ޝަރީއަތް ކުރިއަށް ގެންދަނީ ޚަބަރުތަކަށް ބަލައިގެނެއް ނޫން، ޤާނޫނުތަކަށް ބަލައިގެން: އިސްގާޒީ ޝަކީލް
އެމްއެމްޕީއާރުސީގެ ފައިސާ ޔާމީން ބޭނުންކުރެއްވީ 2013ގެ ރިޔާސީ އިންތިޚާބުގެ ދަރަނި އަދާކުރެއްވުމަށް
ކްރިމިނަލް ކޯޓުގެ އިސްގާޒީ އަހުމަދު ޝަކީލް
ފެލިދެއަތޮޅު އާރަށް ތަރައްގީކުރުމަށް ހިންގި މުއާމަލާތުގެ ތެރެއިން, މަގާމުގެ ނުފޫޒު ބޭނުންކުރައްވައިގެން ކުރީގެ ރައީސް އަބްދުﷲ ޔާމީން ރިޝްވަތު ނެންގެވިކަމަށް ތުހުމަތުކުރެވޭ މައްސަލައިގެ އަޑުއެހުމެއް ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި މައްސަލައިގައި މިހާރު ކުރިއަށްދަނީ ހެކިބަސް ނެގުމުގެ މަރުޙަލާއެވެ.
މި އަޑުއެހުމުގައި ޔޫސުފް ނައީމްގެ ދިފާއީ ވަކީލު ހަމްޒާ ލަތީފް ވަނީ ދައުލަތާއި އަބްދުﷲ ޒިޔަތުއާއެކު ވެފައިވާކަމަށް ބުނާ އިއުތިރާފު އެއްބަސްވުމަކާއި ގުޅޭގޮތުން ވާހަކަ ދައްކަވާފައެވެ. އޭނާ ވިދާޅުވީ، ދައުލަތުން ވެފައިވާ އިއުތިރާފު އެއްބަސްވުންތަކާމެދު ސުވާލު އުފެދޭ ކަންކަން އެބަހުރި ކަމަށެވެ. އެގޮތަށް ވިދާޅުވީ ރާއްޖޭގެ އޮންލައިން ނޫހެއްގައި އެކަމާ ގުޅޭގޮތުން ޝާއިއު ކޮށްފައިވާ ލިއުމަކާ ޙަވާލާދީއެވެ.
އެ ނޫހުގައި ރިޕޯޓު ކޮށްފައިވަނީ އެމްއެމްޕީއާރުސީގެ ހިޔާނާތުގެ މައްސަލަތަކަށް އެ ކުންފުނީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތު އެއްބަސްވެ ދައުލަތާ އެކު ހެދި އިއުތިރާފް އެއްބަސްވުން މިހާރު ބާތިލު ކޮށްފައިވާ ކަމަށެވެ.
ވަކީލު ހަމްޒާ ލަތީފް ވިދާޅުވީ، އެއީ ޤާނޫނު ނުދަންނަ އަދި އާދަޔާ ޚިލާފު އިއުތިރާފު އެއްބަސްވުމެއް ގޮތުގައި ސިފަ ކުރެވޭ ކަމަށެވެ.
އެ ފަރާތްތަކާއެކު ވެފައިވާ އިއުތިރާފު އެއްބަސްވުމުގެ ކޮޕީއެއް ދިފާއަށް ލިބުމުގެ ކުރިން ހެކިބަސް ނެގުމަށް އިއުތިރާޒު ކުރައްވާކަމަށް އޭނާ ވިދާޅުވިއެވެ.
މި އަޑުއެހުމުގައި ވާހަކަ ދައްކަވަމުން ރައީސް ޔާމީނުގެ ވަކީލު ޑރ މުޙައްމަދު ޖަމީލް އަހުމަދު ވިދާޅުވީ، އެކަމަށް ރައީސް ޔާމީނުގެ ފަރާތްޕުޅުންވެސް ތާއީދު ކުރައްވާ ކަމަށެވެ.
ޑރ ޖަމީލް ވިދާޅުވީ، ޚަސްމަކާ އަދާވަތްތެރިކަމެއް އޮތް މީހެއްގެ ހެކިބަސް ބަލައިނުގަނެވޭނެ ކަމަށް ހެއްކާބެހޭ ޤާނޫނުގައިވެސް ބަޔާން ކޮށްފައިވާ ކަމަށެވެ. ޑރ ޖަމީލް ވަނީ ފިނިފެންމާ ލޯންޗުކޮޅު ގޮއްވާލި ޙާދިސާއަށް އަލިއަޅުވާލައްވާފައެވެ.
އެހެންނަމަވެސް ހެއްކާބެހޭ އައު ޤާނޫނަށް އަދި އަމަލު ކުރާކަށް ނުފަށައެވެ.
އެކަމާ ގުޅޭގޮތުން ދައުލަތުގެ ވަކީލު ވިދާޅުވީ، ހެއްކާ ގުޅޭގޮތުން އިއުތިރާޒެއް ނެންގެވީ ނޫހެއްގައި ޝާއިއު ކޮށްފައިވާ ލިއުމަކާއި ގުޅިގެން ކަމަށާއި، އެ ލިއުމުގެ ސައްޙަކަން ނުވަތަ ނޫންކަން ކަށަވަރު ކުރުމެއް ނެތި އިއުތިރާޒެއް ނެގިދާނެކަމަށް ޤަބޫލު ނުކުރައްވާ ކަމަށެވެ.
ހެކިން ޤަބޫލު ނުކުރެވޭނެކަމަށް ބުނެ ހުށައެޅުން ހުށައަޅަން ޖެހޭނީ ޝަރީއަތުގެ ކުރީގެ މަރުޙަލާގައިކަން ފާހަގަ ކުރައްވައި ދައުލަތުގެ ވަކީލު ވިދާޅުވީ، މިހާރު ކުރިއަށްދާ ބަހުސްގެ ސަބަބުން ޝަރީއަތުގެ އަގުހުރި ވަގުތު ބޭކާރުވަމުންދާ ކަމަށެވެ.
ހެކިން ޤަބޫލު ނުކުރެވޭނެކަމަށް ބުނެ ޝަރީއަތުގެ މަރުޙަލާގައި ހުށައަޅަންޖެހޭ ފަދަ އައު ޙާލަތެއް ވުޖޫދުގައި ނެތްކަން ފާހަގަ ކުރައްވައި ދައުލަތުގެ ވަކީލު ވިދާޅުވީ، އެގޮތަށް ފުރުސަތު ދެވިއްޖެނަމަ ޝަރީއަތުގެ ނިޒާމުގެ ތަރުތީބު ރުޅާލެވިގެންދާނެ ކަމަށެވެ.
ދައުލަތުގެ ވަކީލު ވިދާޅުވީ، ޒިޔަތުއާއެކު ދައުލަތުން ވެފައިވާ އެއްބަސްވުމެއް މިވަގުތު ނެތް ކަމަށާއި، ވީއިރު ވަކި އެއްބަސްވުމެއްގެ ދަށުން ހެކިބަސް ދެނީކަމަށް ބުނެވޭކަށް ނެތް ކަމަށެވެ. ދައުލަތުން އެ ފަރާތްތަކަށް ޤާނޫނު ނުދަންނަ މަންފާއެއް ހޯދަދީފައިނުވާނެކަމަށް ވަކީލު ވިދާޅުވިއެވެ.
އެކަމާ ގުޅޭގޮތުން އިސްގާޒީ އަހުމަދު ޝަކީލު ވިދާޅުވީ، ޝަރީއަތް ކުރިއަށް ގެންދަނީ ޚަބަރުތަކަށް ބަލައިގެން ނޫން ކަމަށާއި، ޤާނޫނުތަކަށް ބަލައިގެން ކަމަށެވެ.
އިސްގާޒީ ޝަކީލު ވިދާޅުވީ، އެއީ މި މައްސަލައާއި ގުޅިގެން ހުށައެޅިފައިވާ އިއުތިރާފު އެއްބަސްވުމެއް ނޫންނަމަ، އެ އެއްބަސްވުމެއްގެ ސައްޙަކަން ކަނޑައެޅުމަކީ މި އަޑުއެހުމުގައި ކުރަންޖެހޭ ކަމެއް ނޫން ކަމަށެވެ.
އޭގެ އިތުރުން، ހެއްކަށް ބުރަދަން ދިނުމާއި ނުދިނުމާއި، ހެކީގެ އަދުލުވެރިކަން ފަދަ ކަންކަމަކީ ޝަރީއަތުން ފަހުން ގޮތް ނިންމާނެ ކަންކަން ކަމަށް އިސްގާޒީ ވިދާޅުވިއެވެ. ވުމާއެކު، އަދީބާއި ޒިޔަތުގެ ހެކިބަސް މި އަޑުއެހުމުގައި ނެންގެވުމަށް އިސްގާޒީ ނިންމެވިއެވެ.
