ޚާރިޖީ މަސްލަހަތަށް ގެއްލުން ދިނުން ކުށަކަށް ހެދުން: މެމްބަރުންގެ މެދުގައި ޚިޔާލުތަފާތު ބިލެއް!

ބުދަ ދުވަހު މަޖިލީހުގެ ޖަލްސާގައި އިބްތިދާއީ ބަހުސް ކުރިއަށްގެންދިޔަ ޚާރިޖީ މަސްލަހަތަށް ގެއްލުން ދިނުން ވަކި ކުށެއްގެ ގޮތުގައި ކަނޑައެޅުމަށް ފޭދޫ ދާއިރާގެ މެމްބަރު މުހައްމަދު ނިހާދު ހުށަހެޅުއްވި އިސްލާހަކީ މެމްބަރުންގެ މެދުގައި ވަރަށް ބޮޑަށް ޚިޔާލު ތަފާތު މައްސަލައެކެވެ.

ނިހާދު ވަނީ އަމަންއަމާންކަމާއި، ރައްކާތެރިކަމާއި، އަހުލާގީ މިންގަނޑާއި ގުޅޭ ކުށްތަކުގެ ތެރޭގައި ދިވެހިރާއްޖޭ ޚާރިޖީ މަސްލަހަތަށް ގެއްލުން ދިނުން ހިމެނުމަށް ހުށަހަޅުއްވާފައެވެ. މި އިސްލާހުގެ ދަށުން ރާއްޖެ އިން ޚާރިޖީ ގުޅުން ގާއިމްކޮށްފައިވާ ގައުމަކާއި ނުވަތަ އެ ގައުމެއްގެ ރައްޔިތުންނަށް ގެއްލުން ދިނުމާއި، އެ ރައްޔިތުންނަށް ނިސްބަތްކޮށް، އެ ގައުމެއްގެ ދިދައަކަށް ނުވަތަ ގައުމީ ރަމްޒަކަށް ނުވަތަ ނިޝާނަކަށް ގެއްލުންދިނުމާއި، ރާއްޖޭގައި ހުރި އެހެން ގައުމެއްގެ މުއައްސަސާއަކަށް ގެއްލުންދިނުމަކީ ކުށެއް ކަމަށް ވަނީ ބުނެފައެވެ. އަދި ވަކި ގައުމެއްގެ މީހެއް ކަމަށްވީތީ ފުރައްސާރަ ކުރުމާއި އަނިޔާއެއް ދިނުމަށް ގޮވާލުމުގެ އިތުރުން އޭނާގެ ދީނީ އަދި ސަޤާފީ އާދަކާދަތަކާއި މެދު ނަފްރަތު އުފެއްދުމަކީ ކުށެއް ކަމަށް އެ ބިލުގައި ވަނީ ބުނެފައެވެ. މީގެ އިތުރުން ވަކި ގައުމެއްގެ މީހަކަށް ވީތީ ރާއްޖެ ދިއުމަށް ގޮވާލުން ވެސް ކަނޑައަޅާފައި ވަނީ ކުށެއްގެ ގޮތުގައެވެ. މިއީ ޖިނާއަތުގެ 5 ވަނަ ދަރަޖައިގެ ކުށެއް ކަމަށް ވަނީ ކަނޑައަޅާފައެވެ. އެހެންކަމުން މިފަދަ ކުށަކަށް އެންމެ ބޮޑު އަދަބަކީ 2 އަަހަރު ދުވަހުގެ ޖަލުހުކުމެއް ކަަމަށާއި އަސާސީ މިންގަނޑުން ނަމަ 9 މަހާއި 18 ދުވަހުގެ ޖަލު ހުކުމެއް ކަނޑައެޅުމަށް ވެސް އެ ބިލުގައި ވަނީ ހިމަނާފައެވެ.

Advertisement

ނިހާދު ވަނީ މިފަދަ ބިލެއްގެ މުހިންމުކަން މިއަދު ބޮޑުވެފައިވާ ކަމަށް ފާހަގަކުރައްވާފައެވެ.

މި ބިލަށް ވާހަކަދެއްކެވި ގިނަ މެމްބަރުން ވާހަކަދެއްކެވީ ބިލަށް ތާއީދުކޮށެވެ. އެހެންނަމަވެސް ބައެއް މެމްބަރުން ވަނީ ބިލަށް ވަރަށް ބޮޑަށް ފާޑު ވިދާޅުވެފައެވެ. ބިލަށް ތާއީދު ކުރެއްވި ފަރާތްތަކުން ވަނީ ރާއްޖޭގެ ހަމަޖެހުމަށްޓަކާ ޚާރިޖީ ގުޅުންތައް މުހިންމުވާ އިރު އެއްވެސް ގައުމަކާއި މެދު ނުވަތަ އެ ގައުމެއްގެ ރައްޔިތުންނާއި މެދު ނަފްރަތު އުފެއްދުމަކީ ރާއްޖޭގެ ސަލާމަތަށް އޮތް ހުރަހެއް ކަމަށެވެ. އަދި ސިޔާސީ ގޮތުން ވިޔަސް ގައުމުގެ ސަލާމަތަށް ނުރައްކާވާ ފަދަ ކަންކަން ކޮށްގެން ނުވާނެކަން އެފަދަ މެމްބަރުން ވަނީ ފާހަގަކުރައްވާފައެވެ. އަދި ރާއްޖެ އަކީ ބޭރުގެ ގައުމުތަކަށް ވަރަށް ބޮޑަށް ބަރޯސާވާ ގައުމަކަށް ވާއިރު އެފަދަ އަމަލުތަކުން ރާއްޖޭގެ އިގްތިސޯދަށް ވެސް އޮތް ގޮންޖެހުމަކަށް ވެދާނެ ކަމަށް އެ މެމްބަރުން ވަނީ ފާހަގަކުރައްވާފައެވެ.

އެހެންނަމަވެސް އެ ބިލަށް ވާހަކަދެއްކެވި ބައެއް މެމްބަރުން ވަނީ މި ބިލަކީ ޚިޔާލު ފާޅުކުރުމުގެ މިނިވަންކަން ގެއްލިގެން ހިނގައިދާނެ ބިލެއް ކަމަށާއި މިއީ ވަކި ގައުމެއްގެ ނުފޫޒު އޮވެގެން، އެ ގައުމުގެ މަސްލަހަތު ހިމާޔަތްކުރުމަށް ހުށަހަޅާފައިވާ ބިލެއް ކަމަށް ސިފަކުރައްވާފައެވެ. އަދި މިއަދު އެ ބިލް ފާސްކޮށްފި ނަމަ ފަހުން ޤައުމަށް ލިބޭ ގެއްލުން ބޮޑުވާނެ ކަމަށް ވެސް އެފަދަ މެމްބަރުން ވަނީ ފާހަގަކުރައްވާފައެވެ. މިއީ ގައުމުގެ ސިޔާދަތަށް ހުރަސް އެޅޭ ގޮތަށް ސަރުކާރުން ކުރާ ކަންކަމަށް ބާރު ލިބޭ ބިލެއް ކަމަށް ވެސް މެމްބަރުން ވަނީ ފާހަގަކުރައްވާފައެވެ.