްޔަރުކޮށްފި
12 ސެޕްޓެމްބަރު 2022 | ހޯމަ 14:563 ފުލުހަކަށް ހަމަލާދިނީ ހެންވޭރުގެ ގްރޫޕަކުންކަމަށް ސީޕީ ވިދާޅުވި
ފުލުހުންތަކެއް
މިދިޔަ ހުކުރު ދުވަހު 3 ފުލުހަކަށް ހަމަލާދިން މައްސަލައިގައި އިތުރު މީހަކު ހައްޔަރުކޮށްފައިވާކަމަށް މޯލްޑިވްސް ޕޮލިސް ސަރވިސްއިން ބުނެފިއެވެ.
އެ އިދާރާއިން ބުނީ، ކޯޓު އަމުރެއްގެދަށުން ހައްޔަރުކޮށްފައިވަނީ އުމުރުން 20 އަހަރުގެ ދިވެހި ފިރިހެނެއްކަމަށެވެ.
މި މައްސަލައިގައި މީގެ ކުރިންވެސް ވަނީ ދެ މީހަކު ހައްޔަރުކޮށްފައެވެ. އެއީ 20 އަހަރުގެ ދިވެހި ފިރިހެނަކާއި 18 އަހަރުގެ ދިވެހި ފިރިހެނެކެވެ. މި ދެމީހުން ހައްޔަރުކުރީ ފުލުހުންނަށް ހަމަލާދިނުމަށްފަހު ފިލަން އުޅެނިކޮށެވެ.
މި މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ޝަރީއަތް ނިމެންދެން ބަންދުގައި ބޭތިއްބުމަށް ވަނީ އަމުރުކޮށްފައެވެ.
މި ހާދިސާއާ ގުޅިގެން ކޮމިޝަނަރ އޮފް ޕޮލިސް މުހައްމަދު ހަމީދު މީގެ ކުރިން ވިދާޅުވީ، ފުލުހުންނަށް ހަމަލާދިނީ ހެންވޭރަށް ނިސްބަތްވާ ގުރޫޕަކުންކަމަށެވެ. އަދި މި ހަމަލާ ދިނުމުގައި ހަރަކާތްތެރިވި އިތުރު މީހުން ހައްޔަރުކުރައްވާނެ ކަމަށާއި، ފުލުހުންނަށް ދޭ މިފަދަ ހަމަލާގެ މައްސަަލަތައް ވަރަށް ސީރިއަސްކޮށް ނަންގަވާނެކަމަށް ސީޕީ ވިދާޅުވިއެވެ.
ފުރަތަމަ ހައްޔަރުކުރި ދެ މީހުންގެ ބަންދާމެދު ގޮތެއް ނިންމުމަށް ގާޒީ އިސްމާއީލް ޝަފީއު ނެރުއްވި އަމުރުގައި ވަނީ، އަނިޔާ ލިބުނު ފަރާތްތަކަށް ހަމަލާ ދިނުމުގައި ފަތިބުރިއާއި ގައު ފަދަ ތަކެތި ބޭނުންކޮށްފައިވާ ކަމަށާއި، އަނިޔާވެރިކަމާއެކު ހަމަލާދީފައިވާ ކަމަށެވެ.
