ޕާކިސްތާނުގެ ފެންބޮޑުވުމުގެ ސަބަބުން ލިބުނު ގެއްލުން 10 ބިލިއަން ޑޮލަރަށް އަރާފައިވާކަމަށް އެޤައުމުން ބުނެފި

ބޯކޮށް ވާރޭވެހި ޕާކިސްތާނުގައި ފެންބޮޑުވުމުގެ ސަބަބުން ލިބުނު ގެއްލުން 10 ބިލިން އެމެރިކާ ޑޮލަރަށް އަރާ ކަމަށް އެ ޤައުމުގެ ޕްލޭނިން މިނިސްޓަރ އަހުސަން އިގުބާލް ވިދާޅުވެއްޖެއެވެ.

އިގުބާލް ރޮއިޓަރސް އަށް ދެއްވި ހާއްސަ އިންޓަވިއުއެއްގައި ވިދާޅުވީ ފެންބޮޑުވުމުގެ ސަބަބުން އެ ޤައުމުގެ ދަނޑުބިންތަކާއި މަގުތަކާއި ގިނަ އަދަދެއްގެ ގެތަކާއި ބްރިޖުތައް ހަލާކުވެފައިވާ ކަމަށެވެ. އަދި 1000 އަށްވުރެ ގިނަ މީހުން މަރުވެފައިވާއިރު ފެންބޮޑުވުމުގެ ސަބަބުން ގެއްލުން ލިބުނު މީހުންގެ އަދަދު 33 މިލިއަނަށްވުރެ ގިނަ ވެފައިވާ ކަމަށް އޭނާ ވިދާޅުވިއެވެ.

އިގުބާލު އިތުރަށް ވިދާޅުވީ 10 ބިލިއަން ޑޮލަރަކީ މިވަގުތައް އަންދާޒާ ކުރެވޭ އަދަދެއް ކަަމަށެވެ. އެހެންވެ، މި ކާރީސާގެ ސަބަބުން ލިބުނު ގެއްލުމުގެ އަސްލު އަގު އެއަށްވުރެ އިތުރުވާނެ ކަމަށް ލަފާ ކުރެވޭ ކަމަށް އޭނާ ވިދާޅުވިއެވެ. އަސްލު އަގު އެނގޭނީ ފުރިހަމަ ދިރާސާއަކަށްފަހު ކަމަށްވެސް އޭނާ ވިދާޅުވިއެވެ.

ފެންބޮޑުވުމުގެ ސަބަބުން ލިބުނު ގެއްލުމުން އަރައިގަންނަން ފަސް އަހަރުގެ މުއްދަތެއް ނަގާނެ ކަމަށް ޕާކިސްތާނުގެ ޕްލޭނިން މިނިސްޓަރ ވަނީ ލަފާ ކުރައްވާފައެވެ. އޭނާ ވިދާޅުވީ މީގެ ސަބަބުން ކުރިއަށް އޮތްތަނުގައި އެ ޤައުމުގައި ކާނާގެ ދަތިކަން ދިމާވާނެ ކަމަށެވެ. އެގޮތުން، ފެންބޮޑުވުމުގެ ސަބަބުން އެ ޤައުމުގެ ތަރުކާރީ އާއި މޭވާ އާއި ހަނޑޫ ދަނޑުތައް އެއްކޮށްހެން ހަލާކުވެފައިވާ ކަމަށް އެ ޤައުމުން ވަނީ ރިޕޯޓްކޮށްފައެވެ.

ޕާކިސްތާނުން ވަނީ އެ ޤައުމަށް ދިމާވެފައިވާ ހާލަތާ ގުޅިގެން ބައިނަލްއަގުވާމީ އެހީއަށް އެދިފައެވެ. ބައެއް ޤައުމުތަކުން ވަނީ އެ ޤައުމަށް އެހީތެރިކަން ފޯރުކޮށްދީފައެވެ.