ދެން އެންމެ އަވަހަށް މުސާރައިގެ ކުރިއެރުން ގެންނާނީ ސިއްޙީ ދާއިރާއަށް: ރައީސް ޞާލިޙު

ދެން އެންމެ އަވަހަށް މުސާރައިގެ ކުރިއެރުން ލިބިގެންދާނީ ސިއްޙީ ދާއިރާގައި މަސައްކަތްކުރާ ފަރާތްތަކަށް ކަމަށް ރައީސުލްޖުމްހޫރިއްޔާ އިބްރާޙީމް މުހައްމަދު ޞާލިޙު ވިދާޅުވެއްޖެއެވެ.

މިހާރު ކުރިއަށްދާ ވިއަވަތި ރާއްޖެ މަހާސިންތާ ފެށުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ޞާލިޙު ވިދާޅުވީ އެކި ދާއިރާތަކުން ލިބޭ އާމްދަނީ ރަނގަޅުކުރުމަށް ސަރުކާރުން ޚާއްސަ އިސްކަމެއް ދެއްވާ ކަމަށެވެ. އެގޮތުން މިނިމަން ވޭޖް ނުވަތަ އެންމެ ކުޑަ މިނުން ދޭން ޖެހޭ އުޖޫރަ ކަނޑައަޅާ، އެ އުޖޫރަ ދޭން ފަށާފައިވަނީ އާއްމުންނަށް ރަނގަޅު އާމްދަނީއެއް ހޯދާދިނުމުގެ މަގްސަދުގައި ކަމަށް ވެސް ރައީސް ވިދާޅުވިއެވެ. މީގެ އިތުރުން ސިއްޙީ ނިޒާމާއި ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ ސިއްޙީ ދާއިރާ ކުރިއަރުވަން ކުރަން ޖެހޭ ކަންކަން އަދިވެސް އެބަހުރި ކަމަށެވެ. އަދި އެ ދާއިރާއިން ސްޕެޝަލިސްޓް ޑޮކްޓަރުންނާއި، މޮބައިލް ލެބޯޓްރީގެ ޚިދުމަތް ލިބެން ނެތް ދާއިރާތަކަށް އެ ޚިދުމަތްތައް ތައާރަފްކޮށް، ސިއްޙީ ދާއިރާ ހަރުދަނާކުރުމުގެ މަސައްކަތް ކުރައްވަމުންދާކަން ރައީސް ވަނީ ފާހަގަކުރައްވާފައެވެ.

އިތުރަށް ވާހަކަފުޅު ދައްކަވަމުން ރައީސް ވަނީ ލަމަރުކަޒީ ނިޒާމް ހަރުދަނާކުރުމަށް ސަރުކާރުން ކުރަމުންދާ މަސައްކަތްތަކަށް ވެސް އަލިއަޅުވާލައްވާފައެވެ. އެގޮތުން ލާމަރުކަޒީ ނިޒާމަކީ ބިލާހެއް ނޫންކަން މިހާރު ރައްޔިތުންނަށް އެނގޭނެ ކަމަށާއި މީގެ ކުރިން އަތޮޅުތެރޭގެ ހުރިހާ ކަމެއް ކުރިއަށް ގެންދިޔައީ މަރުކަޒުކޮށްގެން ކަމަށް ވެސް ރައީސް ވަނީ ފާހަގަކުރައްވާފައެވެ. މިހާރު އާރުޓީއެލްގެ ޒަރީއާއިން ރާއްޖޭގެ ރަށްތައް ގުޅާލެވިފައިވާކަން ފާހަގަކުރައްވާ ރައީސް ސާލިހު ވިދާޅުވީ އެއީ ހުރިހާ އެންމެންނަށް ދިރިހުރި އިގްތިސާދެއްގެ ފައިދާ ލިބޭ ކަމެއް ކަމަށެވެ. އަމާޒަކީ ވަށާ ޖެހޭ ޖަޒީރާ ދިރިއުޅުމެއް ހުރިހާ އެންމެންނަށް ހޯދާ ދިނުން ކަމަށް ރައީސް ޞާލިޙު ވިދާޅުވިއެވެ.

ވިއަވަތި ރާއްޖެ މަހާސިންތާގެ ރަސްމީ މަޝްވަރާތައް ފަށާފައި ވަނީ އާދިއްތަ ދުވަހު ހެނދުނެވެ. މި މަހާސިންތާ ދެ ދުވަހުގެ މުއްދަތަށް ކުރިއަށް ދާނެއެވެ. މި މަހާސިންތާގައި މައިގަނޑު ގޮތެއްގައި މަޝްވަރާކުރުމަށް ހަމަޖެހިފައި ވަނީ ހަރުކަށި ފިކުރާއި، ގޭންގު ކުށްތައް އަދި މަސްތުވާތަކެއްޗާއި ގުޅޭގޮތުންނެވެ.