މައްސަލަތަކުގެ މުއްދަތު ގުނުމުގައި ދިމާވާ މައްސަލަ ހައްލުކުރަން މަސައްކަތްކުރަނީ!
މައްސަލަ ބަލަންޖެހޭ މުއްދަތު އޮންނަގޮތުން ދިމާވާ ގޮންޖެހުންތައް އެބަހުރި
ރިފްއަތު
މައްސަލަތަކުގެ މުއްދަތު ގުނުމުގައި ދިމާވާ މައްސަލަ ހައްލުކުރަން މަސައްކަތްކުރަމުންދާކަަމަށް އެޓަރނީ ޖެނެރަލް އިބްރާހިމް ރިފްއަތު ވިދާޅުވެއްޖެއެވެ.
ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީގައި ވާހަކަފުޅުދައްކަވަމުން ދާދި ފަހުން ޕްރޮސެކިއުޓަރ ޖެނެރަލް ހުސައިން ޝަމީމް ވަނީ، ގާނޫނުތައް ހުރި ގޮތުން، މައްސަލަތަކުގެ މުއްދަތު ގުނުމުގައި ދަތިތަކާ ކުރިމަތިވާކަމަށް ވިދާޅުވެފައެވެ. މައްސަލަތަކުގެ މުއްދަތުތައް ގުނުމުގައި އެކި ފަހަރު އެކި ގޮތަށް އަމަލުކުރާކަމަށް ބުނެ ޕީޖީއަށް ވަރަށް ބޮޑަށް ބައެއް ފަހަރު ފާޑުކިޔުންތަކާ ކުރިމަތިލާންޖެހެއެވެ.
މިކަމާގުޅިގެން، އެ މައްސަލަ ހައްލުކުރުމަށް މަސައްކަތް ކުރަމުންދޭތޯ ރާއްޖެއެމްވީން ސުވާލު ދެންނެވުމުން އޭޖީ ރިފްއަތު ވިދާޅުވީ، އެ މައްސަލަ ހައްލުކުރުމަށް ކަމާގުޅޭ ފަރާތްތަކާއެކު މަޝްވަރާކުރަމުންދާކަަމަށެވެ. އެގޮތުން ކޯޓުތަކާއި ފުލުހުންނާއެކު މަޝްވަރާކުރަމުންދާކަމަށް އެމަނިކުފާނު ވަނީ ވިދާޅުވެފައެވެ. ރިފްއަތު ވަނީ، އެކި ދާއިރާތަކުން ގާނޫނީގޮތުން ހުރި ގޮންޖެހުންތައް ހައްލުކޮށް، ޖުޑީޝަރީ އިސްލާހުކުރުމަށް ސަރުކާރުން ޚާއްސަ އިސްކަމެއްދެއްވާކަމަށް ވިދާޅުވެފައެވެ. އެގޮތުން ސަރުކާރުން ގިނަ ބިލްތަކެއް މަޖިލީހަށް ހުށަހަޅައި ފާސްކޮށްފައިވާކަމަށާއި، އަދުލު އިންސާފުގެ ދާއިރާ ހަރުދަނާ ކުރުމަށް އަދިވެސް އިތުރު ގާނޫނީ ބަދަލުތައް ގެނައުމުގެ މަސައްކަތް ކުރަމުންދާކަން ރިފްއަތު ވަނީ ފާހަގަކުރައްވާފައެވެ
