އިންޓަނޭޝަލް މަނިޓަރީ ފަންޑް (އައިއެމްއެފް) އާއިއެކު ލޯނުގެ ޕްރެލިމިނަރީ އެއްބަސްވުމަކަށް ދެއްވުމަކީ އެހެން އިންވެސްޓަރުންނާއެކު ކުރާ މަޝްވަރާތަކަށް ލިބުނު ހިތްވަރެއް ކަމަށް ލަންކާއިން އިންޑިއާއަށް ކަނޑައަޅުއްވާފައި ހުންނަވާ ސަފީރު މިލިންޑާ މޮރަގޮޑާ ވިދާޅުވެއްޖެއެވެ.
އައިއެމްއެފް އިން ވަނީ ސްރީލަންކާއަށް 2.9 ބިލިއަން ޑޮލަރުގެ ލޯނު އެހީ ފޯރުކޮށްދިނުމަށް ޕްރެލިމިނަރީ އެއްބަސްވުމަކަށް އާދެވިފައިވާކަމަށް މިދިޔަ ބުރާސްފަތި ދުވަހު އިއުލާންކޮށްފައެވެ.
އައިއެމްއެފްގެ އެހީ ހޯދުމަށް ލަންކާއިން ގިނަމަސައްކަތްތަކެއް ކުރަމުން ދަނިކޮށް، އެއިދާރާއިން ލަންކާއަށް ލޯނުގެ އެހީ ފޯރުކޮށްދިނުމަށް ޕްރެލިމިނަރީ އެއްބަސްވުމަކަށް އައިސްފައިވާއިރު، މިހާރު މި ލޯނު އެޕްރޫވްކުރުމަށް އައިއެމްއެފްގެ މެނޭޖްމަންޓާއި އެކްޒެކެޓިވް ބޯޑަށް ވަނީ ހުށަހަޅާފައެވެ. މި ލޯނު ކަށަވަރުކުރުމަށް އައިއެމްއެފްއިން ލަންކާއަށް ހުށަހަޅާފައިވާ ޝަރުތުތައް އެގައުމުން ފުރިހަމަކުރަންޖެހޭނެއެވެ.
އައިއެމްއެފްގެ އިސް އޮފިޝަލެއްކަމަށްވާ ޕީޓަރ ބްރުއަރ ވަނީ، މިނިމުނު ސްޓާފް ލެވެލް އެއްބަސްވުމަކީ ލަންކާއަށް މިހާރު ދިމާވެފައިވާ ކާރިސާއިން އަރައިގަތުމަށް ކަޑައްތުކުރަންޖެހޭ ދިގު މަގުގެ ފެށުންކަމަށް ވިދާޅުވެފައެވެ. މިހާރު ލަންކާގެ ސަރުކާރުގެ ސިޔާސަތުތައް ރިފޯމްކުރުމުގެ މަސައްކަތް ފަށާފައިވާކަމަށާއި، މިގޮތަށް މިކަންތައް ދެމެހެއްޓުމަކީ ކާރިސާއިން އަރައިގަތުމަށް މުހިންމު ކަމެއްކަމަށް ބްރުއަރ ވަނީ ފާހަގަކުރައްވާފައެވެ.
އައިއެމްއެފްއިން ލަންކާއަށް ފޯރުކޮށްދިނުމަށް މަޝްވަރާކުރަމުންދާ ޕްރޮގްރާމަކީ ހަތަރު އަހަރަށް ބަހާލައިގެން ފޯރުކޮށްދެވޭ އެހީއެކެވެ. މިއެހީގެ ދަށުން ސަރުކާރުގެ އާމްދަނީ އިތުރުކޮށް ފިސްކަލް ކޮންސޮލިޑޭޝަނަށް ބާރުއެޅުމަށް ވަނީ އަމާޒުހިފާފައެވެ. އަދި ތެލާއި ކަރަންޓަށް އައު އަގުތައް ކަނޑައެޅުމަކީ މި އެހީގެ ދަށުން އަމާޒުހިފާފައިވާ ކަމެކެވެ.
މީގެ އިތުރުން މިހާރު ހުސްވެފައިވާ ފޮރިން ރިޒަރވް އަލުން އިތުރުކުރުމަކީވެސް އަމާޒެކެވެ.
އައިއެމްއެފްގެ އެހީ ހޯދުމަށްޓަކައި، ލަންކާއިން މިހާރު ދަރަނިތައް އަދާކުރަން ޖެހިފައިވާ ފަރާތްތަކާއެކު އެދަރަނިތައް އަދާކުރެވޭނެ ދެމެހެއްޓެނިވި ގޮތަކާމެދު މަޝްވަރާކޮށް، އެއްބަސްވުމަކަށް ދާންޖެހޭނެއެވެ.
ސަފީރު މިލިންޑާ ވަނީ އައިއެމްއެފްގެ އެހީ ހޯދުމަށް ލަންކާއިން ކުރަމުންދާ މަސައްކަތުގައި އަވައްޓެރި އިންޑިއާ އިން ފޯރުކޮށްދެމުން އަންނަ އެހީތެރިކަން ފާހަގަކުރައްވައި އެކަމަށް ޝުކުރު އަދާކުރައްވާފައެވެ. އައިއެމްއެފް އިން ފޯރުކޮށްދޭން ނިންމާފައިވާ ލޯނަކީ ބޮޑު އަދަދެއް ނޫން ނަމަވެސް އެއިދާރާއިން ލަންކާއަށް އެހީ ފޯރުކޮށްދޭން ނިންމުމަކީ އިތުރު އެހެން ގައުމުތަކާއި މާލީ އިދާރާތަކާއެކު ކުރިއަށްގެންދެވޭ މަޝްވަރާތައް ކުރިއަށްގެންދަން ލިބުނު ހިތްވަރެއް ކަމަށް ސަފީރު ވަނީ ފާހަގަކުރައްވާފައެވެ.
ލަންކާއަށް މިހާރު ދިމާވެފައިވާ އިގުތިސާދީ ކާރިސާއަކީ ފަހުގެ ތާރީޚެއްގައި އެގައުމުން ކުރިމަތިލަމުންދާ އެންމެ ބޮޑު އިގުތިސާދީ ކާރިސާއެވެ. ގައުމުގެ ދަރަނިތައް އަދާނުކުރެވި ލަންކާ ވަނީ އޭޝިއާ ޕެސިފިކް ސަރަހައްދުން އެންމެ ފުރަތަމަ ބަނގުރޫޓުވި ގައުމަށްވެސް ވެފައެވެ.
