ތިން ރަށެއްގެ ސްކޫލް އިމާރާތް ބޮޑުކުރުމަށް އެއްބަސްވުންތަކުގައި ސޮއިކޮށްފިއެވެ.

އެގޮތުން ވ.އަތޮޅު މަދަރުސާގެ މަލްޓިޕަރޕަސް ހޯލް އިމާރާތުގެ މަސައްކަތް ހަވާލުކުރުމުގެ އެއްބަސްވުމުގައި ކޭ އެންޑް އެފް ހޯލްޑިންގސް ޕްރައިވެޓް ލިމިޓެޑާއެކު ވަނީ ސޮއިކޮށްފައެވެ. މި މަސައްކަތް ހަވާލުކުރީ 365 ދުވަސް ތެރޭގައި ނިންމާގޮތަށެވެ. މިއީ 9,943,405.72 (ނުވަ މިލިއަން ނުވަ ލައްކަ ސާޅީސް ތިން ހާސް ހަތަރުސަތޭކަ ފަސް) ރުފިޔާއަށް ހަވާލުކޮށްފައިވާ މަޝްރޫއެކެވެ.

އދ.އަތޮޅު މަދަރުސާގެ 7 ކްލާސްރޫމް، އޭވީ ރޫމް އަދި މަލްޓިޕަރޕަސް ހޯލް އިމާރާތުގެ މަސައްކަތް ވަނީ ޔެސް މޯލްޑިވްސް ޕްރައިވެޓް ލިމިޓެޑާ ހަވާލުކޮށްފައެވެ. މި މަސައްކަތް ހަވާލުކުރީ 365 ދުވަސް ތެރޭގައި ނިންމާގޮތަށެވެ. މިއީ 18,996,432.01 (އަށާރަ މިލިއަން ނުވަ ލައްކަ ނުވަދިހަ ހަ ހާސް ހަތަރު ސަތޭކަ ތިރީސް ދެ) ރުފިޔާގެ މަޝްރޫއެކެވެ.

މީގެއިތުރުން ބ.ތުޅާދޫ ސްކޫލުގެ މަލްޓިޕަރޕަސް ހޯލް އިމާރާތުގެ މަސައްކަތްވެސް ވަނީ ބަޔަކާ ހަވާލުކޮށްފައެވެ. 365 ދުވަސްތެރޭގައި މަސައްކަތް ނިންމާގޮތަށް ހަވާލުކޮށްފައިވަނީ ބަދަހި އިންވެސްޓްމެންޓް ޕްރައިވެޓް ލިމިޓެޑާއެވެ. މިއީ 12,433,844.77 (ބާރަ މިލިއަން ހަތަރު ލައްކަ ތިރީސްތިން ހާސް އަށް ސަތޭކަ ސާޅީސްހަތަރު) ރުފިޔާގެ މަޝްރޫއެކެވެ.

ސްކޫލްތަކުގެ ޖާގަ އިތުރުކުރުމަށް އެޑިޔުކޭޝަން މިނިސްޓްރީން ކުރަމުންދާ މަސައްކަތުގެ ދަށުން 1150 ކްލާސްރޫމުގެ މަސައްކަތް މިހާރު ވެސް ކުރިއަށްދާ ކަމަށާއި 196 ކްލާސްރޫމް ނިމިފައިވާކަމަށް އެޑިޔުކޭޝަން މިނިސްޓްރީން ބުނެއެވެ.