އާސަންދަ އާއި އެންސްޕާއިން ޖިމް ފަދަ ތަންތަނަށް އިންވެސްޓުކުރުން ރަނގަޅު: މަޚުލޫފް
1 ސެޕްޓެމްބަރު 2022 | ބުރާސްފަތި 12:22ޖިމްފަދަ ކަސްރަތު ކުރާ ތަންތަނަށް ވީ ވަރަކުން ޔޫތު މިނިސްޓްރީއިން އިންވެސްޓްކުރޭ
ޔޫތު މިނިސްޓަރު މަޚުލޫފް
އާސަންދަ އާއި އެންސްޕާއިން ޖިމް ފަދަ ތަންތަނަށް އިންވެސްޓްކުރުން ރަނގަޅު ކަމަށް ޔޫތު މިނިސްޓަރު އަޙުމަދު މަޚުލޫފު ވިދާޅުވެއްޖެއެވެ.
ނެޝަނަލް ފިޒިކަލް އެކްޓިވިޓީ ޕޮލިސީއާއި މޯލްޑިވްސް ގައިޑްލައިން އޮން ފިޒިކަލް އެކްޓިވިޓީ ލޯންޗްކުރުމުގެ ރަސްމިއްޔާތުގައި ވާހަކަފުޅު ދައްކަވަމުން މަޚުލޫފް ވިދާޅުވީ މިހާރުވެސް ޔޫތު މިނިސްޓްރީއިން ޖިމް ފަދަ ކަސްރަތު ކުރާ ތަންތަނަށް ވީ ވަރަކުން އިންވެސްޓުކުރަމުންދާ ކަމަށެވެ. އަދި ދުޅަހެޔޮ ދިރިއުޅުމަކަށް ކަސްރަތަކީ ކިހާ މުހިންމު ކަމެއްކަން އަންގާދިނުމަށް ކަމާއި ބެހޭ ފަރާތްތަކުން ހިންގި ޕްރޮގްރާމްތަކުގެ ނަތީޖާއަކީ މިހާރު ރަށްރަށުގައި އައުޓް ޑޯ ޖިމް ފަދަ ތަންތަން ޤާއިމްކޮށްދިނުމަށް ރަށްރަށުން އެދޭ މިންވަރު އިތުރުވުން ކަމަށް ވެސް މަޚުލޫފް ވިދާޅުވިއެވެ.
އެހެންކަމުން މިހާރު އާއްމުންނަށް ކަސްރަތަކީ ކިހާ މުހިންމުކަމެއްކަން އެނގޭ ކަމަށާއި، ކަސްރަތުކުރާ ތަންތަނަށް އިންވެސްޓްކުރުމަކީ މީހުން ދުޅަހެޔޮވެ، އެންސްޕާ އާއި އާސަންދައިން ބަލި މީހުންނަށް ކުރާ ޚަރަދު ދަށް ވާނެ ކަމެއްގެ ގޮތުގައި މަޚުލޫފް ވަނީ ސިފަކުރައްވާފައެވެ.
ހެލިފެލިވެ އުޅުމާއި ކަސްރަތުކުރުމުގެ ސިޔާސަތު ބިނާކޮށްފައިވަނީ މައިގަނޑު 4 ކަމެއްގެ މައްޗަށެވެ. މީގެ ތެރޭގައި ކަސްރަތުކުރުމާމެދު ރައްޔިތުން ދެކޭގޮތް ބަދަލުކުރުމާއި، ކަސްރަތުކުރުމަށް މަގުފައިވާނޭ ގޮތްތައް ހޯދައި ދިނުމާއި، ހެލިފެލިވެ އުޅުމާއި ކަސްރަތުކުރުމަށް ހޭލުންތެރިކަން އިތުރުކުރުމާއި، ކަމާ ގުޅޭގޮތުން މީހުން ތަމްރީނުކުރުމަށް ސިޔާސީ ދާއިރާއާއި މިކަމާ ގުޅުންހުރި އެހެނިހެން ދާއިރާތައް އެކުގައި މަސައްކަތްކުރުން ހިމެނެއެވެ.
