ކުރްޒާވާ ހޯދުމަށް ފުލަމްއިން މަސައްކަތްކުރަނީ

ޕީއެސްޖީއަށް ކުޅެމުން އަންނަ ލޭވިން ކުރްޒާވާ ހޯދުމުގެ މަސައްކަތް ފުލަމްއިން ފަށައިފިއެވެ.

ޕީއެސްޖީން އަންނަނީ ކުރްޒާވާ ވިއްކާލުމަށް މަސައްކަތްކުރަމުންނެވެ. ފުލަމްގެ ކޯޗު މާކޯ ސިލްވާގެ އެދުމުގެ މަތިން ދެކްލަބުގެ މެދުގައި މިހާރު ދަނީ ކުރްޒާވާއާމެދު މަޝްވަރާކުރަމުންނެވެ. އަދި ކުރިއަށް އޮތް ދެތިން ދުވަސްތެރޭގައި އިތުރު ބައްދަލުވުންތައް ދެކުލަބުގެ މެދުގައި ބޭއްވުމަށް ނިންމާފައިވާ ކަމަށްވެސް ރިޕޯޓުތައް ބުނެއެވެ.

ލޯނު އުސޫލުގެ ދަށުން ފުލަމްއަށް ކުރްޒާވާ ދޫކުރުމުގެ ބަދަލުގައި، ދެކްލަބުންވެސް އަންނަނީ ދާއިމީ އެއްބަސްވުމެއްގެ ދަށުން ކުރްޒާވާ ފުލަމްއަށް ބަދަލުކުރުމަށް މަސައްކަތް ކުރަމުންނެވެ. ނަމަވެސް މި އެއްބަސްވުމުގެ އެއްވެސް އަގުތަކެއް މިހާތަނަށް ހާމަކޮށްފައެއްނުވެއެވެ.

ކްލަބު ފުޓްބޯޅައިގެ ތެރެއަށް ކުރްޒާވާ ފުރަތަމަ ނުކުތީ 2010 ވަނަ އަހަރު މޮނާކޯއިންނެވެ. މޮނާކޯގައި އޭނާ ވަނީ 75 މެޗު ކުޅެ 6 ލަނޑު އެޓީމަށް ޖަހައިދީފައެވެ. ކުރްޒާވާ ޕީއެސްޖީއަށް ބަދަލުވީ 2015 ވަނަ އަހަރުއެވެ. އޭގެ ފަހުން އެޓީމަށް 106 މެޗު ކުޅެދީ 10 ލަނޑު އޭނާ ވަނީ ޖަހާފައެވެ. 2014 ވަނަ އަހަރުން ފެށިގެން 2019 ވަނަ އަހަރުގެ ނިޔަލަށް ކުރްޒާވާ ވަނީ ފްރާންސްގެ ގައުމީ ޓީމަށްވެސް ކުޅެފައެވެ.