މޫނު ބުރުގާ އަޅައިގެން ތިބޭ އަންހެނުންނަށް ފުރައްސާރަކުރުމަކީ އަޅާނުލާ ދޫކޮށްލެވޭނެކަމެއް ނޫން: އިމްރާން
އަޅައިގެން ހުރި ބުރުގާއަށް ވެސް ދަމައިގަތް ކަމަށް އެ އަންހެންމީހާ ބުނެފައިވޭ
ހޯމް މިނިސްޓަރު އިމްރާން އަބްދުﷲ
އަޅާފައި ހުންނަ ހެދުމާއި ގުޅުވައިގެން ފުރައްސާރަކުރުމަކީ ބަލައިގަނެވޭނެކަމެއް ނޫންކަމަށް ހޯމް މިނިސްޓަރު އައްޝެއިޚް އިމްރާން އަބްދުﷲ ވިދާޅުވެއްޖެއެވެ.
ހޯމް މިނިސްޓަރު މިހެން ވިދާޅުވީ މާލޭގެ މަޖީދީ މަގުން ހިނގާފައިދިޔަ އަންހެނަކާ ދިމާލަށް "ނިންޖާ" އޭ ބުނެ، މީހަކު ފޮށިފައިވާ މައްސަލައެއް ފެންމަތިވެފައި ވަނިކޮށެވެ.
މި ފޮށުން އަމާޒުވި އަންހެން މީހާ ކޮށްފައިވާ ޓްވީޓެއްގައި ބުނީ މަޖީދީ މަގުން ހިނގާފައި ގެއަށްދަނިކޮށް މީހަކު އައިސް އޭނާއާ ދިމާލަށް "އޭ ނިންޖާ"އޭ ގޮވައި ހަޅޭއްލެވީ ކަމަށެވެ. އަދި އަޅައިގެން ހުރި ބުރުގާއަށް ވެސް ދަމައިގަތް ކަމަށް އެ އަންހެންމީހާ ބުނެފައިވެއެވެ.
އެޓްވީޓާއި ގުޅިގެން ގިނަ ބަޔަކު ވަނީ މަގުމަތީގައި އެއްވެސް ރައްކާތެރިކަމެއްނެތްކަމަށް ބުނެ ކަންބޮޑުވުން ފާޅުކޮށްފައެވެ.
ކަންބޮޑުވުންތައް ފާޅުކުރަމުންދަނިކޮށް މިނިސްޓަރު އިމްރާން ކުރެއްވި ޓްވީޓެއްގައި ވިދާޅުވީ އަޅާފައި ހުންނަ ހެދުމާއި ގުޅުވައިގެން ފުރައްސާރަކުރުމަކީ ބަލައިގަނެވޭނެ ކަމެއް ނޫންކަމަށެވެ. ވަކިން ޚާއްސަކޮށް އިސްލާމީ މުޖުތަމައުއެއްގައި ނިގާބުވެގެން ތިބޭ އަންހެނުންނަށް ފުރައްސާރަކޮށް ގަޔަށް އަތްލުމަކީ އަޅާނުލާ ދޫކޮށްލެވޭނެކަމެއް ނޫންކަމަށެވެ.
މިނިސްޓަރު ވިދާޅުވީ މިފަދަ މައްސަލަތައް ހައްލުކުރުމަށް ޚާއްސަ އިސްކަމެއް ދެއްވާނެކަމަށެވެ.
މިނިސްޓަރު މިމޭރުމުން ޓްވީޓްކުރައްވާފައިވާއިރު މިމައްސަލަ ފުލުހުން ބަލަމުން އަންނަކަމެއް އަދި ސާފެއްނޫނެވެ.
މަގުމަތިން އަންހެނުންނަށް ފޮށޭ މައްސަލަތައް ދޭތެރެ ދޭތެރެއިން ފެންމަތިވާއިރު ބައެއް ފަހަރު އެފަދަ ވީޑިއޯތައް ސޯޝަލް މީޑިޔާއަށްވެސް ޕޯސްޓްކުރެއެވެ.
