ފަހު ވަގުތު ލަނދުޖަހާ ވަލަޑޮލިޑްއިން އަލްމޭރިއާ ބަލިކޮށްފި
6 ސެޕްޓެމްބަރު 2022 | އަންގާރަ 15:08ތާވަލުގެ 16 ވަނާގައި ވަލަޑޮލިޑް އޮތީ ހަތަރު ޕޮއިންޓާއެކު
ވަލަޑޮލިޑް އާއި އަލްމޭރިއާ ބައްދަލުކުރި މެޗުގެ ތެރެއިން
ސްޕެނިޝް ލީގުގައި ވަލަޑޮލިޑް އާއި އަލްމޭރިއާ ބައްދަލުކުރި މެޗުގެ ފަހު ވަގުތުގައި ލަނޑުޖަހާ ވަލަޑޮލިޑްއިން އަލްމޭރިއާ ބަލިކޮށްފިއެވެ.
ވަލަޑޮލިޑްގެ ދަނޑުގައި ކުޅުނު މި މެޗުން އެޓީމު މޮޅުވީ 1-0ންނެވެ. މެޗުގެ ފަހު ވަގުތުގައި ވަލަޑޮލިޑް މޮޅުކޮށްދިން ލަނޑު އެޓީމަށް ޖަހައިދިނީ ޝޮން ވޭސަމްއެވެ. އަލްމޭރިއާގެ ގޯލު ކުރިމައްޗަށް ހުރަސްވި ބޯޅަ ގޯލުގެ ދުރު ކަނަށް ފޮނުވާލައިގެން ޝޮންގެ ލަނޑު ކާމިޔާބުކުރީ މެޗުގެ 93 ވަނަ މިނެޓުގައެވެ.
މެޗުގެ ފުރަތަމަ ހާފުގައިވެސް ވަލަޑޮލިޑްގެ ސާޖިއޯ ގާޑިއޯލާ ލަނޑެއް ޖެހިއެވެ. ނަމަވެސް ރެފްރީވަނި އޮފްސައިޑު ކަމަށް ނިންމާ އެލަނޑު ބަލައިނުގަނެފައެވެ.
މި ނަތީޖާއާއެކު ތާވަލުގެ 16 ވަނާގައި ވަލަޑޮލިޑް އޮތީ ހަތަރު ޕޮއިންޓާއެކުއެވެ. ފައިދާ ގޯލާއެކު އަލްމޭރިއާ އޮތީ 13 ވަނާގައެވެ.
