ދެވަނަ މެޗުގައި ރާއްޖެއިން ޖަޕާން ބަލިކޮށްފި

މިހާރު ކުރިއަށްދާ އޭޝިއަން ނެޓްބޯޅަ ޗެމްޕިއަންޝިޕްގައި ރާއްޖެއިން ޖަޕާން ބަލިކޮށްފިއެވެ.

ރާއްޖެ ހިމެނުނު ގްރޫޕްގައި އޮތީ ރާއްޖޭގެ އިތުރުން ސިންގަޕޫރާއި ޖަޕާނެވެ. ގްރޫޕްގެ ފުރަތަމަ މެޗުގައި ރާއްޖެއިން ވަނީ 96-10ން، ވަރުގަދަ ސިންގަޕޫރު އަތުން ބަލިވެފައެވެ.

ގްރޫޕްގެ ދެ ވަނަ މެޗުގައި ރާއްޖެއިން ވަނީ ހޯމަ ދުވަހު ޖަޕާން ބަލިކޮށްފައެވެ. އެ މެޗު ރާއްޖެއިން ކާމިޔާބުކުރީ 56-21ންނެވެ. މެޗު ފަށައިގެން ރާއްޖެއިން އައީ ރަނގަޅަށް ކުޅެ، ލީޑްކުރަމުންނެވެ. މެޗުގެ ފުރަތަމަ ދެ ކުއާޓަރ ނިމުނުއިރު ރާއްޖެއިން ލީޑްކުރަމުން ދިޔައީ 28-7ގައެވެ.

ޖުމުލަ 11 ގައުމަކުން ވާދަކުރާ މި މުބާރާތް ކުރިއަށްދާނީ ސެޕްޓެމްބަރު މަހުގެ 11އާ ހަމައަށެވެ. މުބާރާތުގައި ވާދަކުރާ ގައުމުތަކަކީ: ރާއްޖެ، ސްރީލަންކާ، އިންޑިއާ، ސިންގަޕޫރު، މެލޭޝިއާ، ފިލިޕީންސް، ޖަޕާން، ޗައިނީސް ތައިޕޭ، ބުރުނާއި، ހޮންގކޮންގ އަދި ތައިލެންޑެވެ.