ފަރަށް އަރާފައިވާ ޕްލެޓްފޯމް ފުންކޮށް އެތަނުން ނަގައިފި
އެ ޕްލެޓްފޯމް ފަރަށް އަރައި އެ ފަރަށް ގެއްލުން ލިބެމުންދާ މައްސަލައާއި ގުޅިގެން، ރައްޔިތުންގެ މަޖިލީހަށް ކުއްލި މައްސަލައެއް ވަނީ ހުށަހަޅާފައި
ފަރަށް އަރާފައިވާ ޕްލެޓްފޯމު ނެގުން
ތިލަމާލެ ބްރިޖްގެ މަސައްކަތްކުރަމުން އަންނަނިކޮށް މީގެ ހަފުތާއެއް ހާދުވަސް ކުރިން ވިލިމާލޭ ފަރަށް ބީހުނު ޕްލެޓްފޯމް ފުންކޮށް އެތަނުން ނަގައިފިއެވެ.
އެންވައިރަންމެންޓް މިނިސްޓްރީގެ އޮފިޝަލަކު ރާއްޖެ އެމްވީ އަށް ވިދާޅުވީ އެ ޕްލެޓްފޯމް ނަގާފައި ވަނީ ހޮނިހިރު ދުވަހުގެ 12:30ހާއިރު ކަމަށެވެ. އަދި އެ ޕްލެޓްފޯމް ފަރަށް އެރުމުން ލިބިފައިވާ ގެއްލުންތައް ދެނެގަތުމަށް ވަރަށް އަވަހަށް ދިރާސާކުރާނެ ކަމަށް ވެސް އޭނާ ވިދާޅުވިއެވެ. މީގެ ކުރިން އެ ޕްލެޓްފޯމް ނަގަން ހަމަޖެއްސި ތާރީހު ފަހަނައަޅާ ދިޔަ އިރުވެސް އެ ޕްލެޓްފޯމު ނެގިފައެއް ނުވެއެވެ.
އެ މަޝްރޫއު ހިންގަމުންއަންނަ އިންޑިއާގެ އެފްކޮންސް ކުންފުނިން ބުނީ ޕްލެޓްފޯމް ނުނެގި ލަސްވީ މޫސުން ގޯސްވުމުގެ ސަބަބުން ކަމަށެވެ. ކުންފުނިން ވަނީ ތިލަމާލެ ބްރިޖްގެ ޖިއޯ ޓެކްނިކަލް ދިރާސާތަކަށް ގެނެފައިވާ "ސެލްފް އެލެވޭޓިން ޕްލެޓްފޯމް" (އެސްއީޕީ) ވިލިމާލޭ ފަރަށް ބީހެން ދިމާވީ މޫސުން ގޯސްވެ ވައިގަދަވުމާއި ރާޅު ބޮޑު ވުމުގެ ސަބަބުން ކަމަށް ވެސް ބުނެފައެވެ. އަދި އެ ހާދިސާ ހިނގީ އެ ސަރަހައްދުގައި ޕްލެޓްފޯމް އަޅާފައި ބޭއްވުމަށް މަސައްކަތް ކުރަމުންދަނިކޮށްކަމަށް އެ ކުންފުނިން ބުނެފައިވެއެވެ.
އެ ޕްލެޓްފޯމް ނެގުން ލަސްވެ ފަރަށް ގެއްލުންވަމުންދިއުމާއި ގުޅިގެން ގިނަ ބައެއްގެ ފާޑުކިޔުން، ސަރުކާރަށާއި މި މަޝްރޫއު ހިންގަމުން އަންނަ ކުންފުންޏަށް ވަނީ ކުރިމަތިވެފައެވެ.
ޕްލެޓްފޯމް ފަރަށް އެރުމާއި ގުޅިގެން އެ މައްސަލަ ހައްލުކުރުމަށް ޕްލޭނިން މިނިސްޓްރީ އާއި އީޕީއޭ އަދި އެފްކޮންސް ގުޅިގެން، އެ ތަންތަނުގެ އިސްވެރިންނާ އެކު ވަނީ މަޝްވަރާ ބައްދަލުވުމެއް ވެސް ބާއްވާފައެވެ. އެ ޕްލެޓްފޯމް ފަރަށް އަރައި އެ ފަރަށް ގެއްލުން ލިބެމުންދާ މައްސަލައާއި ގުޅިގެން، ރައްޔިތުންގެ މަޖިލީހަށް ކުއްލި މައްސަލައެއް ވެސް ވަނީ ހުށަހަޅާފައެވެ.
ވިލިމާލެ ދާއިރާގެ މެންބަރު އަހުމަދު އުޝާމް ހުށަހެޅުއްވި އެ މައްސަލައިގައި ވިދާޅުވެފައިވަނީ، އެ ޕްލެޓްފޯމް ފަރަށް އެރުމުގެ ސަބަބުން ވިލިމާލޭގެ ފަރަށް ބޮޑެތި ގެއްލުންތަކެއް ވަމުން ދިޔަކަމަށެވެ. އަދި މިފަދަ ކަންކަން ތަކުރާރުވިޔަ ނުދިނުމަށްޓަކާ ބްރިޖް ޕްރޮޖެކްޓްގެ މަސައްކަތް ކުރަމުންދާ ފެންވަރު ސަރުކާރުގެ ކަމާގުޅުންހުރި އިދާރާތަކުން ވަރަށް ކައިރިން ބަލައި މިހާރުން މިހާރަށް ވެސް މުހިންމު ފިޔަވަޅުތަކެއް އަޅަންޖެހޭކަމަށް ފެންނަ ކަމަށް ހުޝާމް ވަނީ ވިދާޅުވެފައެވެ.
