ޕެސްޓާއި ދެކޮޅަށް 3 ހެއްކަކު ހެކިބަސް ދީފި

މަސްތުވާތަކެތީގެ މައްސަލައަކާއި ގުޅިގެން ހައްޔަރުކުރި މަޝްހޫރު ރެޕް ލަވަކިޔުންތެރިޔާ ޏ. ފުވައްމުލައް-ދިގުވާނޑު، ނައި، އިސްމާއިލް އިފްހާމް މުހައްމަދު (ޕެސްޓު) ގެ މައްޗަށް ކުރާ ދައުވާއާ ގުޅިގެން ދައުލަތުގެ ހެކިންގެ ހެކިބަސް ނަގަން ފަށައިފިއެވެ.

ބުދަ ދުވަހު ވަނީ މި މައްސަލައިގެޝަރީއަތް ފަށައިއިފްތިތާޙީ ބަޔާން އިއްވާފައެވެ. އެއަށްފަހު ދެން ކުރިއަށްދިޔައީ މި މައްސަލައިގެ ހެކިބަސް ނެގުމެވެ. މައްސަލަ ބައްލަވާ ގާޒީ ހުސައިން ފާއިޒު ރަޝާދު ވިދާޅުވި ގޮތުގައި ބުދަ ދުވަހުގެ އަޑުއެހުމަށް ހާޒިރު ކުރެވިފައިވަނީ ހަމައެކަނި ޕެސްޓާއި ދެކޮޅަށް ދައުލަތުން ހުށައަޅާފައިވާ ހެކިންތަކެކެވެ.

މި އަޑުއެހުމުގައި އެންމެ ފުރަތަމަ ހެއްކެއްގެ ގޮތުގައި ހާޒިރުކޮށްފައިވަނީ ސާމީ ޝަރީފެވެ. އޭނާ ވިދާޅުވީ، އިފްހާމްއާއި އިތުރު ބަޔަކާ ގުޅިގެން މަސްތުވާތަކެތީގެ ވިޔަފާރި ކުރާ ކަމުގެ މައުލޫމާތު ލިބުނީ ފުލުހުންގެ އިންޓެލިޖެންސްގެ ފަރާތުން ކަމަށެވެ.

އެ މައުލޫމާތު ލިބުމުން، މއ ވީވާ ގެއަށް ދިޔަ ފުލުހުންގެ ޓީމުގައި އޭނާވެސް ހިމެނެއެވެ. އޭނާ ވިދާޅުވީ، މއ ވީވާގެއަކީ ޕެސްޓް ދިރިއުޅޭ ގެ ކަމަށް މައުލޫމާތު ލިބިފައިވާ ކަމަށެވެ. އޭނާ ހައްޔަރުކުރީވެސް އެތަނުންނެވެ.

އެނާގެ އަތުގައި އޮތް ތަޅުދަނޑިން މއ ވީވާގޭގެ ފުރަތަަމަ ފްލޯ ހުޅުވުނުކަމަށާއި، އޭރު ގޭތެރޭގައި ތިބީ މުހައްމަދު ސުއައިދުގެ އިތުރުން 3 އަންހެނެއްކަމަށް ހެކިވެރިޔާ ވިދާޅުވިއެވެ.

ހެކިވެރިޔާ ވިދާޅުވީ، ޕެސްޓު ލައިގެން ހުރި އަންނައުނު ބަލައި ފާސްކުރިއިރު އޭނާގެ ޖީބުން ނެގި ސިނގިރޭޓު ފޮށި ތެރޭގައި މަސްތުވާތަކެތި ކަމަށް ޝައްކު ކުރެވޭ ތަކެތި ފެނުނު ކަމަށާއި، އެއީ އޭނާ ބޭނުން ކުރަން ބަހައްޓާފައި ހުރި އެއްޗެހިކަމަށް ބުނެފައިވާ ކަމަށެވެ.

އޭނަގެ ވޮލެޓުން އެގަޑީގައި 24،000 ރުފިޔާވެސް ފެނުނުކަަމަށް ހެކިވެރިޔާ ވިދާޅުވިއެވެ.

ދެން ހާޒިރުކުރީ މުޙައްމަދު ސިނާންއެވެ. އޭނާއަކީވެސް ފުރަތަމަ ހެކިވެރިޔާ ވިދާޅުވި އޮޕަރޭޝަންގައި ބައިވެރިވި ފުލުހެކެވެ. އޭނާ ވަނީ ތުހުމަތު ކުރެވޭ ފަރާތްތައް ހައްޔަރު ކުރުމުގައި ބައިވެރިވެފައެވެ. އެގޮތުން އެ ސީންއިން އިފްހާމްއާއި ސުއައިދު ހައްޔަރުކުރިއެވެ.

ދެން ހާޒިރުކޮށްފައިވަނީ މުޙައްމަދު އާސިފެވެ. އޭނާއަކީވެސް ހަމަ ކުރިން ހާޒިރުކުރި ދެ ހެކިން ހާޒިރުކުރި ސަބަބުތައް ސާބިތު ކުރުމަށް ދައުލަތުން ހުށައެޅި ހެއްކެކެވެ.

ބާކީ ތިބި ހެކިންނަކީވެސް ހަމަ އެއް ކަންތައްތަކެއް ސާބިތު ކުރުމަށް ހުށައަޅާފައިވާ ހެކިންތަކެއްކަން ފާހަގަކޮށް ދައުލަތުން މި އަޑުއެހުމުގައި ވަނީ ބާކީ ތިބި ހެކިންގެ ހެކިބަސް ނަގަން ބޭނުންނުވާކަމަށް ބުނެފައެވެ.