ނައިފަރު ޗެލްސީ ފައިނަލަށް

ހިންނަވަރު ފުޓްބޯލް ޗެމްޕިއަންޝިޕްގެ ފައިނަލްގެ ފުރަތަމަ ޖާގަ ނައިފަރު ޗެލްސީން ހޯދައިފިއެވެ.

ލީގު ބުރުގެ އެއްވަނަ ހޯދި ނައިފަރު ފައިނަލުން ޖާގަ ހޯދީ ލީގު ބުރުގެ ދެވަނަ ޓީމާ ވާދަކުރި ފުޓުބޯޅަ މެޗު ފަސޭހައިން ކާމިޔާބުކޮށްގެންނެވެ. މެޗު ނައިފަރު ޗެލްސީން ކާމިޔާބުކުރީ 4-0 ނެވެ. މެޗުގައި ނައިފަރު ޓީމްގެ މުޙައްމަދު ނަޝީދު ދެ ލަނޑު ޖެހިއެވެ. އަނެއް ދެ ލަނޑު ޖެހީ އަހުމަދު އަވީންއާއި ހުސެއިން ފައިސަލްއެވެ. މެޗުގެ މޮޅު ކުޅުންތެރިއަކީ އަވީންއެވެ. ޤައުމީ ޓީމްގެ ފޯވާޑް ހަމްޒާ މުޙައްމަދު (ހަމްޕު)އާއި, އިޝާން އިބްރާހީމް (ސައްޓު) އާއި, އަހުމަދު ސުހެއިލް (ބަންބުޗު) ވެސް ކުޅޭ އެދަފުށި ޓީމަށް އަދި ފައިނަލަށް ދިއުމުގެ ފުރުޞަތު އެބައޮތެވެ. އެއީ ކޮލިފަޔަރ ދެވަނަ މެޗުގައި މިއަދު ހިންނަވަރާއި, ވެލިދޫ ވާދަކޮށް މޮޅުވާ ޓީމަކާ ވާދަކޮށް ކުރި ހޯދައިގެންނެވެ.

ލީގު ބުރުގައިވެސް އޭދަފުށި ވަނީ ނައިފަރު އަތުން ބަލިވެފައެވެ. މުބާރާތުގެ ފައިނަލް މެޗު ކުޅޭނީ މިމަހުގެ ނުވަވަނަ ދުވަހު އެވެ.