ރައުހަތު ސްޕޯޓްސް ކްލަބުން މުބާރާތް ރާވާފައިވަނީ ވަރަށް ފުރިހަމައަށް: މުންތަގިމް
މުބާރާތް ކުރިއަށްދާނީ މިއަންނަ ބުރާސްފަތި ދުވަހުގެ ނިޔަލަށް
އެތުލެޓިކްސް އެސޯސިއޭޝަންގެ ޖެނެރަލް ސެކްރެޓަރީ އަހުމަދު މުންތަގިމް
މިހާރު ކުރިއަށްދާ ގދ އަތޮޅު ކައުންސިލް އެތުލެޓިކްސް ޗެމްޕިއަންޝިޕްގެ ކަންތައްތައް، ރައުހަތު ސްޕޯޓްސް ކްލަބުން ރާވާފައިވަނީ ވަރަށް ފުރިހަމައަށް ކަމަށް މޯލްޑިވްސް އެތުލެޓިކްސް އެސޯސިއޭޝަންގެ ޖެނެރަލް ސެކްރެޓަރީ އަހުމަދު މުންތަގިމް ވިދާޅުވެއްޖެއެވެ.
މުންތަގިމް ވަނީ، މުބާރާތް ހުޅުވުމުގެ ރަސްމިއްޔާތުގައި ބައިވެރިވެވަޑައިގަންނަވާފައެވެ. މުބާރާތުގެ އިންތިޒާމުތައް ބައްލަވާލެއްވުމަށްފަހު ފޭސްބުކްގައި ކުރެއްވި ޕޯސްޓެއްގައި އޭނާ ވަނީ އިންތިޒާމުތަކުގެ ފުރިހަމަކަން ފާހަގަކޮށް, ކާމިޔާބު މުބާރާތަކަށް އެދިފައެވެ.
މި މުބާރާތް ހިންގުމަށް ގދ އަތޮޅު ކައުންސިލުން ހަވާލުކޮށްފައިވަނީ ރައުހަތު ސްޕޯޓްސް ކްލަބާއެވެ. މުބާރާތުގައި 24 ޓީމަކުން ވާދަކުރާނެއެވެ. ތިނަދޫގެ އިދާރާތައް ގުޅިގެން ޓީމުތަކަށް މަރުހަބާކިޔުންވެސް ވަނީ ވަރަށް ފުރިހަމަކޮށް ކުރިއަށް ގެންގޮސްފައެވެ.
މި މުބާރާތް ކުރިއަށްދާނީ މިއަންނަ ބުރާސްފަތި ދުވަހުގެ ނިޔަލަށެވެ.
