ގާނޫނީ ފަންނުގެ ގާނޫނަށް މިއިސްލާހު ގެނައުމަށް ބިލް ހުށަހަޅުއްވީ ވިލިމާލެ ދާއިރާގެ އެމްއެންޕީ މެމްބަރ އަހުމަދު އުޝާމް
ވިލިމާލެ ދާއިރާގެ މެމްބަރު އަހުމަދު އުޝާމް
2019 ވަނަ އަހަރު ރައްޔިތުންގެ މަޖިލީހުން ފާސްކޮށް އަމަލުކުރަން ފަށާފައިވާ ގާނޫނީ ފަންނުގެ ގާނޫނަށް އަމަލުކުރަން ފެށިއިރު ގާނޫނީ ވަކީލުކަން ކިޔަވަން ފަށާފައިވާ ކުދިން އެގާނޫނުގައި އަމަލުކުރަން ބުނެފައިވާ ކަންކަމުން އިސްތިސްނާކުރާ ގޮތަށް އެގާނޫނަށް އިސްލާހު ހުށަހަޅައިފިއެވެ.
ގާނޫނީ ފަންނުގެ ގާނޫނަށް މިއިސްލާހު ގެނައުމަށް ބިލް ހުށަހަޅުއްވީ ވިލިމާލެ ދާއިރާގެ އެމްއެންޕީ މެމްބަރު އަހުމަދު އުޝާމްއެވެ. ބިލް ހުށަހަޅުއްވަމުން އުޝާމް ވިދާޅުވީ ގާނޫނީ ފަންނުގެ ގާނޫނު އުފަންވުމާއެކު ވަކީލުންގެ ހުރި ގިނަ ކަންތައްތަކަކަށް ހައްލު އައިސްފައިވާކަމަށެވެ. އަދި މިގާނޫނުގެ ދަށުން ބާ ކައުންސިލެއް އުފައްދާ އެކައުންސިލުން ގާނޫނީ ދާއިރާއިން ކިޔަވާކުދިން އެދާއިރާއިން މަސައްކަތް ފެށުމުގެ ކުރިން ޚާއްސަ ތަމްރީންތަކެއް އަދި ބާ އެގްޒާމެއް ހެދުމަށް ގާނޫނުގައި ބަޔާންކޮށްފައިވާކަމަށެވެ.
އުޝާމް ވިދާޅުވީ މިހާރު ގާނޫނު އޮތްގޮތުން ވަކީލުކަމުގެ ހުއްދަ ލިބިފައިނުވާ ހުރިހާ ފަރާތްތަކުން ވަކީލުކަމުގެ ހުއްދައަށް އެދުމުގެ ކުރިން ޚާއްސަ ތަމްރީނެއް ފުރިހަމަކޮށް ބާ އިމްތިހާނެއް ފުރިހަމަކުރަންޖެހޭކަމަށެވެ. މިއީ އެންމެ އިންސާފުވެރިގޮތް ނޫންކަމަށް ވިދާޅުވެ އުޝާމް ވިދާޅުވީ ގާނޫނީ ދާއިރާއިން ކިޔަވަން ފެށިއިރު ނެތް ޝަރުތުތަކެއް ފަހުން ހެދުނު ގާނޫނެއްގައި ހިމެނިގެންދިޔައީކަމަށެވެ. 2019 ވަނަ އަހަރުގެ މިގާނޫނު ފާސްވުމުގެކުރިން ގާނޫނީ ވަކީލުކަން ކިޔަވަން ފެށި ދަރިވަރުންނަށް ވަކީލުންނަށް ވުމަށް އިތުރު އަހަރުތަކަކާއި އިތުރު ފައިސާތަކެއް ޚަރަދުކުރަންޖެހޭކަން ނޭންގޭކަމަށް އުޝާމް ވިދާޅުވިއެވެ.
އެކަން އެނގޭނަމަ އެނޫން އެހެން ދާއިރާއެއް އިޚުތިޔާރުކުރާނެ ބައިވަރުކުދިން އެބަތިބިކަމަށް އުޝާމް ވިދާޅުވިއެވެ.
މީގެއިތުރުން އުޝާމް ވިދާޅުވީ ގާނޫނުގައި ބުނެފައިވަނީ ރާއްޖޭގެ މަތީ ތައުލީމުދޭ ތަންތަނުން ހިންގާ ކޯސްތަކާއި ކިޔަވައިދޭ މުގައްރަރާ ކޯސްތަކުގައި ބައިވެރިވުމުގެ ޝަރުތުތައް ކަނޑައަޅަންވާނީ ބާ ކައުންސިލުންކަމުގައެވެ. އޭގެކުރިން މިކަން ކުރަމުން އައީ މޯލްޑިވްސް ކޮލިފިކޭޝަން އޮތޯރިޓީންނެވެ.
އުޝާމް ވިދާޅުވީ ކޮލިފިކޭޝަން އޮތޯރިޓީން މިކަންކުރަމުން އައިއިރު ކިޔަވައިދޭ އެކި ތަންތަނުގައި ކިޔަވައިދެމުން އައީ އެކި ސިލަބަސްތަކަށްކަމަށެވެ. ބައެއް ތަންތަނުގައި ދިވެހި ބަހުން ކިޔަވައިދެމުން އައިއިރު އަނެއްބައި ތަންތަނުގައި ކިޔަވައިދެމުން ދިޔައީ އިނގިރޭސި ބަހުންނެވެ.
އުޝާމް ވިދާޅުވީ މިހާރު ބާ ކައުންސިލުން ބާ އެގްޒާމް ހެދުމަށްޓަކައި ސިލަބަސް ކަނޑައަޅާފައިވާއިރު މިކަންކަމަށް ފުރިހަމައަށް ރިއާޔަތްކޮށްފައިވާކަމަށް ގަބޫލުނުކުރައްވާކަމަށެވެ.
މީގެއިތުރުން 2019 ވަނަ އަހަރުގެ ކުރިން ގާނޫނީ ދާއިރާއިން ކިޔަވާ ނިމި ހުއްދަ ނުހޯދާ ތިބި ކުދިންވެސް އެބަތިބިކަމަށާއި އެކުދިންވެސް ޖެހެނީ ބާ އެގްޒާމް ހަދާ ތަމްރީން ފުރިހަމަކުރަންކަމަށެވެ. މިގާނޫނުން މިހާރުވެސް ބައެއް ފަރާތްތަކަށް އިސްތިސްނާދީފައިވާއިރު 2019 ވަނަ އަހަރުގެ ކުރިން ގާނޫނީ ދާއިރާއިން ކިޔަވަން ފެށިކުދިންނަށްވެސް އިސްތިސްނާ ލިބެންޖެހޭކަމަށް އުޝާމް ވިދާޅުވިއެވެ.
އުޝާމް ހުށަހަޅުއްވާފައިވާ އިސްލާހުގައި ވަނީ އެގާނޫނުގެ 66 ވަނަ މާއްދާގެ ނ ގައި ގާނޫނީ ފަންނުގެ ގާނޫނަށް އަމަކުކުރަން ފެށިއިރު ގާނޫނީ ދާއިރާއިން ޑިގްރީއަށް ކިޔަވަމުންދިޔަ ފަރާތްތަކާއި އެގާނޫނަށް އަމަލުކުރަން ފެށިއިރު ކިޔެވުން ނިންމާފައިވާ ފަރާތްތަކުގެ ތެރެއިން އެހާތަނަށް ގާނޫނީ ވަކީލުކަމުގެ ހުއްދަ ލިބިފައިނުވާ ފަރާތްތަކަށް ގާނޫނީ ވަކީލުކަމުގެ ހުއްދަ ދިނުމުގައި ބާ އިމްތިހާނު އަދި ތަމްރީނު ފުރިހަމަކުރުން އިސްތިސްނާވާނެ ކަމުގައެވެ.
