ގދ އަތޮޅު ކައުންސިލް އެތުލެޓިކްސް ޗެމްޕިއަންޝިޕްގެ ޓައިމިންތައް އެސޯސިއޭޝަނުން ވެރިފައިކުރާނެ

މި މަހު ބޭއްވުމަށް ހަމަޖެހިފައިވާ ގދ އަތޮޅު ކައުންސިލް އެތުލެޓިކްސް ޗެމްޕިއަންޝިޕްގެ ޓައިމިންތައް ވެރިފައިކުރުމަށް ނިންމައިފިއެވެ.

މިއާއެކު މުބާރާތުގެ އެއްވެސް ޤައުމީ ރެކޯޑެއް ހަދައިފިނަމަ އެއީ ރެކޯޑެއްގެ ގޮތުގައި ރަސްމީކޮށް އެސޯސިއޭޝަނުން ބަލައިގަންނާނެއެވެ.

މި މުބާރާތް ހިންގުމަށް ކައުންސިލުން ހަވާލުކޮށްފައިވަނީ ރައުހަތު ސްޕޯޓްސް ކްލަބާއެވެ. އެހެންކަމުން މުބާރާތުގެ އޮފިޝަލުންގެ ގޮތުގައި ހަރަކާތްތެރިވާނީ ކްލަބުން އެކުލަވާލާ ޓީމެކެވެ. ނަމަވެސް މީގެ އިތުރުން، އެތުލެޓިކްސް އެސޯސިއޭޝަން އޮފް މޯލްޑިވްސްގެ ފަސް އޮފިޝަލުން މި މުބާރާތުގައި ހަރަކާތްތެރިވުމަށްވެސް މިހާރު ވަނީ ނިންމާފައެވެ. އެސޯސިއޭޝަނުންގެ އޮފިޝަލުންނާއެކު ޖުމްލަ 35 އޮފިޝަލުން މި މުބާރާތުގައި ހަރަކާތްތެރިވާނެއެވެ. މީގެ އިތުރުން، މުބާރާތުގެ ޓެކްނިކަލް އޮފިޝަލުން ތަމްރީނުކުރާނީވެސް އެސޯސިއޭޝަނުންނެވެ.

މުބާރާތް ހިންގުމާއި ހަވާލުވި ރައުހަތު ސްޕޯޓްސް ކްލަބުން ވަނީ އެތުލެޓިކްސް އެސޯސިއޭޝަންގެ ފަރާތުން، މުބާރާތް ހިންގުމަށް ލިބޭ އެހީތެރިކަން ފާހަގަކޮށް އެކަމަށްޓަކާ ޝުކުރުއަދާކޮށްފައެވެ.

ގދ ތިނަދޫގައި ކުރިއަށް ގެންދިއުމަށް ހަމަޖެހިފައިވާ މި މުބާރާތް އޮންނާނީ މި މަހުގެ 11ން 15ގެ ނިޔަލަށެވެ. މުބާރާތުގައި ރާއްޖޭގެ އެކި ކަންކޮޅުތަކުން 24 ސްކޫލެއް ބައިވެރިވެފައިވެއެވެ.