ސިނަމާލޭގެ ބްރިޖަށް ދިވެހި ދައުލަތުން ޚަރަދު ކުރި އަގު ޝިޔާމްގެ ހިސާބުން ކުޑަވެއްޖެ

ކުރީގެ ރައީސް އަބްދުﷲ ޔާމީންގެ ވެރިކަމުގައި މާލެއާއި ހުޅުމާލެއާއި ދޭތެރޭގައި އެޅި ސިނަމާލޭ ބްރިޖަށް ދައުލަތުން ކުރި ހަރަދު ނައިފަރު ދާއިރާގެ މެންބަރު އަހުމަދު ޝިޔާމުގެ ހިސާބުން ކުޑަވެއްޖެއެވެ.

ގްރީން ޓެކްސްގެ މައްސަލަ ހައްލުކުރުމަށް ހުށަހަޅާފައިވާ ބިލަށް ވާހަކަފުޅު ދައްކަވަމުން މެންބަރު ޝިޔާމް ވިދާޅުވީ ރައީސް ޔާމީންގެ ސަރުކާރުން ބްރިޖެއް އަޅާފައިވާ ކަމަށާއި، އެކަމަށް ޚަރަދުވީ 67 މިލިއަން ޑޮލަރު ކަމަށެވެ.

Advertisement

ޝިޔާމް ވަނީ މާލެއާއި ހުޅުލެއާއި ދެމެދު އަޅާފައިވާ 1 ކިލޯމީޓަރުގެ ބްރިޖާއި، މާލެއާއި ތިލަފުއްޓާ ދެމެދު އަޅާ 6 ކިލޯމީޓަރުގެ ބްރިޖު އަޅާ ކިޔުއްވާފައެވެ. އަދި ސިނަމާލޭ ބްރިޖާއި ތިލަމާލެ ބްރިޖުގެ އަކަމީޓަރަށް ބެލުމަށް ވެސް މެމްބަރުގެ ވާހަކަފުޅުގައި އެދިވަޑައިގެންނެވިއެވެ. އަދި ދައުލަތުގެ ފައިސާ ނެތް ކަމަށާއި، ރައީސް އިބްރާހިމް މުހައްމަދު ސާލިޙް ބޭނުންފުޅުވާ ގޮތަކަށް، ބޭނުންފުޅުވާ ބަޔަކަށް ބަހަމުންދާ ކަމަށް ވެސް ވަނީ ތުހުމަތުކުރައްވާފައެވެ.

ކުރީ ސަރުކާރުން ޗައިނާ ކޮމިނިއުކޭޝަން އެންޑް ކޮންސްޓްރަކްޝަން ކޮމްޕެނީ (ސީސީސީސީ) އިން ހެދި "ސިނަމާލޭ ބްރިޖް"ގެ މަސައްކަތަށް 200 މިލިއަން ޑޮލަރު ޚަރަދު ވާއިރު އޭގެ ތެރެއިން 116 މިލިއަން ޑޮލަރަކީ ޗައިނާ ސަރުކާރުގެ ހިލޭ އެހީއެވެ. އަދި 72 މިލިއަން ޑޮލަރަކީ ޗައިނާ ސަރުކާރުން ދީފައިވާ ލޯނެވެ. މި މަޝްރޫއަށް ދިވެހި ސަރުކާރުން 12 މިލިއަން ޑޮލަރު ހަރަދުކޮށްފައިވެއެވެ. ޖުމްލަ ލޯނާއި ސަރުކާރުން ހަރަދު ކޮށްފައިވަނީ 84 މިލިއަން ޑޮލަރެވެ.

ސިނަމާލޭ ބްރިޖަކީ 1.39 ކިލޯ މީޓަރުގެ ބްރިޖެކެވެ. އަދި މި ބްރިޖަށް 200 މިލިއަން ޑޮލަރު ހަރަދުކޮށްފައިވާ އިރު، މި ސަރުކާރުން އަޅާ ތިލަމާލެ ބްރިޖަކީ 6.7 ކިލޯ މީޓަރުގެ ބްރިޖެކެވެ. މިއީ 500 މިލިއަން ޑޮލަރުގެ މަޝްރޫއެކެވެ. މި މަޝްރޫޢު ކުރިއަށް ގެންދަނީ އިންޑިއާ ސަރުކާރުން ދޭ 100 މިލިއަން ޑޮލަރުގެ ގްރާންޓާއި 400 މިލިއަން ޑޮލަރުގެ ލައިން އޮފް ކްރެޑިޓްގެ ދަށުންނެވެ.

ދެ ބްރިޖްގެ ފަރަގަށް ބަލާއިރު ތިލަމާލެ 6.7 ކިލޯ މީޓަރުގެ ބްރިޖަށް 500 މިލިއަން ޑޮލަރު ހަރަދުވާ އިރު، މިއީ ބްރިޖުގެ މުޅި ދިގުމިނަށް ބަލާއިރު، ކިލޯ މީޓަރަކަށް ގާތްގަނޑަކަށް 74.62 މިލިއަން ޑޮލަރެވެ. އެއީ ލޯނާއި ގްރާންޓް ހިމެނޭހެން ހިސާބު ހެދުމުން ޖެހޭ މިންވަރެވެ. 3 ބްރިޖް ވަކިވަކިން ބެލި ނަމަވެސް، ބްރިޖަކަށް ގާތްގަޑަކަށް އަރާނީ 166.6 މިލިއަން ޑޮލަރެވެ. އެއީ ލޯނާއި ހިލޭ އެހީއާއެކުއެވެ. ނަމަވެސް ސިނަމާލެ ބްރިޖަށް އެކަނި 200 މިލިއަން ޑޮލަރު ހަރަދުކޮށްފައިވެއެވެ. އެއީ ލޯނާއި ހިލޭ އެހީ ހިމެނޭހެންނެވެ. މިއީ 1.39 ކިލޯމީޓަރުގެ ބްރިޖެކެވެ. މާލެއާއި ވިލިމާލެއާއި ދެމެދު އަޅާ ބްރިޖުގައި ވެސް ގާތްގަނޑަކަށް ހުންނަނީ މި ދިގުމިނެވެ. އެހެންކަމުން ކިލޯ މީޓަރަކަށް ޖެހޭ އަދަދަށް ބަލާއިރު، 125.38 މިލިއަން ޑޮލަރު ކިލޯމީޓަރަކުން އަގުހެޔޮވެއެވެ.