މި ސަރުކާރުން ނަގާފައިވާ ލޯނުތަކުގެ އިންޓްރަސްޓް ރޭޓުތައްވެސް ނިސްބަތުން ކުޑަ: އަމީރު

މި ސަރުކާރުން ނަގާފައިވާ ލޯނުތަކުގެ އިންޓްރަސްޓް ރޭޓުތައްވެސް ނިސްބަތުން ކުޑަކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަފުޅު ދައްކަވަމުން އަމީރު ވިދާޅުވީ، މަޖިލީހުން ބަޖެޓު ފާސްކޮށްފައިވަނީވެސް ބޭރުން ނަގާ ދަރަނީގެ ޕްލޭންއާއެކު ކަމަށެވެ. އެގޮތުން ބޭރުން 200 މިލިއަން ޑޮލަރު ހޯދާނެކަން ބަޖެޓުގައިވެސް ހިމަނާފައިވާނެކަމަށް މިނިސްޓަރު އަމީރު ވިދާޅުވިއެވެ. މިސާލެއްގެ ގޮތުން ގުޅީފަޅު ހިއްކަން ލިބުނު ލޯނަކީ އިންޓްރަސްޓް ރޭޓުވެސް ކުޑަކޮށް ލިބިފައިވާ ލޯނެއްކަން މިނިސްޓަރު ފާހަގަކުރެއްވިއެވެ.

އެގޮތުގެމަތިން ނަގާ ލޯނުތަކުގެ ތަފްސީލުތައްވެސް ޤާނޫނުގައިވާ ގޮތުގެ މަތިން ރައްޔިތުންގެ މަޖިލީހަށް ހިއްސާ ކުރައްވަމުން ގެންދަވާކަމަށް އަމީރު ވިދާޅުވިއެވެ. އެގޮތުން ލޯނާއި ގުޅޭ އެއްބަސްވުމުގައި ސޮއިކުރާތާ 30 ދުވަސް ތެރޭގައި އެ ތަފްސީލުތައް މަޖިލީހާ ހިއްސާ ކުރައްވަންޖެހޭކަމަށް މިނިސްޓަރު ވިދާޅުވިއެވެ.

މި ސަރުކާރު އައުމަށްފަހު ސޮއިކޮށްފައިވާ ލޯނު އެއްބަސްވުންތަކަކީ ނިސްބަތުން ލުއި އެއްބަސްވުންތަކެއްކަން ވެސް މިނިސްޓަރުގެ ވާހަކަފުޅުގައި ފާހަގަ ކުރެއްވިއެވެ. އެގޮތުން އެ ލޯނުތަކުގެ އިންޓްރަސްޓް ރޭޓުތައްވެސް ނިސްބަތުން ކުޑަކަމަށް އަމީރު ވިދާޅުވިއެވެ.

އަދި މިހާރު ނަގާފައިވާ ލޯނުތަކުގައި ލޯނު ދައްކަންޖެހޭ މުއްދަތުވެސް ދިގުކަމަށް މިނިސްޓަރު ވިދާޅުވިއެވެ.

މީގެއިތުރުން ރާއްޖެއިން ނަގާފައިވާ ލޯނުތައް ދެއްކޭނެ ކަމުގެ ޔަގީންކަން އެބަ އޮތް ކަމަށް މިނިސްޓަރު ވިދާޅުވެއެވެ.

މިނިސްޓަރު އަމީރު ވަނީ ދުނިޔޭގެ އިގްތިސާދަށް ކުރަމުންދާ ނޭދެވޭ އަސަރު ރާއްޖެއަށް ވެސް ކުރަމުންދާކަމަށް ވިދާޅުވެ، ރާއްޖެއަށް ވެސް އިގްތިސާދުގައި ދައުރުވާ ފައިސާ މަދުވުމުގެ މައްސަލަ ކުރިމަތިވެފައިވާ ކަމަށް ވިދާޅުވެފައެވެ.

އެހެންކަމުން ކޭޝްފްލޯ މެނޭޖުކޮށް، ޕަބްލިކް ސެކްޓަރު އިންވެސްޓްމެންޓްތައް މަޑުޖައްސާލުމުގެ ސިޔާސަތުތަކެއް މި ވަގުތު ސަރުކާރުން ގެންގުޅެމުންދާ ކަަމަށް އަމީރު ވިދާޅުވިއެވެ. އަދި ޕްރޮޖެކްޓްތައް ޓެންޑަރު ކުރުމުގެ މަރުހަލާތައް ފަށާނީ ރާއްޖެއަށް ދިމާވެފައިވާ ކޭޝްފްލޯގެ މައްސަލަ ހައްލުވުމުން ކަމަށް ވެސް އެމަނިކުފާނު ވިދާޅުވިއެވެ.

އިތުރު އައު ބޮޑު މަޝްރޫއެއް އަލުން ލޯނުނަގައިގެން ކުރިއަށް ގެންދިޔުމުގެ ވިސްނުމެއް ނެތްކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހްވެސް ވަނީ ވިދާޅުވެފައެވެ. ރައީސް ވިދާޅުވީ، އައު ބައެއް މަޝްރޫއުތައް ފެށުންވެސް މިހާރު މަޑުޖައްސާލާފައިވާކަމަށާއި، އޭގެ ތަފްސީލުތައް ސަރުކާރުން އާންމުކުރަމުން ދާނެކަމަށެވެ. ރައީސް ވިދާޅުވީ ރަޝިޔާ-ޔޫކްރޭންގެ ހަނގުރާމައިގެ ސަބަބުން މުޅި ދުނިޔޭގެ އިގުތިސާދަށްވެސް އެކަމުގެ އަސަރު ކުރަމުންދާއިރު ރާއްޖޭގެ އިގުތިސާދަށްވެސް އެކަމުގެ އަސަރު ކުރާނެކަމަށެވެ.