އެއްގަމު އުޅަނދުތަކުގައި މުދާ އުފުލުމުގެ އައު ގަވާއިދެއް، އަގުތަކަށް ވެސް ބަދަލު ގެނެސްފި
27 އޯގަސްޓު 2022 | ހޮނިހިރު 07:52750 ކިލޯއިން ދަށުގެ އުޅަނދެއް ނަމަ ގަޑިއިރަކަށް ނަގަން ޖެހޭނީ 150 ރުފިޔާ
ބާޒާރުމަތީގެ ފިހާރަތަކުން ޕިކަޕަކަށް މުދާ ބަރުކުރުމުގެ މަސައްކަތް ކުރަނީ
އެއްގަމު އުޅަނދުގައި މުދާ އުފުލުމުގެ އައު ގަވާއިދެއް އެކުލަވާލައި، އެ ގަވާއިދުގެ ދަށުން ނަގާނެ އަގުތައް ޓްރާންސްޕޯޓް މިނިސްޓްރީން އިއުލާނުކޮށްފިއެވެ.
އެ މިނިސްޓްރީން އާއްމުކޮށްފައިވާ ގަވާއިދާއެކު 2017 ވަނަ އަހަރުން ފެށިގެން އަމަލު ކުރަމުން އައި ގަވާއިދާއި، އެ ގަވާއިދަށް ގެނެސްފައިވާ ހުރިހާ އިސްލާހެއް ވަނީ ބާތިލުވެފައެވެ. މިދިޔަ ބުރާސްފަތި ދުވަހުން ފެށިގެން އައު ގަވާއިދާ އެއްގޮތަށް އަމަލު ކުރަން ފަށާފައިވާ ކަމަށް އެ ގަވާއިދުގައި ވަނީ ބުނެފައެވެ.
ޓްރާންސްޕޯޓް މިނިސްޓްރީން ކަނޑައަޅާފައިވާ އައު އަގުތަކަށް ބަލާއިރު މިހާރު މާލެ ސަރަހައްދުގައި މުދާ އުފުލާ 750 ކިލޯއިން ދަށުގެ އުޅަނދެއް ނަމަ ގަޑިއިރަކަށް ނަގަން ޖެހޭނީ 150 ރުފިޔާ އެވެ. އަދި 750 ކިލޯ އާއި 2000 ކިލޯއާ ދެމެދުގެ އުޅަނދުތަކުން ނަގާނީ ގަޑިއިރަކަށް 200 ރުފިޔާ ކަމަށް އެ މިނިސްޓްރީން ބުނެއެވެ. މި އަގުތަކާއި ޚިލާފަށް ދަތުރުކުރާ ފަރާތްތަކާ މެދު ޤާނޫނާ ގަވާއިދުގެ ތެރެއިން ފިޔަވަޅު އަޅާނެ ކަމަށް ވެސް މިނިސްޓްރީން ބުނެއެވެ.
އެ މިނިސްޓްރީން ކަނޑައަޅާފައިވާ އައު އަގުތަކަކީ މީގެ ކުރީގެ ގަވާއިދުގެ ދަށުން ނަގަމުން އައި އަގުތަކާ އަޅާ ބަލާއިރު ބޮޑު އަގުތަކެވެ. އެގޮތުން ކުރިއާ އަޅާ ބަލާއިރު ގާތްގަނޑަކަށް 10 ރުފިޔާ އާއި 20 ރުފިޔާއާ ދެމެދުގެ އިތުރުވުމެއް އަގުތަކަށް ވަނީ އައިސްފައެވެ. ކުރީގެ ގަވާއިދުގެ ދަށުން 1000 ކިލޯއަށްވުރެ ކުދި އުޅަނދުތަކުން ނަގަމުން އައީ 140 ރުފިޔާއެވެ. އަދި އެއަށްވުރެ ބޮޑެތި އުލަނދުތަކުން ނަގަމުން އައީ ގަޑިއިރަކަށް 180 ރުފިޔާ އެވެ.
މުދާ އުފުލާ އުޅަނދުތަކުން އެ އުޅަނދަކުން ނަގާނެ އަގު އާއްމުކޮށް ފެންނާނެހެން އުޅަނދުގެ ތެރޭގައި ބަހައްޓާފައި ހުންނަން ޖެހޭނެއެވެ. އަދި އެ އުޅަނދަކީ ކިހާ ބަރު މިނެއްގެ މުދާ އުފުލޭވަރުގެ އުޅަނދެއްކަން ވެސް އާއްމުކޮށް ފެންނާނެހެން ޖަހާފައި ހުންނަން ޖެހޭނެއެވެ. އެގޮތުން އުޅަނދުގެ ރަޖިސްޓަރީގައި އެ އުޅަނދެއްގައި އުފުލޭނެ ކަމަށް ކަނޑައަޅާފައިވާ ބަރުދަން، އުޅަނދުގެ ދެ ފަރާތުގެ ކުރީ ދޮރުފަތުގައި ލިޔެފައި އޮންނަން ޖެހޭނެއެވެ. އެ ބަރުދަނަށްވުރެ އިތުރަށް މުދާ އުފުލުމަކީ މަނާ ކަމެކެވެ.
މިނިސްޓްރީން ބުނެފައިވާ ގޮތުގައި މާލެ ސަރަހައްދުގައި މުދާ އުފުލޭނީ C0 އާއި C1 އާއި C2ގެ ގިންތީގައި ރަޖިސްޓަރީކޮށްފައިވާ އެއްގަމު އުޅަނދުތަކަށް އެކަންޏެވެ. އެއީ ޕިކަޕާއި ލޮރީ ފަދަ ބޮޑެތި އުޅަނދުތަކެެވެ. ސައިކަލާއި ބައިސްކަލު ފަދަ އުޅަނދުތަކުގައި މުދާ އުފުލުން މަނާވާނެއެވެ. ބައިސްކަލާއި ހަމައެކަނި ދެ މީހުންނަށް އެރޭ ގޮތަށް ފަރުމާކޮށްފައި ހުންނަ އޮޓޯ ސައިކަލާއި މޮޓޯ ސައިކަލުގައި މުދާ އުފުލޭނީ އެ އުޅަނދެއްގައި ހަރުކޮށްފައިވާ ވަށިގަނޑަށް ނުވަތަ އެ އުޅަނދެއްގެ މަޑިދަށަށް ލައިގެންނެވެ.
މި ގަވާއިދުގައި ޓްރާންސްޕޯޓް މިނިސްޓްރީން ވަނީ އެއްގަމު އުޅަނދުގައި މުދަލާއި ތަކެތި އުފުލާނެ ގޮތް ވެސް ބަޔާންކޮށްފައެވެ. އެގޮތުން، މުދާ އަރުވައި ބާލަން މަޑުކުރާ އެއްވެސް އުޅަނދެއް މަގަކަށް ނުވަތަ ގޯޅިއަކަށް ލަނބާލާ ކަންމަތީގައި، މަގުގެ މެދަށްވާ ގޮތަށް ނުވަތަ އާންމު ޓްރެފިކަށް ދަތިވާ ގޮތަށް މަގުމައްޗަށް މަޑުކުރުމަކީ މަނާކަމެކެވެ. އަދި ގުދަނަކުން އުޅަނދަށް މުދާ އަރުވައި ބާލަން ވާނީ، ގުދަނުގެ އެތެރޭގައި ބާއްވައިގެން ނުވަތަ މަގާއި ދުވާރު ބޭނުންކުރާ ފަރާތްތަކަށް ދަތިނުވާ ގޮތަށް އުޅަނދު ބާއްވައިގެން ކަމަށް ވެސް ވަނީ ބަޔާންކޮށްފައެވެ.
