ދިވެހިރާއްޖެ، ކޮމަންވެލްތު ޖަމާއަތުގެ ޕާލިމެންޓަރީ އެސޯސިއޭޝަން އާއި ގުޅުމަށް ހުށަހަޅާފައިވާ ހުށަހެޅުން ބަލައިގަންނަން އެ ޖަމާއަތުން ނިންމައިފިއެވެެ.

ކޮމަންވެލްތާއި ގުޅުމަށް ރާއްޖެ އިން ހުށަހެޅި ހުށަހެޅުން ކޮމަންވެލްތު ޖަމާއަތުގެ ޕާލިމެންޓަރީ އެސޯސީއޭޝަނުން ބަލައިގަނެފައިވަނީ، ކެނެޑާގެ ހެލިފެކްސްގައި ބޭއްވި 65 ވަނަ ކޮމަންވެލްތު ޕާލިމެންޓަރީ ކޮންފަރެންސް ބައްދަލުވުމުގައެވެ. ކެނެޑާގައި ބޭއްވި އެ ބައްދަލުވުމުގައި ދިވެހިރާއްޖެ ތަމްސީލުކޮށްދެއްވާފައި ވަނީ ރައްޔިތުންގެ މަޖިލީހުގެ މެޖޯރިޓީ ލީޑަރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމްއެވެ.

ދިވެހިރާއްޖެ އިން ކޮމަންވެލްތުން ވަކިވީ ކުރީގެ ރައީސް އަބްދުﷲ ޔާމީން އަބްދުލް ގައްޔޫމުގެ ވެރިކަމުގައެވެ. ކޮމަންވެލްތުން ވަކިވުމަށް ކެބިނެޓްގެ ލަފާގެ މަތިން ރައީސް ޔާމީން ނިންމެވީ 2016 ވަނަ އަހަރުގެ އޮކްޓޯބަރު މަހުގެ ތެރޭގައެވެ. އޭރު ކޮމަންވެލްތު މިނިސްޓީރިއަލް އެކްޝަން ގުރޫޕް (ސީމެގް) ގެ ރަސްމީ އެޖެންޑާގައި ރާއްޖެ ހިމަނައި، ދެން އިސްލާހު ނުވެއްޖެ ނަމަ ކޮމަންވެލްތުން ރާއްޖެ ސަސްޕެންޑް ކުރުމަށް ވިސްނާނެ ކަމުގެ އިންޒާރު ކޮމަންވެލްތުން އޮތީ ދީފައެވެ.

ރާއްޖެ ކޮމަންވެލްތު ޖަމާއަތުން ވަކިވިފަހުން ގިނަ އަހަރުތަކެއް ވެފައި ވާއިރު، ރާއްޖެއިން އަނބުރާ ކޮމަންވެލްތާއި ގުޅިފައިވަނީ ރައީސުލްޖުމުހޫރިއްޔާ އިބްރާހިމް މުހައްމަދު ސާލިހުގެ ސަރުކާރުގެ އިސްނެގުމާއި އެކުގައެވެ. އެންމެ ފުރަތަމަ ރާއްޖެ ކޮމަންވެލްތުގެ މެމްބަރަކަށް ވީ 1982ގަ އެވެ.