ޕްރެކްޓިސް ޕާލަމަންޓް ފޯރ ޔޫތު ޕްރޮގްރާމް ނިންމުމުގެ ރަސްމިއްޔާތު ބާއްވައިފި
27 އޯގަސްޓު 2022 | ހޮނިހިރު 13:14މި ޕްރޮގްރާމުގައި 25 ޒުވާނުން ބައިވެރިވެފައިވޭ
ޕްރެކްޓިސް ޕާލަމަންޓް ފޯރ ޔޫތު ނިންމުމުގެ ރަސްމިއްޔާތު
ރައްޔިތުންގެ މަޖިލީހުގެ މަސައްކަތްތަކަށް ޒުވާނުން އަހުލުވެރިކުރުވުމަށް ކުރިއަށް ގެންދިޔަ "ޕްރެކްޓިސް ޕާލަމަންޓް ފޯރ ޔޫތު" ޕްރޮގްރާމް ނިންމާލައިފިއެވެ.
މިފަހަރުގެ ޕްރޮގްރާމުގައި 25 ޒުވާނުން ބައިވެރިވެފައިވާއިރު ޕްރޮގްރާމް ކުރިއަށް ގެންގޮސްފައިވަނީ 21 އޮގަސްޓުން ފެށިގެން 27 އޮގަސްޓަށެވެ. މި ޕްރޮގްރާމަކީ ރައްޔިތުންގެ މަޖިލީހުގެ އިދާރާއާއި ޔޫއެންޑީޕީ މޯލްޑިވްސް ގުޅިގެން, އޮސްޓްރޭލިއާގެ ޑިޕާޓްމަންޓް އޮފް ފޮރިން އެފެއަރޒް އެންޑް ޓްރޭޑްގެ އެހީތެރިކަމާއެކު ކުރިއަށް ގެންދިޔަ ޕްރޮގްރާމެކެވެ.
ޕްރޮގްރާމު ނިންމުމުގެ ރަސްމިއްޔާތުގައި ވާހަކަފުޅުދައްކަވަމުން ރައްޔިތުންގެ މަޖިލީހުގެ މަޑަވެލީ ދާއިރާގެ މެންބަރު ހުސައިން ފިރުޝާން ވިދާޅުވީ، ޕްރޮގްރާމުގައި ބައިވެރިވި ޒުވާނުންނަށް ވަރަށް ގިނަ މައުލޫމާތު ލިބިގެންދާނެ ކަމަށެވެ. ކޮންމެ މީހަކުވެސް އަޒުމެއް ކަނޑައަޅައި، ކުރިއަތް އޮތްތަނުގައި މަޖިލީހުގެ ގޮނޑިއަކުން ފެނުމަކީ އުންމީދެއް ކަމަށްވެސް އޭނާ ވިދާޅުވިއެވެ.
ރާއްޖޭގައި އެކި ޕޮލިސީތައް ހަދާއިރު މި މުޖުތަމައުގައި ޒުވާނުންގެ އަޑު އޮތުމަކީ ވަރަށް މުހިންމުކަމެއްކަން ފިރުޝާން ފާހަގަކުރެއްވިއެވެ. އަދި ގޮންޖެހުންތަކާއެކުވެސް ކުރިއަށްދިޔުމަށް ޒުވާނުންނަށް ވަނީ ހިތްވަރުދެއްވާފައެވެ.
ޕްރެކްޓިސް ޕާލަމެންޓް ސީރީޒްއަކީ ރައްޔިތުންގެ މަޖިލީހުގެ އިދާރާއާއި ޔޫއެންޑީޕީ މޯލްޑިވްސް ގުޅިގެން, އޮސްޓްރޭލިއާގެ ޑިޕާޓްމަންޓް އޮފް ފޮރިން އެފެއާރޒް އެންޑް ޓްރޭޑްގެ އެހީތެރިކަމާއެކު ހިންގާ ޕްރޮގްރާމެކެވެ. މި ޕްރޮގްރާމްގައި ހިމެނެނީ މައިގަނޑު 2 ބައެވެ. އެއީ، "ޕްރެކްޓިސް ޕާލަމެންޓް ފޯރ ޔޫތު" އަދި "ޕްރެކްޓިސް ޕާލަމެންޓް ފޯރ ވިމެން"އެވެ. މިޕްރޮގްރާމްގެ މައިގަނޑު މަގުސަދަކީ ޒުވާނުންނާއި އަންހެނުން ސިޔާސީ ހަރަކާތްތަކުގައި ބައިވެރިވުމަށް ހިތްވަރުދީ، އެހީތެރިވެ, އަދި ކުރިމަގުގައި ސިޔާސީ މަގާމުތަކަށް ކުރިމަތިލުމަށް ބާރުއެޅުމެވެ.
"ޕްރެކްޓިސް ޕާލަމެންޓް ފޯރ ޔޫތު"ގައި 3 ބައެއް ހިމެނެއެވެ. އެއީ; ޕޮލިސީތަކާއި، މަޖިލީހުގެ މަސައްކަތްތައް ކުރިއަށްދާގޮތުގެ މައުލޫމާތު ދިނުމުގެ ސެޝަންއަކާއި، ރައްޔިތުންގެ މަޖިލީހުގެ ނަމޫނާ މާދިރީއެކެވެ.
