ދިވެހިން ފަތުރުވެރިކަމުގެ ސިނާއަތް ހިންގުމަށް ތިބުމަށް އެދެން، އެކަން ކޮށްދެވޭނީ ޒުވާން ޖީލަށް: ނާހިދް

ދިވެހިން ފަތުރުވެރިކަމުގެ ސިނާއަތް ހިންގުމަށް ތިބުމަށް އެދިވަޑައިގަންނަވާ ކަމަށާއި އެކަން ކޮށްދެވޭނީ އަދުގެ ޒުވާން ޖީލަށް ކަމަށް ޕެރަޑައިސް އައިލެންޑް ރިސޯޓުގެ ޖެނެރަލް މެނޭޖަރ އިބްރާހިމް ނާހިދް ވިދާޅުވެއްޖެއެވެ.

ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަކުރުމަށް ހިންގާ އެކި ހަރަކާތްތަކުގެ ތެރެއިން ޓޫރިޒަމް މިނިސްޓްރީން އަންގާރަ ދުވަހުގެ ރޭ ކުރިއަށް ގެންދިޔަ ޓޫރިޒަމް އަޕްބީޓް – މެނޭޖަރސް ސްޓޯރީގެ ޝޯގައި ވާހަކަ ދައްކަވަމުން ނާހިދް ވިދާޅުވީ މީގެ 26 އަހަރު ކުރިން ފަތުރުވެރިކަމުގެ ސިނާއަތުގައި މަސައްކަތް ކުރި ހާލަތު ވަރަށް ތަފާތު ކަމަށެވެ. މިހާރު މި ދާއިރާއަށް މީހުން ވަޒީފާއަށް ނަގާއިރު ވަރަށް ރަނގަޅަށް ބަލާ ކަމަށާއި  އެމީހަކު އެންމެ ބޮޑަށް ރަނގަޅީ ކޮން ދާއިރާއަކަށް ތޯ ވެސް ބަލާ ކަމަށް އޭނާ ވިދާޅުވިއެވެ.  

އޭރު ޓްރެއިނިންގ ދޭނެ ފަރާތްތަކާއި މަސައްކަތުގެ މާހައުލުގައި އެހީތެރިވެދޭނެ މީހުން ނެތް ނަމަވެސް މިހާރު ހާލަތު ތަފާތުކަމަށް އޭނާ ވިދާޅުވިއެވެ. ފަތުރުވެރިކަމުގެ ދާއިރާއަކީ އަބަދުވެސް ޓްރެއިނިންގ ފޯރުކޮށްދޭ ދާއިރާއެއް ކަމަށް ނާހިދް ވިދާޅުވިއެވެ.

ނާހިދް އިތުރަށް ވިދާޅުވީ ދިވެހިން ދިވެހިންގެ ތާރީހާއި ވާހަކަތައް ހިއްސާކުރަން ރިސޯޓުތަކުގައި ނެތްނަމަ ހަޤީޤީ ދިވެހިރާއްޖެއަކީ ކޮބައިކަން ފަތުރުވެރިންނަށް ނޭނގޭނެ ކަމަށެވެ. ރާއްޖޭގެ ތާރީހާއި ރާއްޖޭގެ ވާހަކަތައް ދިވެހިންނަށްވުރެން ބޮޑަށް އެނގޭނެ މީހެއް ނުހުންނާނެ ކަމަށް ވެސް އޭނާ ވިދާޅުވިއެވެ.

މި ސިނާއަތަކީ މުހިންމު ސިނާއަތެއްކަން ފާހަގަކުރައްވާ ނާހިދް ވިދާޅުވީ މި ސިނާއަތް ހިންގުމަށް ދިވެހިން ތިބުން މުހިންމު ކަމަށެވެ. އަދި ކުރިއަތް އޮތްތާނގައި އެ މަންޒަރު ފެންނަން ބޭނުންފުޅުވާ ކަމަށް ވެސް ވިދާޅުވިއެވެ.

ޓޫރިޒަމް މިނިސްޓްރީން ޓޫރިޒަމް އަޕްބީޓް – މެނޭޖަރސް ސްޓޯރީގެ ޝޯ ބާއްވާފައިވާއިރު ، މި އަހަރުގެ އޮކްޓޫބަރު މަހުގެ 3 ވަނަ ދުވަހަކީ، ދިވެހިރާއްޖޭގެ ފަތުރުވެރިކަމަށް 50 އަހަރު ފުރޭ ދުވަސްކަމަށްވާތީ އެ ދުވަސް ސަރުކާރު ބަންދު ދުވަހެއްގެ ގޮތުގައި ވަނީ ކަނޑައަޅާފައެވެ.

މި އަހަރަކީ ޤައުމީ ފަތުރުވެރިކަމުގެ ދުވަސް ފުރަތަމަ ފަހަރަށް ފާހަގަކުރާ އަހަރު ކަމަށްވުމާއެކު، މި އަހަރު އެ ދުވަސް ކުލަގަދަގޮތެއްގައި ފާހަގަކުރެއްވުމަށް ސަރުކާރުން ނިންމާފައިވާކަން ވަނީ ހާމަކޮށްފައެވެ. ދުނިޔޭގެ ފަތުރުވެރިކަމުގެ ދާއިރާއިން އެކިއެކި ރޮނގުތަކުން ރާއްޖެއާ ރާއްޖޭގެ ރިސޯޓުތަކަށް އެންމެމަތީ ވަނަތައް 1990ގެ އަހަރުތަކުން ފެށިގެން އަންނަނީ ލިބެމުންނެވެ. މީގެ 20 އަހަރު ކުރިން 2000ގެ އަހަރުތައް ފެށުނުއިރު ރާއްޖޭގެ ފަތުރުވެރިކަން ވަނީ ދުނިޔޭގެ ފަތުރުވެރިކަމުގެ އެންމެމަތީ ދަރަޖައަށް އަރާފައެވެ.

ފަތުރުވެރިކަން މިހާރު ރާއްޖޭގެ އިގުތިސާދުގެ 40 އިންސައްތަ ހިއްސާކުރެއެވެ. ދެންހުރި ސިނާއަތްތައް ކުރިއެރުމުގައިވެސް ފަތުރުވެރިކަމުގެ ހިއްސާ ބޮޑެވެ.