އަމީނީ މަގު ތަރައްގީކުރުމުގެ މަސައްކަތް، މުއްދަތުގެ ކުރިން ނިންމަން މަސައްކަތްކުރާނަން: މޫސާ ޢަލީ މަނިކު

އަމީނީމަގުގައި ތާރުއަޅައި ތަރައްގީކުރުމުގެ މަޝްރޫއު މުއްދަތުގެ ކުރިން ނިންމަން މަސައްކަތްކުރައްވާނެކަމަށް، ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ގެ މެނޭޖިންގ ޑިރެކްޓަރ މޫސާ ޢަލީ މަނިކު (މޫކޭ) ވިދާޅުވެއްޖެއެވެ.

އަމީނީމަގުގައި ތާރުއަޅައި ތަރައްގީކުރުމުގެ އަމަލީ މަސައްކަތް ފެށުމަށް އަންގާރަ ދުވަހު ބޭއްވި ރަސްމިއްޔާތުގައި ވާހަކަފުޅުދައްކަވަމުން މޫކޭ ވިދާޅުވީ، މި މަޝްރޫއާ ގުޅޭގޮތުން އޮތީ ހުސް ޝަކުވާކަމަށެވެ. މަގާ ގުޅޭގޮތުން ޝަކުވާ ނޫން އިތުރު އަޑެއް އިވިވަޑައިނުގަންނަވާ ކަމަށްވެސް ވިދާޅުވިއެވެ.

ޚިޔާލު ތަފާތުވުންތައް އެއްގޮތްކޮށް، ދެބަސްވުންތައް ހައްލުކުރިފަދައިން މަޝްރޫއުގެ އަމަލީ މަސައްކަތް ފެށިއްޖެކަން ފާހަގަކުރައްވައި މޫކޭ ވިދާޅުވީ، ހަތް މަސް ދުވަހުގެ ތެރޭގައި، ނުވަތަ އެއަށްވުރެ އަވަހަށް މަޝްރޫއުގެ މަސައްކަތް ނިންމުމަށް މަސައްކަތްކުރައްވާނެ ކަމަށެވެ.

މޫކޭ އިތުރަށް ވިދާޅުވީ އަމީނީމަގު ތަރައްގީކުރުމުގެ މަޝްރޫއުގައި، ނުކުޅެދުންތެރިކަން ހުންނަފަރާތްތަކަށް ހިނގާބިނގާވެ އުޅުމަށް ފަސޭހަވާނެގޮތަށް ދުވާރުގައި ބްރައިލް ބްލޮކްސް ޖެހުމާއި، ވީލްޗެއަރ އެކްސަސް ގާއިމުކޮށް، ފެނާއި ނަރުދަމާ ނިޒާމް އަޕްގްރޭޓް ކުރެވޭނެކަމަށެވެ. ހަމަ އެއާއެކު ސްޓޭކް ހޯލްޑަރުން ކޭބަލްތައް އެޅުމަށްޓަކައި ކޭބަލްޓްރޭ މަގުގެ ދެފަޅީގައި އެޅުމާއެކު އެޗްވީ ކޭބަލަށް ޚާއްސަކޮށްގެން ޖަންގްޝަންތަކެއް ބެހެއްޓިގެންދާނެ ކަމަށްވެސް ވިދާޅުވިއެވެ.

މި މަޝްރޫއު ކުރިއަށްދާއިރު އަސާސީ ޚިދުމަތްތަކަށް އުނދަގޫތައް ކުރިމަތިވާނެ ކަމަށްވެސް ވިދާޅުވިއެވެ. އެންމެ ޒަމާނީ ފެންވަރަށް އަމީނީމަގު ޑިޒައިން ކުރެވިގެންދާއިރު، މަގުގެ ފެން ހިންދާ ނިޒާމު ޑިޒައިންކުރެވިގެންދާނީ އަމީނީމަގުގެ ދެފާރާތުންވެސް މަގުގެ އެއްކޮޅުން އަނެއްކޮޅަށް ކާނުއަޅާގޮތަށެވެ. އަދި ޑިޒައިނަށް ރިއާޔަތްކޮށް، މަގުގައި ފެންބޮޑުވުމުގެ މައްސަލައަށް ދާއިމީ ހައްލެއް ގެނައުމަށްޓަކައި އިތުރު ޕަމްޕް ސްޓޭޝަންތައް ބެހެއްޓޭނެއެވެ. މީގެ އިތުރުން، އިމާރާތްކުރުމުގެ މަސައްކަތްތައް ކުރަމުންދާއިރު ބޭރުކުރާ ފެނަށް ޚާއްސަ ޑީވޯޓަރިން ނެޓްވޯކް އެޅިގެންދާނެއެވެ. މީގެ ސަބަބުން ދުވާރުމަތީގައި ހޮޅި އަޅައިގެން އިމާރާތްތަކުން ފެން ބޭރުކުރުން ނިމުމަކަށް އަންނާނެއެވެ.