މިނީ ބަހުގެ ޚިދުމަތް ފަށައިފި
5 ސެޕްޓެމްބަރު 2022 | ހޯމަ 02:38ދަތުރުގައި އެމްޓީސީސީގެ ސީއީއޯ އާދަމް އާޒިމް ވެސް ބައިވެރިވެވަޑައިގެންނެވި
މިނީ ބަހުގެ ޚިދުމަތް ފެށުން
މާލެސިޓީގައި މިނީ ބަހުގެ ޚިދުމަތް ފަށައިފިއެވެ.
ހޯމަ ދުވަހުގެ 05:45 ގައި މި ޚިދުމަތް ފަށާފައިވާއިރު ރާއްޖެއެމްވީއަށް މައުލޫމާތު ދެއްވަމުން އެމްޓީސީސީގެ ސީއީއޯ އާދަމް އާޒިމް ވިދާޅުވީ ޙިދުމަތް ފަށައިގަނެވުނީ ވަރަށް ރަނގަޅަށް ކަމަށެވެ. އަދި އެ ދަތުރުގައި އޭނާ ވެސް ބައިވެރިވެވަޑައިގެންނެވި ކަމަށާއި ޚިދުމަތް ފެށުމާއެކު އާންމުން ބަހަށް އަރަން ފަށައިފި ކަމަށެވެ. އަދި އާންމުން ވެސް ފަރާތުން ލިބެމުން އަންނަ ތަރުހީބު ވެސް ރަނގަޅު ކަމަށް އާޒިމް ވިދާޅުވިއެވެ.
މާލޭގައި މިނީ ބަހުގެ ޚިދުމަތް ދެނީ ތިން ރޫޓަކުންނެވެ. އެއީ އަމީނީ ރޫޓް, ސޯސަސް ރޫޓް އަދި އޯކިޑް ރޫޓް މެދުވެރިކޮށެވެ. އަދި ކޮންމެ ރޫޓެއްގައި ޖުމުލަ 40 ބަސް ހުއްޓި ހުންނާނެއެވެ.
އެމްޓީސީސީން ބުނީ, މިނީ ބަހުގެ ޚިދުމަތުގައި ޖުމުލަ 18 ބަސް ބޭނުންކުރާނެ ކަމަށެވެ. އޭގެ ތެރެއިން އަށް ބަހަކީ ޚާއްސަ އެހީއަށް ބޭނުންވާ މީހުންނަށް ފަސޭހައިން އަރާފޭބޭ ގޮތަށް ރޭމްޕް އަދި ފުރޮޅުލީ ގޮނޑިއަށް ޚާއްސަ ޖާގަ އެކުލެވޭ ބަސްތަކެއް ކަމަށް ބުންޏެވެ.
ޚާއްސަ އެހީއަށް ބޭނުންވާ މީހުންނަށް ޚާއްސަކޮށްފައިވާ ބަސްތަކުގައި 20 ގޮނޑި ހުންނާނެ އެވެ. ރޭމްޕް ހަރުކުރެވިފައި ނުހުންނަ ބަސްތަކުގައި ހުންނާނީ 22 ގޮނޑިއެވެ. މި ދެވައްތަރުގެ ބަހުގައިވެސް އިތުރަށް 10 މީހުންނަށް ކޮޅަށް ތިބެ ދަތުރުކުރުމަށް އަތުން ހިފަހައްޓާނެ ހޭންޑްލް ހުންނާނެއެވެ.
އެމްޓީސީސީން ބުނީ, މާލޭ މިނީ ބަހުގެ ޚިދުމަތް ހަފުތާގެ ކޮންމެ ދުވަހަކު, ހެނދުނު 5:45 އިން ރޭގަނޑު 12:15 އަށް ލިބޭނެ ކަމަށެވެ. އަދި އެ ޚިދުމަތް ކޮންމެ ބަސްހުއްޓިއަކަށް 10 މިނެޓާއި 15 މިނެޓާ ދޭތެރޭ ވަގުތެއްގައި ލިބޭނެ ކަމަށް އެމްޓީސީސީއިން ބުނެއެވެ.
މިނީ ބަހުގެ ޚިދުމަތް ފަށާފައިވާއިރު ފުރަތަމަ ދެ ހަފުތާގައި ހިލޭ ދަތުރުކުރެވޭނެއެވެ. އެ މުއްދަތު ހަމަވުމުން ދެން ދަތުރުކުރެވޭނީ އާރުޓީއެލް ވެބްސައިޓް އަދި އެޕްލިކޭޝަން މެދުވެރިކޮށް ފަސޭހައިން ކިއުއާރް ޓިކެޓް ނަގައިގެންނެވެ. ޓިކެޓެއްގެ އަގަކީ ހަތް ރުފިޔާއެވެ.
ޓްރައިލް މުއްދަތަށްފަހު ޓިކެޓް ނަގައިގެން ދަތުރުކުރަން ފެށިޔަސް, 65 އަހަރުން މަތީގެ މީހުންނަށާއި 3 އަހަރުން ދަށުގެ ކުޑަކުދިންނަށް އައިޑީކާޑު އަދި ޚާއްސަ އެހީއަށް ބޭނުންވާ މީހުންނަށް އެންސްޕާއިން ދޫކޮށްފައިވާ ކާޑު ދެއްކުމުން ހިލޭ ދަތުރުކުރެވޭނެއެވެ.
އޭގެ އިތުރުން ޔުނީފޯމްގައި ތިބޭ ސްކޫލް ކުދިންނަށްވެސް ބަހުގައި ހިލޭ ދަތުރުކުރުމުގެ އިންތިޒާމު ވަނީ ހަމަޖައްސާފައެވެ.
