ށ. އަތޮޅަށް ފެށި އާރްޓީއެލްގެ ޓެސްޓް ދަތުރުތައް: ގިނަ ބަޔަކު ހިތްހަމަޖެހޭ
3 ސެޕްޓެމްބަރު 2022 | ހޮނިހިރު 12:30ޓެސްޓް ދަތުރުތަކަށް އާންމުންގެ ތަރުހީބު ވަރަށް ބޮޑު
ށ. އަތޮޅަށް ފެށި އާރްޓީއެލްގެ ޓެސްޓް ދަތުރުތަކުގެ ތެރެއިން
ހައި ސްޕީޑު ފެރީގެ ނިޒާމުން ރާއްޖޭގެ ހުރިހާ ރަށެއް ގުޅާލުމަށް ކުރިއަށްގެންދާ މަސައްކަތުގެ ދަށުން ށ. އަތޮޅުގައި އެ ޚިދުމަތް ފެށުމަށް ނުރަސްމީ ދަތުރުތައް އަންގާރަ ދުވަހު ފަށާފައިވާއިރު ވޭތުވެދިޔަ ހަތަރު ދުވަހު 646 ފަސިންޖަރުން ށ. އަތޮޅުގެ ހަތް ރޫޓަކުން ދަތުރުކޮށްފައިވާ ކަމަށް ޕްލޭނިންގް މިނިސްޓްރީން ބުނެފިއެވެ.
ޕްލޭނިންގ މިނިސްޓްރީން ބުނީ ހަތް ރޫޓަކުން އަހުލުވެރި ކުރުމުގެ ދަތުރުތައް ކުރިއަށްދާއިރު މި ދަތުރުތަކަށް އެއްވެސް އަގެއް ނުނަގާ ކަމަށެވެ.
ރާއްޖެއެމްވީއާ ވާހަކަ ދައްކަވަމުން ށ. ކޮމަންޑޫ ކައުންސިލްގެ ރައީސް މުހައްމަދު ޝިނާން ވިދާޅުވީ ސަރުކާރުން ފަށާފައިވާ މި ޓެސްޓް ދަތުރުތަކަށް އާންމުންގެ ތަރުހީބު ބޮޑު ކަމަށެވެ. އަދި މިކަމަކީ ވަރަށް ރަނގަޅު ކަމެއްގެ ގޮތުގައި ރަށުގެ ގިނަ އަދަދެއްގެ ރައްޔިތުން ޤަބޫލުކުރާއިރު މިއީ އާންމު ރައްޔިތުންނަށް ލިބުނު ވަރަށް ބޮޑު ފަސޭހައެއް ކަމަށް ވިދާޅުވިއެވެ.
ޝިނާން އިތުރަށް ވިދާޅުވީ ޓެސްޓް ދަތުރުތައް މިހާރު ހިލޭ ކުރަމުންދާތީ ވަރަށް ޖާގަ ފުލްކޮށް އުޅޭ ކަމަށެވެ.
ރާއްޖެއެމްވީއާ ވާހަކަ ދައްކަވަމުން ށ. ފުނަދޫ ކައުންސިލްގެ ރައީސް އަހްމަދު އިބްރާހިމް ވިދާޅުވީ ޓެސްޓް ދަތުރުތަކަށް އާންމުންގެ ތަރުހީބު ވަރަށް ބޮޑަށް ލިބޭ ކަމަށެވެ. އަދި އަތޮޅުތަކުން ފުނަދޫއަށް މީހުން ވަރަށް ގިނައިން ޑޮކްޓަރަކަށް ދައްކަން އަންނަ ކަމަށާއި ގިނަ ރައްޔިތުން ވަރަށް ހިތްހަމަޖެހޭ ކަމަށެވެ.
މިހާރު ޓެސްޓް ދަތުރުތައް ކުރަމުންދާ ޝެޑިއުލް ވެސް ރަނގަޅުކަން ފާހަގަކުރައްވާ އަހްމަދު އިބްރާހިމް ވިދާޅުވީ މިއީ ރައްޔިތުންނަށް ލިބިގެންދިޔަ ފަސޭހައެއް ކަމަށެވެ. ޓެސްޓް ދަތުރުތައް ކުރާއިރު ޖާގަ ނުލިބޭ ވާހަކަ ބައެއް ރައްޔިތުން ފާހަގަކުރާ ކަމަށާއި އެހެންނަމަވެސް ދަތުރުތައް ފެށުމުން ޕޯޓަލް މެދުވެރިކޮށް އެމީހަކު ބޭނުން ދުވަހަކަށް ޓިކެޓް ބުކް ކުރެވޭނެ ކަމަށެވެ. އޭރު މި މައްސަލަ ވެސް ހައްލުވެގެންދާނެ ކަމަށް އޭނާ ވިދާޅުވިއެވެ.
އެމްޓީސީސީން ބުނި ގޮތުގައި ރޫޓު ޓެސްޓު ކުރަން ކުރާ ދަތުރުތައް ފެށުމުން ރަށު ކައުންސިލް އިދާރާތައް މެދުވެރިކޮށް ޓިކެޓް ނެގޭނެއެވެ. މި ދަތުރުތައް ކުރަން ހަމަޖެހިފައިވަނީ އެއް ހަފްތާގެ މުއްދަތަކަށެވެ. ނަމަވެސް ޚިދުމަތް ރަސްމީކޮށް ފެށުމުން ޓިކެޓް ނަގަން ޖެހޭނީ އާރުޓީއެލް އެޕްލިކޭޝަން މެދުވެރިކޮށެވެ.
އެމްޓީސީސީ އިން މިހާތަނަށް އާރުޓީއެލްގެ ޚިދުމަތް ފަށާފައިވަނީ ހއ. އަދި ހދ. އަތޮޅުގައެވެ. ށ. އަތޮޅުގައި މި ޚިދުމަތް ފެށުމާއެކު ޒޯން އެކެއްގެ ހުރިހާ ރަށެއްގައި މި ޚިދުމަތް ފެށުނީއެވެ.
މިއީ އިންޓެގްރޭޓެޑް ނޭޝަނަލް ޕަބްލިކް ފެރީ ނެޓްވޯރކުގެ ދަށުން ފެށި ޚިދުމަތެކެވެ. މި ނެޓްވޯކަކީ މުޅި ރާއްޖެއަށް އަމާޒުކޮށް ފަސިންޖަރުންނާއި މުދާ އުފުލާ ފެރީ ހިމެނޭ ގޮތުން، 2020-2040 އަށް ކަނޑައަޅަފައިވާ ނޭޝަނަލް ސްޕެޝަލް ޕްލޭން ގައި ހިމެނޭ ތިން ޒޯނާއި ހަ ރީޖަން ގުޅުވައިދިނުމަށް ފަރުމާކޮށްފައިވާ ވިއުގައެކެވެ. މި ގޮތުން ފެރީ ނެޓްވޯރކުން ހަ ރީޖަންގައި އެކުލެވޭ ހުރިހާ ރަށްތަކެއް ގުޅާލެވޭއިރު، އެއް ރީޖަން އަނެއް ރީޖަނާވެސް ގުޅިގެންދާނެއެވެ. މި ގޮތަށް ފަސިންޖަރުން އުފުލާ ފެރީ ގުޅުވާލެވޭނީ ތަފާތު ތިން ގޮތަކަށެވެ. އެއީ "ކޮމިއުޓް ލިންކް"، "ނަން-ކޮމިއުޓް ލިންކް"، އަދި "ހައިވޭ ލިންކް" މެދުވެރިކޮށެވެ.
ކޮމިއުޓް ލިންކްއަކީ އެ ރީޖަނެއްގައި ހިމެނޭ ރަށްތައް ގުޅުވައިދޭ، އާންމުކޮށް ކުރަންޖެހޭ މަސައްކަތް ނުވަތަ ޒަރޫރީ ބޭނުންތަކަށް ކުރާ ކުރު ދަތުރުތަކަށް ޚާއްސަކުރެވިފައިވާ ލިންކެވެ. ނަން-ކޮމިއުޓް ލިންކްއަކީ ދެ ރަށެއްގެ ދެމެދުގައި ކުރާ، ދިގު ދަތުރުތަކަށް ޚާއްސަކޮށްފައިވާ ލިންކެވެ. އަދި ހައިވޭ ލިންކްއަކީ އެއް ރީޖަން އަނެއް ރީޖަނާ ގުޅުވައިދޭ މައި ދަތުރުފަތުރުގެ ހަބެވެ. އިންޓެގްރޭޓެޑް ނޭޝަނަލް ޕަބްލިކް ފެރީ ނެޓްވޯރކްގައި ހިމެނޭ ދެވަނަ ޚިދުމަތަކީ ކާގޯ ނުވަތަ މުދާ އުފުލާ ފެރީގެ ޚިދުމަތެވެ. މި ޚިދުމަތަކީ، އެ ރީޖަނެއްގައި ހިމެނޭ ހުރިހާ ރަށްތަކާއި އެންމެ ކައިރީގައި އޮންނަ ކޮމަރޝަލް ހަބް ގުޅުވައިދޭނެ ޚިދުމަތެކެވެ.
މި މަޝްރޫއު ހިންގުމަށް ހަމަޖެހިފައިވަނީ ތިން ފިޔަވައްސަކަށް ބަހާލައިގެންނެވެ. ފުރަތަމަ ފިޔަވަހީގެ ޚިދުމަތް ފަށާފައިވާއިރު ދެވަނަ ފިޔަވަހީގައި ނ، ރ، ބ، ޅ، ގއ، ގދ، ޏ، އަދި ސ ގުޅާލާނެއެވެ. އަދި ތިންވަނަ ފިޔަވަހީގައި ކ، އއ، އދ، ވ، މ، ފ، ދ، ތ އަދި ލ ގުޅާލުމަށް ވަނީ ނިންމާފައެވެ. މި މަޝްރޫއުގެ ދަށުން ޖުމްލަ 188 ރަށް ގުޅާލުމަށް ވަނީ ހަމަޖެހިފައެވެ.
އަންނަ އަހަރުގެ އޮގަސްޓް މަހުގައި އިތުރު 5 އަތޮޅު ފެރީގެ ނިޒާމުން ގުޅާލެވޭނެ ކަމަށް މިނިސްޓަރ އޮފް ނެޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމް ވަނީ ވިދާޅުވެފައެވެ.
