ހދ އަތޮޅުގެ އިމާމުންނާއި ޚަތީބުން ތަމްރީންކުރުމަށް ބޭއްވި ޕްރޮގްރާމް ނިންމާލައިފި
މި ޕްރޮގްރާމްގައި ހދ އަތޮޅުގެ އެކި ރައްރަށުން ޖުމްލަ 50 ފަރާތަކުން ބައިވެރިވެފައިވޭ
ހދ އަތޮޅުގެ އިމާމުންނާއި ޚަތީބުން ތަމްރީންކުރުމަށް ބޭއްވި ޕްރޮގްރާމް ނިންމާލުން
ހދ އަތޮޅުގެ އިމާމުންނާއި ޚަތީބުންނަށް އަމާޒުކޮށްގެން ކުޅުދުއްފުށި ސިޓީގައި ކުރިއަށްގެންދިޔަ ޕްރޮގްރާމް ނިންމާލައި، ބައިވެެރިންނަށް ސެޓްފިކެޓް ހަވާލުކުރުމުގެ ރަސްމިއްޔާތު ބާއްވައިފިއެވެ.
މިއީ މިނިސްޓްރީ އޮފް އިސްލާމިކް އެފެއަރޒާއި ކުޅުދުއްފުށީ ސިޓީ ކައުންސިލް އަދި ހދ އަތޮޅު ކައުންސިލްގެ އިދާރާ ގުޅިގެން ކުރިއަށްގެންދިޔަ ޕްރޮގްރާމެކެވެ.
މި ޕްރޮގްރާމް ނިންމުމުގެގޮތުން އަފީފުއްދީން ސްކޫލްގައި ހުކުރުދުވަހުގެ ރޭ ބޭއްވި ރަސްމިއްޔާތު ޝަރަފްވެރިކޮށްދެއްވާފައި ވަނީ އިސްލާމިކް މިނިސްޓަރ ޑޮކްޓަރު އަޙްމަދު ޒާހިރު ޢަލީއެވެ. މި ރަސްމިއްޔާތުގައި ކުޅުދުއްފުށި ސިޓީގެ މޭޔަރު މުޙައްމަދު ޢާޠިފާއި ކައުންސިލަރުންވެސް ބައިވެރިވެވަޑައިގަތެވެ.
މިދިޔަ އޯގަސްޓް މަހުގެ 31ން މިމަހުގެ 3 ވަނަ ދުވަހުގެ ނިޔަލަށް ކުރިއަށް ގެންދިޔަ މި ޕްރޮގްރާމްގައި ކިޔަވައިދެއްވީ ރާއްޖޭގެ ފުންނާބުއުސް 3 އިލްމުވެރިންނާއި 2 ގާރީއެކެވެ. މި ޕްރޮގްރާމްގައި މައިގަނޑު ގޮތެއްގައި ކިޔަވައިދީފައިވަނީ ނަމާދުގެ ހުކުމްތަކާއި، ޚިލާފީ މައްސަލަތަކުގައި ޢަމަލުކުރާނެގޮތާއި، މަސައްކަތުގެ އަޚުލާގާއި، އެހެން މީހުންނާއި މުއާމަލާތުކުރުން ފަދަ މައުޟޫތަކާއި، ތަޖުވީދާއި، ޚުތުބާ ހުށަހެޅުމުގައި ވިސްނަންވީ ކަންކަމާއި، އިމާމުންނާގުޅޭ ސިވިލް ސަރވިސްގެ ގަވާއިދާއި އުސޫލުތަކާއި، ހުކުރު ގަވާއިދާއި އުސޫލުތަކެވެ. މި ޕްރޮގްރާމްގައި ޖުމްލަ 50 ފަރާތަކުން ބައިވެރިވެފައިވާކަމަށް އިސްލާމިކް މިނިސްޓްރީން މައުލޫމާތުދެއެވެ. އޭގެތެރޭގައި ހިމެނެނީ 36 ޚަތީބުންނާއި 14 އިމާމުންނެވެ.
މި ޕްރޮގްރާމުގެ މަގުސަދަކީ، ދިވެހިރާއްޖޭގެ މިސްކިތްތަކުގައި އިމާމުވެ ނަމާދުކުރާ ފަރާތްތަކަކީ އާއްމު ރައްޔިތުންނާއެކު ފަރުޟު ފަސްނަމާދު އިސްވެކުރައްވާ ފަރާތްތައް ކަމަށްވާތީ އެފަރާތްތަކަށް އިތުރު ތަމްރީނުދިނުމާއި، ހުނަރުވެރިކަން އިތުރުކުރުމާއި، ފުޅާދާއިރާއެއްގައި އެބޭފުޅުންގެ މަސައްކަތްތައް ބައްޓަންކުރުމަށް މަގުފަހިކުރުމެވެ.
މުޅި ރާއްޖެއަށް އަމާޒުކޮށްގެން ހިންގޭ މި ޕްރޮގްރާމް ކުރިއަށް އޮތްތަނުގައި ރާއްޖޭގެ އެހެން އަތޮޅުތަކުގައިވެސް ހިންގުމަށް ހަމަޖެހިފައިވާކަމަށް އިސްލާމިކް މިނިސްޓްރީން ހާމަކުރެއެވެ.
