އަމާޒަކީ އެއްވެސް ރަށެއް ބާކީނުކޮށް އިގްތިސާދީ އަދި އިޖުތިމާއީ ކުރިއެރުން މުޅި ރާއްޖެއަށް ހޯދައިދިނުން: ރައީސް
29 އޯގަސްޓު 2022 | ހޯމަ 22:26ރައީސް ވަނީ މުލަކަތޮޅުން އަދާކުރި މެހެމާންދާރީއަށް ޝުކުރު އަދާކުރައްވާފައި
މ.ވޭވަށު ބަނދަރު ހުޅުވުމުގެ ރަސްމިއްޔާތުގައި ރައީސް ވާހަކަފުޅުދައްކަވަނީ
މި ސަރުކާރުގެ އަމާޒަކީ އެއްވެސް ރަށެއް ބާކީ ނުކޮށް އިގްތިސާދީ އަދި އިޖުތިމާއީ ކުރިއެރުން މުޅި ރާއްޖެއަށް ހޯދައިދިނުން ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ މުލަކު އަތޮޅަށް ކުރެއްވި ދަތުރުފުޅު ނިންމަވައިލެއްވުމަށްފަހު މާލެ ވަޑައިގެން ހޯމަ ދުވަހުގެ ރޭ ކުރެއްވި ޓްވީޓެއްގައެވެ. އެމަނިކުފާނު ވަނީ މ. އަތޮޅުގެ ރަތްމަންދޫ އާއި މަޑުއްވަރީ އާއި ދިއްގަރާއި ވޭވަށުގެ ރައްޔިތުން އެމަނިކުފާނަށާއި ސަރުކާރުގެ ވަފުދަށް ދެއްވި މެހެމާންދާރީއަށް ޝުކުރު އަދާކުރައްވާފައެވެ.
ރައީސް ވިދާޅުވީ އެ ރަށްތަކުގެ ރައްޔިތުންނާ ބައްދަލުކުރައްވާ ސަރުކަރުން ހިންގާ ތަރައްގީގެ މަޝްރޫއުތަކާ މެދު ޚިޔާލު ބަދަލުކުރުމުގެ ފުރުސަތު ލިބިވަޑައިގަތުމުން އުފާކުރައްވާ ކަމަށެވެ.
ރައީސުލްޖުމްހޫރިއްޔާ މުލަކަތޮޅަށް ކުރެއްވި ދަތުރުފުޅުގައި ޒިޔާރަތް ކުރެއްވި ރަށްތަކުގެ ކައުންސިލްތަކާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކާ ބައްދަލުކުރައްވާ އެ ފަރާތްތަކުގެ ހުރި ކަންބޮޑުވުންތަކާއި ރައްޔިތުންގެ ހުރި ކަންބޮޑުވުންތައް އަޑުއެއްސެވިއެވެ. އަދި އެ ރަށްރަށުގައި މިހާރު ހުރި މައްސަލަތައް ހައްލު ކުރެއްވުމަށް މި ސަރުކާރުން މަސައްކަތް ކުރައްވާނެ ކަަމަށް ވެސް ރައީސް ވަނީ ވިދާޅުވެފައެވެ.
މުލަކު އަތޮޅުގެ ބައެއް ރަށްތަކަކީ އާބާދީގެ ގޮތުން މަދު ބަޔަކު ދިރިއުޅޭ ރަށްތަކަކަށްވުމުން ކުރީ ސަރުކާރުތަކުން އެ ރަށްތަކުގައި ތަރައްގީގެ މަޝްރޫއުތައް ހިންގުމުގައި އިހުމާލުވެފައިވާކަން ރައީސް ވަނީ ފާހަގަކުރައްވާފައެވެ. އަދި އެފަދަ އެއްވެސް ތަފާތު ކުރުމެއް މި ސަރުކާރުން ނުގެންގުޅުއްވާނެ ކަމުގެ ޔަގީންކަން ރައީސް ވަނީ ދެއްވާފައެވެ.
ރައީސްގެ ދަތުރުފުޅުގައި މުލަކު އަތޮޅު ކައުންސިލުން ވެސް ވަނީ އެ އަތޮޅުގެ ރަށްތަކުގައި ކުރީ ސަރުކާރުތަކުން ނުކުރާވަރަށް ތަރައްގީގެ މަޝްރޫއުތައް މި ސަރުކާރުން ކުރިއަށްގެންދާކަން ފާހަގަކުރައްވާފައެވެ. އަދި އެކަމަށް ރައީސްއަށާއި ސަރުކާރަށް ކައުންސިލްތަކުން ވަނީ ޝުކުރު އަދާކޮށްފައެވެ.
