ފުވައްމުލަކުގެ އެތެރޭގެ މަގުތައް ހެދުން: ރައްޔިތުންގެ ދިގު އިންތިޒާރުގެ ނިމުން!
6 ސެޕްޓެމްބަރު 2022 | އަންގާރަ 03:02އެމްޓީސީސީން އަންނަނީ މި މަސައްކަތް ޑިސެމްބަރުގެ ނިޔަލަށް ނިންމުމަށް މަސައްކަތް ކުރަމުން
އެމްޓީސީސީގެ ސީއީއޯ އާޒިމް (ވ) އާއި ފުވައްމުލައް ސިޓިގެ މޭޔަރު (ކ) ތާރު އަޅަން ފަށާފައިވާ މަގުގައި
13000 އެއްހާ މީހުންގެ އާބާދީއެއް އޮންނަ ފުވައްމުލައް ސިޓީއަށް ޒަމާނުއްސުރެ ދިމާވެފައި އޮތް އެންމެ ބޮޑު ކަންބޮޑުވުމަކީ އެ ރަށުގެ މަގުތަކުގެ މައްސަލައެވެ. ރަށުގެ މަގުތަކުގައި ހުސް ވަޅުގަނޑެވެ. ވާރޭ ވެހޭ ދުވަސްވަރެއް ނަމަ މުޅި ރަށް ފެންބޮޑުވެ، އުޅަނދުތައް ދުއްވުމަށާއި ހިނގާފައި އުޅެން ދަތިވެއެވެ. ކޮންމެ ސަރުކާރެއްގައި ވެސް އެ ރަށުގެ ރައްޔިތުން އެދެމުން އައި އެއް ކަމަކީ މިކަމަށް ހައްލެއް ހޯދައިދިނުމެވެ.
ފުވައްމުލަކުގެ މަގުތައް ޒަމާނީ ފެންވަރަށް ތަރައްގީ ކުރުމަށް މީގެ ކުރިން ވެސް ބަޔަކާ ހަވާލު ކުރިއެވެ. ނަމަވެސް އެ ރަށުގެ ރިންގްރޯޑުގެ މަސައްކަތް އެއްކޮށް ފުރިހަމަ ނުވަނީސް އެ މަސައްކަތް އޮތީ އެއްކޮށް ހުއްޓިފައެވެ. މި މަސައްކަތް އަލުން ކުރިއަށް ގެންދިޔުމަށާއި ރިންގްރޯޑުގެ ނުނިމި ހުރި މަސައްކަތް ފުރިހަމަ ކުރުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ހަވާލުކުރީ މިއަދުގެ ސަރުކާރުންނެވެ.
ބަނދަރުން ފެށިގެން ފުވައްމުލަކުގެ ތުނޑިއާ ހަމައަށް ގުޅާލާ މި މަގުގެ މަސައްކަތް މިހާރު އެމްޓީސީސީން ވަނީ ނިންމާލައިފައެވެ. އެ މަގުގެ މަސައްކަތް ނިމުމުން ލިބުނު ލުޔާއެކު ވެސް އެ ސިޓީގެ ރައްޔިތުން ތިބީ ހިތްހަމަޖެހިފައެވެ. އެއީ މިހާރު ފަސޭހަ ކަމާއެކު ރިންގރޯޑުގައި ދަތުރު ކުރެވޭތީއެވެ. ހަވީރު ވަގުތު ބޭރަށް ނުކުމެ އުޅުމަށާއި އެއަރޕޯޓާއި ބަނދަރަށް ދިއުމަށް ފަސޭހަވެގެން ދިއުމުގެ ސަބަބުންނެވެ.
އެމްޓީސީސީން މިހާރު މިވަނީ އެ ރަށުގެ އެތެރޭގެ 35 މަގެއްގައި ތާރު އެޅުމުގެ މަސައްކަތް ފަށައިފައެވެ. ސެޕްޓެމްބަރު މަހުގެ އެއްވަނަ ދުވަހު ތާރު އެޅުމުގެ މަސައްކަތް ރަސްމީކޮށް ފަށާފައިވާއިރު މި މަޝްރޫއުގެ ދަށުން 18.5 ކިލޯ މީޓަރުގައި ތާރު އަޅާނެއެވެ. މިއީ އެމްޓީސީސީން މިހާތަނަށް ކުރިއަށްގެންދާ މަގުހެދުމުގެ އެންމެ ބޮޑު މަޝްރޫއެވެ.
އެމްޓީސީސީގެ ސީއީއޯ އާދަމް އާޒިމް ވިދާޅުވީ އެ ކުންފުނިން މި މަސައްކަތް ކުރިއަށްގެންދިއުމުގައި އެންމެ ބޮޑު އިސްކަމެއް ދީފައިވާނީ ފުވައްމުލަކުގެ ރައްޔިތުންނާއި ސިޓީ ކައުންސިލުން ބޭނުންވާ ގޮތަށް މަސައްކަތް ކުރިއަށްގެންދިއުމަށް ކަމަށެވެ. މިއީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ބޭނުންފުޅުވާގޮތް ކަމަށާއި ރައްޔިތުން ބޭނުންވާ ކަންކަމަށް ބަލައި ޕްރޮޖެކްޓަށް ބަދަލުތައް ގެނައި ކަމަށް ވެސް އާޒިމް ފާހަގަކުރެއްވިއެވެ.
އާޒިމް ވިދާޅުވީ އެމްޓީސީސީން މަސައްކަތް ކުރަނީ ވީހާވެސް އަވަހަށް މި މަސައްކަތް ނިންމައި ރައްޔިތުންނަށް އޭގެ ފަސޭހަކަން ހޯދައިދިނުމަށް ކަމަށެވެ. އެގޮތުން، 200 އަށްވުރެ ގިނަ މުވައްޒަފުން އެ ޕްރޮޖެކްޓުގައި މަސައްކަތް ކުރާ ކަމަށާއި ބޭނުންވާ ހުރިހާ އިކުއިޕްމަންޓާއި މެޓީރިއަލް ލިބެމުންދާކަން ވެސް އޭނާ ފާހަގަކުރެއްވިއެވެ. އަދި މިހާރު ހަވާލުކޮށްފައިވާ ހުރިހާ މަސައްކަތެއް މި އަހަރު ނިމުމުގެ ކުރިން ނިންމުމަށް މަސައްކަތް ކުރަމުން އަންނަ ކަމަށް ވެސް އާޒިމް ވިދާޅުވިއެވެ.
މި ޕްރޮޖެކްޓާ ގުޅޭގޮތުން ފުވައްމުލައް ސިޓީ ކައުންސިލްގެ މޭޔަރު އިސްމާއިލް ރަފީގް ވިދާޅުވީ އެ ސިޓީގެ މަގުތަކަކީ ޒަމާނުއްސުރެ އަޑިގުޑަން ބޮޑު މަގުތަކެއް ކަމަށެވެ. މީގެ ސަބަބުން ރަށުގެ ބައެއް ރައްޔިތުންނަށް ސިއްޙީ ގޮތުން ވެސް ދަތިތަކާ ކުރިމަތިވާކަން އޭނާ ފާހަގަކުރެއްވިއެވެ. އެގޮތުން އެ މަގުތަކުގައި ދުއްވުމުގެ ސަބަބުން މައިބަނދައިގައި ރިއްސުންފަދަ ކަންކަން ދިމާވެ ރައްޔިތުންގެ ކަންބޮޑުވުންތައް ލިބޭކަމަށް މޭޔަރު ވިދާޅުވިއެވެ.
މޭޔަރު ވިދާޅުވީ އެ ރަށުގެ އެތެރޭގެ މަގުތައް ހެދުމުގެ ސަބަބުން ރަށުގެ ކުރިއެެރުމަށް ވެސް ވަރަށްބޮޑަށް އެހީވާނެ ކަމަށެވެ. އެގޮތުން، މަގުތައް ހުރި ހާލަތުގެ ސަބަބުން ރަށު ތެރޭގެ ހުރި ފިހާރަތަކަށް މީހުން ނުދާ ކަމަށާއި ނަމަވެސް އެ މަގުތައް ރަނގަޅު ފެންވަރަކަށް ހެދުމުން އެ ފިހާރަތަކަށް ވެސް ފައިދާވެ ރަށުގެ އިގްތިސާދު ރަނގަޅުވެގެންދާނެ ކަން ފާހަގަކުރެއްވިއެވެ.
ފުވައްމުލައް ސިޓީގެ އެތެރޭގެ މަގުތައް ހެދުމުގެ މަސައްކަތުގެ ދަށުން ފުރަތަމަ ތަރައްގީ ކުރާ 35 މަގުގެ ތެރޭގައި ހިމެނެނީ ސްކޫލްތަކާއި ހޮސްޕިޓަލާއި އަދި އެހެނިހެން މުހިންމު ޚިދުމަތް ފޯރުކޮށްދޭ ތަންތަން ހިމެނޭ ސަރަހައްދުތަކާއި ރަށުގެ އެންމެ ބޮޑެތި މަގުތަކެވެ.
ފުވައްމުލައް ސިޓީ އިން "ރާއްޖެ ޓީވީ" އާ ވާހަކަދެއްކި ބައެއް ފަރާތްތަކުން ފާހަގަ ކުރާ ގޮތުގައި މި މަސައްކަތަކީ އެ ރަށުގެ ހުރިހާ ރައްޔިތުންވެސް ވަރަށް ބޭނުންވެފައި ތިބި މަސައްކަތެކެވެ. އެގޮތުން، މަގުތަކުގައި ދަތުރުކުރާއިރު މިހާރު ގިނަ ދަތިތަކާ ކުރިމަތިލާން ޖެހޭއިރު ތާރު އެޅުމުން އެ ހުރިހާ ދަތިތަކަށް ހައްލު ލިބިގެންދާނެ ކަމަށް ރައްޔިތުން ފާހަގަކުރެއެވެ.
ފުވައްމުލައް ސިޓީގެ އެތެރޭގެ މަގުތައް ހެދުމުގެ މަސައްކަތް ސަރުކާރުން އެމްޓީސީސީއާ ހަވާލުކޮށްފައިވަނީ 331.05 މިލިއަން ރުފިޔާއަށެވެ. މި މަޝްރޫއުގެ ދަށުން ސަބްބޭސް ތައްޔާރު ކުރުމާއި ދުވާރު ހެދުމާއި މަގުމަތީ ނިޝާން ހަރުކުރުމާއި މަގުބައްތި ހަރުކުރުމާއި ފެންހިންދާ ނިޒާމު ގާއިމް ކުރުމުގެ މަސައްކަތް ވެސް އެމްޓީސީސީން ކުރާނެއެވެ.
