ކުށްތައް އިތުރުވަމުންދާކަމުގެ އިހުސާސަކީ މުޖުތަމައުގެ ކުރިއެރުމަށްވެސް އޮތް ބިރެއް: މިނިސްޓަރު އިމްރާން
ފުލުހުންގެ މުއައްސަސާއަށް ޚިދުމަތް ކުރެއްވުމުގައި 25 އަހަރު ހޭދަ ކުރެއްވުމަކީ ފާހަގަކޮށްލަން ޖެހޭ ކަމެއް
ދިވެހި ފުލުހުންގެ ޚިދުމަތުގެ ދުވަހާއި ގުޅިގެން ބޭއްވި ރަސްމީ ޖަލްސާގެ ތެރެއިން
ކުށްތައް އިތުރުވަމުންދާ ކަމުގެ އިހުސާސަކީ މުޖުތަމައުގެ ކުރިއެރުމަށްވެސް އޮތް ބިރެއްކަމަށް ހޯމް މިނިސްޓަރު ޝެއިޙް އިމްރާން އަބްދުﷲ ވިދާޅުވެއްޖެއެވެ.
މިނިސްޓަރު އެހެން ވިދާޅުވީ ދިވެހި ފުލުހުންގެ ޚިދުމަތުގެ ދުވަހާއި ގުޅިގެން ބޭއްވި ރަސްމީ ޖަލްސާގައި ދެއްކެވި ވާހަކަފުޅުގައެވެ. މި ޖަލްސާގައި ފުލުހުންގެ ޚިދުމަތުގައި 25 އަހަރާއި 20 އަހަރަށްވުރެ ދިގު މުއްދަތަކަށް ޚިދުމަތް ކުރައްވާފައިވާ މުވައްޒަފުންނަށް ހަނދާނީ ފިލާ ދީފައިވެއެވެ.
މިނިސްޓަރު ވިދާޅުވީ، ފުލުހުންގެ މުއައްސަސާއަށް ޚިދުމަތް ކުރެއްވުމުގައި 25 އަހަރު ހޭދަ ކުރެއްވުމަކީ ފާހަގަކޮށްލަން ޖެހޭ ކަމެއް ކަމަށެވެ. އެބޭފުޅުން ރިޓަޔަރ ކުރައްވާއިރު، ޚިދުމަތުގެ ތެރޭގައި އިތުރަށް ރަނގަޅު ކުރުމަށް ފާހަގަވެފައިވާ ކަންކަން ކިޔާދެއްވުމަށް މިނިސްޓަރު ވަނީ އެދިވަޑައިގަންނަވާފައެވެ.
ދުނިޔޭގެ ޤައުމުތަކުން ކުރިއަރައިގެން ދަނީ އެއް ޖީލަށް ވުރެ އަނެއް ޖީލުގައި ފޯރުކޮށްދޭ ޚިދުމަތްތައް އެގޮތުގެ މަތިން ހަރުދަނާ ވުމުގެ މަގު ފަހިވެގެން ކަމަށް މިނިސްޓަރު ވިދާޅުވިއެވެ.
މިނިސްޓަރު ވަނީ ފުލުހުންގެ ވަސީލަތްތައް އިތުރު ކުރުމަށް ދައުލަތުން ކުރަންޖެހޭ މަސައްކަތަށްވެސް އަލިއަޅުވާލައްވާފައެވެ.
މިނިސްޓަރު ވަނީ ސުލައިމާނުގެފާނުގެ ދުވަސްވަރު އަމަންއަމާންކަމާއި ސުލްޙައިގެ މިސާލެއްގެ ގޮތުގައި ފާހަގަކޮށްލެވޭ ވާހަކައަކަށް އަލިއަޅުވާލައްވާފައެވެ.
މިނިސްޓަރު ވިދާޅުވީ، ފުލުހުންގެ ޒިންމާއެކޭ އެއްގޮތަށް އެތައް ބައެއްގެ ޒިންމާ މި މަސައްކަތުގައި ހިމެނޭ ކަމަށެވެ. އެގޮތުން ކުށްތައް އިތުރުވަމުންދާ ކަމުގެ އިހުސާސަކީ މުޖުތަމައުގެ ކުރިއެރުމަށްވެސް އޮތް ބިރެއްކަމަށް މިނިސްޓަރު ވިދާޅުވިއެވެ.
ފުލުހުންގެ ޚިދުމަތް ފަށާފައިވަނީ 1 ސެޕްޓެމްބަރު 2004 ގައެވެ.
