އިޓާލިއަން ލީގުގައި ލާޒިއޯގެ މައްޗަށް ކުރި ހޯދައި ނަޕޯލީ އެއްވަނަ މަގާމަށް ޖެހިލިއިރު، އެންމެ ފަހުގެ ޗެމްޕިއަން އޭސީ މިލާނުން އިންޓަ މިލާން ބަލިކޮށްފިއެވެ.

ލާޒިއޯގެ ދަނޑުގައި ކުޅުނު މެޗު ނަޕޯލީން ކާމިޔާބުކުރީ 2-1 އިންނެވެ. މެޗުގައި ފުރަތަމަ ލަނޑު ޖަހައި ލީޑު ނެގީ ލާޒިއޯ އިންނެވެ. ނަމަވެސް ނަޕޯލީން ވަނީ ފަހަތުން އަރައި ދެ ލަނޑު ޖަހާފައެވެ.

މެޗު ފަށައިގެން ހަތަރު ވަނަ މިނެޓުގައި ލާޒިއޯ އަށް ލީޑު ނަގައިދިނީ މަޓިއާ ޒަގާނީއެވެ. އޭނާ މި ލަނޑު ޖެހީ ފެލިޕޭ އެންޑަސަން ތަނަވަަސްކޮށްދިން ފުރުސަތެއްގައެވެ. ނަޕޯލީން ނަތީޖާ ހަމަހަމަކުރީ މެޗުގެ 38 ވަނަ މިނެޓުގައި ކިމް ޖައެ އުން ޖެހި ލަނޑުންނެވެ. ފުރަތަމަ ހާފު ނިމުނީ 1-1 އިން އެއްވަރުވެގެންނެވެ. މެޗުން ނަޕޯލީ މޮޅުކޮށްދިން ލަނޑު ޖެހީ 61 ވަނަ މިނެޓުގައި ކްވިޗާ ކްރަވަޝްކޭލިއާއެވެ.

އޭސީ މިލާންގެ ދަނޑުގައި ކުޅުނު މެޗުގައި އެ ޓީމުން އިންޓަ މިލާންގެ މައްޗަށް ކުރި ހޯދީ 3-2 އިންނެވެ. މެޗުގައި ފުރަތަމަ ލަނޑު ޖަހައި ލީޑު ނެގީ އިންޓައިންނެވެ. އެއީ 21 ވަނަ މިނެޓުގައި މާސެލޯ ބްރޮޒޮވިޗް ޖެހި ލަނޑުންނެވެ. އޭގެ ހަތް މިނެޓު ފަހުން އޭސީ މިލާނުން ވަނީ މެޗުގެ ނަތީޖާ ހަމަހަމަކޮށްފައެވެ. މި ލަނޑު އެ ޓީމަށް ޖަހައިދިނީ ރަފައެލް ލެއާއޯއެވެ.

އޭސީ މިލާނުން ލީޑު ނެގީ ދެ ވަނަ ހާފުގައެވެ. 54 ވަނަ މިނެޓުގައި އެ ޓީމަށް ލީޑު ނަގައިދިނީ ލެއާއޯގެ އެހީތެރިކަމާއެކު އޮލިވިއޭ ޖިރޫޑްއެވެ. އޭގެ ހަ މިނެޓު ފަހުން އޭސީ މިލާނުން ވަނީ އެ ޓީމުގެ ތިން ވަނަ ލަނޑު ޖަހާފައެވެ. ޖިރޫޑްގެ އެހީތެރިކަމާއެކު މި ލަނޑު ޖެހީ ލެއާއޯއެވެ. އިންޓަ މިލާންގެ ދެ ވަނަ ލަނޑު މެޗުގެ 67 ވަނަ މިނެޓުގައި ޖެހީ އެޑިން ޖެކޯއެވެ.

ލީގުގައި ކުޅުނު ފަސްް މެޗުން 11 ޕޮއިންޓު ހޯދައިގެން ނަޕޯލީ އޮތީ އެއް ވަނަ މަގާމުގައެވެ. ދެ ވަނަ މަގާމުގައި އޮތް އޭސީ މިލާނަށް ވެސް ލިބެނީ 11 ޕޮއިންޓެވެ. ނަމަވެސް ނަޕޯލީން ކުރި ހޯދަނީ ފައިދާ ގޯލުންނެވެ. އިންޓަ މިލާން އޮތީ ނުވަ ޕޮއިންޓާއެކު ހަ ވަނަ މާގަމުގައެވެ.