ބާޒާރުގައި ތަރުކާރީގެ ސަޕްލައި ހީނަރުވީ ފެންބޮޑުވުމުގެ ސަބަބުން، ތަރުކާރީގެ އަގުތައް ވަނީ 3 ގުނަ އުފުލިފައި
ޕާކިސްތާނުގެ ސަރުކާރުން ވަނީ ދަނޑުބިންތަކުގެ ބައެއް އުފެއްދުން ވިއްކޭނެ އަގުތައް ކަނޑައަޅާފައި، ނަމަވެސް ވިޔަފާރިވެރިން އެކަމަށް ދެނީ ބީރު ކަންފަތެއް
މޫސުމީ ގަދަ ވިއްސާރައިގެ ސަބަބުން ބޮޑެތި ގެއްލުންތަކަކާ ކުރިމަތިލާންޖެހިފައިވާ އަވަށްޓެރި ޕާކިސްތާނުގެ ބާޒާރުތަކުގައި މޭވާއާއި ތަރުކާރީގެ އަގުތައް އިންތިހާއަށް އުފުލިއްޖެއެވެ.
ތާރީޚު ނުދެކޭ ފަދަ ގަދަ ވިއްސާރައާ ކުރިމަތިވެ، ދަނޑުބިންތަކަށް ބޮޑެތި ގެއްލުންތަކެއް ކުރިމަތިވެ، ކާބޯތަކެތީގެ ސަޕްލައި ހީނަރުވެ، ބާޒާރުގައި އަގުތައް އުފުލުމާ ޕާކިސްތާނުގެ ރައްޔިތުންނަށް ކުރިމަތިލާންޖެހިފައި މިވަނީ، މާލީ ހީނަރުކަމުގެ ސަބަބުންވެސް ބޮޑެތި ގޮންޖެހުންތަކެއް ތަހައްމަލު ކުރަމުން ދަނިކޮށެވެ.
220 މިލިއަނެއްހާ މީހުންގެ އާބާދީއެއް އޮތް ޕާކިސްތާނުގެ ބާޒާރުތަކުގައި މިހާރުވެސް ތަކެތީގެ އަގު އުފުލޭ ނިސްބަތް ނުވަތަ އިންފްލޭޝަން ރޭޓް ހުރީ ރެކޯޑް މަތީ މިންވަރެއްގައެވެ. މިދިޔަ އަހަރުގެ ޖުލައިއާއި އަޅާ ބަލާއިރު މިއަހަރުގެ ޖުލައި މަހު، ބާޒާރުގައި މުދާ ވިއްކާ އަގުތައް ވަނީ ޖުމުލަ ގޮތެއްގައި 24.9 ޕަސެންޓް އުފުލިފައެވެ. އިގުތިސޯދު އޮތީ އިންތިހާ ފުން ކާރިސީ އަނދަވަޅެއްގައެވެ. ބޭރު ފައިސާގެ ރިޒާވް ހީނަރުވަމުން ދަނީ ފަތުއަޑުކިއާފައެވެ. އެމެރިކާ ޑޮލަރާ އަޅާ ބަލާއިރު ޕާކިސްތާނު ފައިސާ ނުވަތަ ރުޕީޒް އަގު ވެއްޓެމުން ދަނީ އިންތިހާ ހަލުވި މިނެއްގައެވެ.
އެފަދަ ފައްތަރެއްގައި ވަނިކޮށް ކުރިމަތިލާން ޖެހުނު މޫސުމީ ގަދަ ވިއްސާރައިގެ ސަބަބުން ލިބުނު އުމްރާނީ ގެއްލުންތަކުގެ އަގު، އެތައް ބިލިއަން ޑޮލަރަކަށް އަރާނެއެވެ. ޕާކިސްތާނަށް އިންތިހާއަށް މުހިންމު، ދަނޑުވެރިކަމުގެ ސިނާއަތަށްވެސް އެހާމެ ބޮޑަށް ގެއްލުންވެފައި ވާ ކަން ހަނދާން ނައްތާލެވޭކަށް ނެތެވެ.
ޕާކިސްތާނުގެ އިރުމަތީ ސިޓީއެއް ކަމަށްވާ ލާހޯރްއަކީ އިންތިހާ ފެންބޮޑުވުމުގެ ކާރިސާތަކުގައި ހިސާބަކަށް ދުރުގައި އޮތް ސަރަހައްދެއް ނަމަވެސް، ތަކުލީފުތައް ކުޑައެއް ނޫނެވެ. ތަރުކާރީގެ އަގުތައް ވަނީ 3 ގުނަ އުފުލިފައެވެ.
ޕާކިސްތާނުގެ ސަރުކާރުން ވަނީ ދަނޑުބިންތަކުގެ ބައެއް އުފެއްދުން ވިއްކޭނެ އަގުތައް ކަނޑައަޅާފައެވެ. ނަމަވެސް ވިޔަފާރިވެރިން އެކަމަށް ދެނީ ބީރު ކަންފަތެކެވެ.
ޓޮމާޓޯއާއި ފިޔައަކީ ޕާކިސްތާނުގެ ކޭމުގައި އެންމެ ގިނަ އަދަދަކަށް ބޭނުން ކުރާ 2 ބާވަތެވެ. މި 2 ބާވަތުގެ އެތައް ޓަނެއް ކޮންމެ މަހަކުވެސް އެ ޤައުމުގައި ބޭނުން ކުރެއެވެ.
އޮފިޝަލުން ވިދާޅުވާ ގޮތުގައި ފެންބޮޑުވުމުގެ ސަބަބުން، 2 މިލިއަން އޭކަރުގެ ދަނޑުބިމަށް ވަނީ ގެއްލުން ވެފައެވެ. އަދި އާ ގަސްތައް ހެއްދުމަށްވެސް ދަނޑުވެރިންނަށް ވަނީ ގޮންޖެހުންތަކާ ކުރިމަތިވެފައެވެ.
ލާހޯރްއާއި ތަންކޮޅެއް ދުރުން، މީހުންނަށް މަޖުބޫރުވެފައި ވަނީ ގެދޮރުގައި ބޮޑުވެފައިވާ ފެންގަނޑު ހިންދުމުގެ މަސައްކަތް ކުރުމަށެވެ. ދެން އޮތް ނާސްތާ ގަޑިއަށް ކާބޯތަކެތި ހަމަޖެހޭނެ ގޮތަކާ މެދު ފިކުރު ކުރަމުންނެވެ.
ޕާކިސްތާނުގެ މެދުތެރޭ ހިސާބުގެ ތަރުކާރީ ގުދަންތައް މިހާރު ދަނީ މުޅިންހެން ހުސްވަމުންނެވެ.
ޕާކިސްތާނުގެ ދަނޑުވެރިކަމުގެ ސިނާއަތަކީ އެ ޤައުމުގެ އިގުތިސޯދުގެ މުހިންމު ނާރެހެކެވެ. ޤައުމީ އުފެއްދުންތެރިކަމުގެ ނިސްބަތުގެ 5 ބައިކުޅަ 1 ބަޔަށް ވުރެ ބޮޑުބައެއް ދަނޑުވެރިކަމުގެ ސިނާއަތުން ހިއްސާ ކުރާ އިރު، މަސައްކަތު އާބާދީގެ 40 ޕަސެންޓް މީހުން އުޅެނީ އެ ސިނާއަތުގައެވެ. ދަނޑުވެރިކަމުގެ ސިނާއަތުން އަހަރެއްގެ މައްޗަށް 80 ބިލިއަނެއްހާ ޑޮލަރުގެ ތަކެތި އުފައްދައެވެ.
